حلوة منك..! لأ حقيقى حلوة منك..! واعترف لك إنها دخلت عليَّا بس لما العقل بيفكر شوية بيلاقيك قدامه واقف صوت وصورة «بُص ع العصفورة» «بُص ع العصفورة» لعبة قديمة جداً بس أخطر م الخطورة كل يوم الفجر يدّن وابتدى أفتح عنيّا ألقى نفس اللعبة دايماً فيها ريحتك.. هيَّه.. هيَّه مرة تلهينى بحكاية مرة ترمينى ف قضية مرة أغرق ف البطالة مرة أغضب من مقالة والإشاعة ف الإذاعة والفساد والمحسوبية والفتن والعنصرية حتى شغل البلطجيّة.. كله منك كل همك تبقى عينى رايحة جاية وإنت تخطف من إديَّا والغريبة إنى فاهم كل حاجة بس وبنفس السذاجة هيَّه.. هيَّه كل مرّة بشرب المقلب تملّى واتكسف وأقول ب ذُلّى «حلوة منك» واعترف لك.. إنها دخلت عليّا