جوزك على ما تعوديه.. الخروجة وسنينها

تقعد السِّت مستنية الويك إند علشان تخرج مع جوزها وولادها، بَس طبعًا الخروجة دى مش بتبقى على هوَى الزوج اللى غالبًا ما ‏بيفضّل القاعدة فى البيت على الكنبة.
لكن الوضع معكوس هنا لأنها بتنتظر الويك إند بَس مش علشان تقعد على الكنبة لا علشان تخرج وتتفسح معاه.
وطبعًا هو مش بيقدر على الدخول فى مواجهة صريحة معاها، فا بيقعد يسخف على كل الاقتراحات اللى بتقدمها السّت للخروج.
فا تقترح عليه يروحوا مطعم، يقول لها أصل المطاعم زحمة وأكلهم مش حلو.
فا تقترح مول، يقول لها زحمة واحنا مش هنشترى حاجة.
طب نقعد فى الأماكن العامة يرد عليها إن الجَو مش مناسب.
ويبتدى يقول لها إن البيت هو الملاذ الآمن وأنه أفضل خروجة.. صدقنى ده مش أنسب حل للموضوع ده لأنك ممكن تاخد بوز ‏يقعد معاك أسبوع علشان الخروجة اللى فشلت.
فا بلاش الطريقة دى فى الخروجات علشان هى بتبقى فعلاً منتظرة اليوم ده علشان تخرج وتتفسح وهما ساعتين ممكن يعدّو ‏على خير وده أفضل من أسبوع نكد وبوز.. فا استحمل الساعتين، أصله مش عقاب دى خروجة.