حمل جثة ابنه ودفنها بعد غروب الشمس!

"هو في أب يقدر يموتّ ابنه ضناه، نصيبه كده، ضربته قلمين علي وشه وقع على الأرض ومات، عمره انتهى لغاية كده، شلته بأيدي وأنا قلبي بيتقطع ودفنته بعد غروب الشمس"!، هذا جزء من اعترافات الأب قاسي القلب بعد القبض عليه.
المفارقة ما انفجر الأهالي بقوله، "ده واحد قلبه حجر، مش ممكن يكون أب، قبل كده ضربه على وجهه وكان السبب في فقأ عينه، الغريب وهو بيدفن ضناه بقلب ميت، قال لنا: " وهو بيلعب وقع من سطح المنزل في الشارع، وصدقناه"!
هذا ما حدث في إحدى قرى العياط، حين أقدم أب على قتل ابنه بسبب عدم انصياعه لأوامره، بل حاول تضليل الشرطة لعدم معرفة الحقيقة، وهرب لكن الأهالي أمسكوا به وسلموه لمباحث العياط، وإليكم تفاصيل الجريمة واعترافات الأب المتهم.
لم يتجاوز "محمد" الثامنة من عمره، طفل صغير تشع عيناه بالبراءة، كل أمنيته اللعب والاستمتاع بالإجازة مع أصدقائه، لكنه قتل بلا ذنب من "أب" مفتري بعد أن عذبه وضربه، وفقع عينه من قبل، كل هذا لا لشيء إلا بسبب رفض الطفل العمل معه!
انتقلت "أخبار الحوادث" إلى عزبة أبو النور بقرية بيدف مركز العياط بمحافظة بالجيزة لمعرفة القصة كاملة، وبوصولنا إلى العزبة ، وجدنا أنفسنا أمام روايتين، الأولى من أهل القرية والعزبة، والثانية من عائلة الأم.
الرواية الأولى
عزبة أبو النورعبارة عن عزبة صغيرة تابعة لقرية "بيدف" لها عدة مداخل عبرالطرق الرئيسية والفرعية، الأطفال يلعبون بشوارعها الصغيرة، والأهالي البسطاء يجلسون أمام منازلهم، تحدثنا معهم، بدأ أحدهم يروي ما حدث قائلاً: الصراحة "حسب الله" مش بيقعد في القرية كتير فهو على طول في العزبة، وهي على مسافة خطوات بسيطة من القرية وغير كده هو على طول بيذهب للعمل بالواحات بعد مدينة 6أكتوبر، كل اللي نعرفه أن دي مش أول مرة الأب يضرب ابنه لأن حصل قبل كده وضربه وتسبب في "فقع" عينه، ويضيف؛ محدش متخيل أن فيه أب قاسي بالشكل ده على ولاده!، احنا المفروض نضحي بكل شيء من أجل أولادنا، المهم اللي حصل إن يوم الواقعة ذهب الأب إلى مكان عمله وبعد مرور ساعات قليلة عاد فجأة وهو يحمل بين يديه "محمد" ويقول أنه مريض جداً بسبب سقوطه من أعلى منزل بالأرض التي يعمل بها، فقلنا عادي محدش تخيل أنه يحمل بين يده جثة ابنه، وبمرور غروب الشمس عرفنا أن "محمد" مات و"حسب الله" أبوه دفنه، وفجأة لقينا الشرطة بقت في البلد وعرفنا أن في حد من أصدقاء "حسب الله" اللي شغال معه في الأرض بلغ عنه أنه ضرب "محمد" بشكل مفرط فيه لحد ما تسبب في قتله وجاء من أجل دفنه ودفن جريمته وإخفاء الحقيقة دون التوقع أن يتم الإبلاغ عنه، وده كل اللي عرفناه.
الرواية الثانية
وتقابلنا مع "جمعة" جد محمد لوالدته فيقول: "محمد" كان أكبر إخوته ووالده دا قريبنا أصلاً ومافيش حد في الدنيا يقتل ابنه ضناه كل اللي حصل دا أكيد مش قصده ممكن يكون بسبب تأديبه أومال يكون قصده إنه يموته، أكيد لا طبعاً، وعمر ما "حسب الله" افترى عليه ولا حاجه حتى إصابة عينه مكنش ليه دعوه بيها دا "محمد" وهو بياكل داخل شوية شطة في عينه، واللي حصل أنا مشفتوش بس اللي أعرفه أن "حسب الله" شغال في قطعة أرض في الواحات بأكتوبر وخد "محمد" معه يوم الثلاثاء وضرب الواد هناك عشان الواد مسمعش كلامه لما طلب منه حاجه وعادي يعني أب يضرب ابنه المهم أن يوم الخميس بعد صلاة الظهر حد من أصدقاء "حسب الله" اتصل وبلغني أن "محمد" تعبان جداً وبيموت وأن ابوه ضربه والواد مغمى عليه فخدنا عربية وجرينا على هناك وخدنا الواد ومات مننا في الطريق قدر ربنا يعني، وبلغت الشرطة ولما جيت هنا، وعملنا محضر وكان أبوه موجود لكنه هرب بعدها، وكان خايف مننا مع أنه مكنش قصده، وبدأنا نبحث عنه حتى أمسكناه به وسلمناه لمركز شرطة العياط، بس هو مكنش قصده دا "حسب الله" بيبكي بدل الدموع دم فعلا، ومكنش متخيل كده.
وقف "حسب الله" أمام رئيس مباحث قسم شرطة العياط، وبمواجهته أنكر التهمة في البداية، وبتحريات معاون مباحث قسم شرطة العياط، أثبت صحة الواقعة وأن الأب وراء ارتكاب الجريمة وبالضغط عليه انهار في البكاء ليعترف أمام رئيس المباحث وأمام اللواء مساعد مدير أمن الجيزة لقطاع الشرق: "مكنش قصدي اقتله ده ابني بس ده عمره" واللي حصل أنه الواد كان عايز يلعب مع صحابه وكان رفض ييجي معايا وأخذته معايا غصباً عنه وفضل يقول لي أنه عايز يرجع ومش عايز يشتغل فتعصبت وغضبت وسددت له ضربات ولكمات قوية بيدي فلم يتحملها جسده الصغير ليسقط على الأرض قاطعاً للنفس، حاولت إسعاف ولكن بعد فوات الآوان، ولفظ أنفاسه، كنت بأدبه ومكنش قصدي اللي حصل دا خالص.
تحرر محضر بالوقعة واعترافات الأب المتهم، وإخطار اللواء مدير أمن الجيزة، الذي أحاله إلى النيابة التي قررت حبس المتهم 4 أيام على ذمة التحقيقات.
فريق البحث
اللواء محمد شوقي مساعد مدير أمن الجيزة لقطاع الشرق
اللواء إبراهيم الديب مدير المباحث
اللواء عصام سعد مدير أمن الجيزة
الرائد أحمد صبحي رئيس مباحث العياط
الرائد كريم عليان معاون مباحث العياط