جرب عيشة الملوك على مركب عم "دقدق"!

فى وسط الزحمة ، والهموم الكتير اللى احنا عايشنها، لازم ندى لنفسنا راحة ونحاول ننسى كل المشاكل ، وبصراحة النيل هو أحسن مكان ممكن تعيش فيه الحالة دى وترمى همومك
هناك ح تلاقى عبد النبى المراكبى قدام فندق شهير بجاردن سيتى، هو معروف هناك، أى حد هيدلك عليه بسهولة، عم عبد النبى أخدنا ورحنا عند عم دقدق ، اللى استضاف على مركبه عدد كبير من النجوم والمشاهير، منهم الملك حسين ملك الأردن السابق، وكمان الأميرة ديانا، المركب دى فيها حاجة غريبة بتحس انها بتاعتك وانك ملك متوج وهى بتتحرك بك فى النيل.
بعد فصال وشد وجذب اتفقت مع عم دقدق انى هاخد المركب لمدة ساعة ب70 جنيهاً، الساعة 5 مساء وتحركنا فى اتجاه كوبرى الجامعة، على فكرة عم دقدق مش هو اللى بيطلع بالمركب، لأنه ريس كبير، اللى طلع بينا هو عم عبد النبى.
حياة مختلفة تماما، وبمجرد ما عم عبد النبى ضرب المجداف فى الميه أنا كمان سبت همومى على الشط لحد ما أرجع لها تانى، وعلشان لزوم الرحلة عم عبد النبى عمل من مية النيل كوباية شاى فى الخمسينة، بتظبط الدماغ آخر حاجة، وطول الرحلة بدأ عم عبد النبى يتكلم عن جمال النيل خاصة فى أسوان.
الكلام جاب بعضه والراجل فتح قلبه وعرفت منه أنه شغال على المركب من 50 سنة، وكان عمره وقتها 10 سنين، وكمان بيعتبر الصيف موسم الشباب وبيتراوح سعر الرحلة من 70 ل80 جنيهاً، وغالبا الأسر بيفضلوا انهم يخرجوا فى المناسبات زى الأعياد وشم النسيم وبنفس السعر، لكن الشتاء له زبون خاص صاحب مزاج والرحلة تكلفتها حوالى 50 جنيهاً ، ده طبعا غير إكرامية المراكبى ، طبعا الأجانب بيكون لهم حساب خاص يعنى الرحلة بتتكلف 150 جنيهاً .
بسرعة خلصت الرحلة ونزلت من المركب لقيت الهموم مستنيانى، وقتها افتكرت كلام عم عبد النبى " اللى يركب المركب دى لازم يرجع لها تانى " !