بينى وبينك يا هالليل

هى واحدة من الأغانى الليّ فيها شجن عميق وكلمات مليانة أحاسيس، بتغنيها هدى حداد بصوتها الرائع الليّ بيحمل معاه مشاعر حزن وحب فى وقت واحد.
فى الأغنية دى الليل مش مجرد وقت فى اليوم؛ هو أكنه كائن حى بيحكى عن الحنين والوحدة وبيحس معانا وبنكلمه وبيسمعنا.
تجاوز الليل فى الأغنية صفته الزمنية ليصبح مكانًا للتفكير والتأمل والهيام أحيانًا، وهنا تتجسد الأغنية بكل الشاعرية والرقة الليّ بتظهر فى العلاقة بين الإنسان والليل.
الأغنية فيها تجسيد إنسانى مرهف لليل كوسيط بيوصَّل رسائل المتكلم للحبيب البعيد وكأنه حلقة الوصل وبوابة عبور بين العاشقين.
فى الأغنية بتقول هدى «بينى وبينك يا هالليل فى حب وغنيّة»، وهنا يبدو جمال الكلمات الليّ بتجسّد العلاقة بين المتكلمة والليل كحالة شعورية.
فالحب هنا مش بس شعور بين طرفين لكنه حالة من الغناء الداخلى اللى بيخرج من جُوَّه القلب.. الكلمات بتتناغم مع اللحن علشان تودّى المستمع لحالة من الطمأنينة مع لحظات من الهدوء وفى نفس الوقت الأغنية فى بعض الأحيان بتنتقل لمشاعر أكثر تعقيدًا زى الحزن والألم بسبب الفراق.
الرسائل اللى بتنتقل عبر الليل بتظهر الفكرة العميقة للشاعرية اللى بتعتمد على التواصل غير المباشر بين العشاق.. فى الأغنية فى جملة «تبقى إمرقلى عَ هاك الدار وقلو ما ينسانى»، كأن الليل هنا بيبقى شاهد على الحب وبيتجول فى المكان علشان يحمل رسائل مليانة بالذكريات. ده زى التواصل بين الأحباء لما بيكونوا بعيدين عن بعض.. وهنا الليل هو الرسول الغريب اللى بيحاول يربط بين الناس رغم المسافات.
أداء هدى حداد فى الأغنية مميز بصدق العاطفة الهادئة بَس الدفينة، هى مش بَس بتغنى الكلمات لكن عايشة فيها وبتدخل فى عمق معانيها. صوتها مش مجرد أداء تقنى لكنه تجسيد حقيقى للتجربة الإنسانية اللى بيمر بيها كل واحد بيفتقد حبيبه.. فى صوتها تفاصيل دقيقة من الشجن وانسجامه مع اللحن بيخلّى الأغنية مليانة بالعمق والهدوء، وده بيخلّى المستمع يحس بكل كلمة وكأنها جزء من حياته.
هى كانت قادرة بكل صدق توصّل مشاعر الضعف والحب والفقد بكل دقة، وده بيخلّى الأغنية مؤثرة أكتر فى القلب.
«بينى وبينك يا هالليل» مش مجرد أغنية رومانسية؛ بل هى حوار غير مباشر مع الليل، وهى تعبير عن الأحاسيس العميقة اللى جُوّه القلب فيها كثير من التواصُل الروحى اللى بيحصل من غير كلام.
وتظل كلمات الأغنية للأخوين رحبانى ولحن إلياس الرحبانى مع صوت هدى تخبرنا أننا جميعًا أصدقاء لليل وليس هدى وحدها…
بينى وبينك يا هالليل فى حب وغنية
على بابى بتقعد يا ليل ومنسهر ليلية
بينى وبينك فى أسرار وبتعرف أحزانى
تبقى امرقلى عَ هاك الدار وقلو ما ينسانى.