جوزك على ما تعوديه.. العيد فرحة.. بلاش نكد لو سمحتم

طبعا معروف أن العيد فرحة، بس ساعات الفرحة مش بتكمل نتيجة بوز الوقفة أو خناقة أول يوم العيد، طبعا دى ثقافات معروفة عندنا فى مجتمعنا المصرى.
أنا هنا بحاول أنبهكم علشان متقعوش فى فخ خناقة الوقفة لأنها فخ بيقع فيه أغلب الشعب ولو طلعت منه تلاقيك لبست فى فخ خناقه أول يوم العيد.
تحس أن العيد لازم يكون مصطحب بخناقة زيه زى الكحك والبسكوت.
فكبروا دماغكم وبلاش نكد ويا ريت الكلام هنا للرجل، أن تراعى مراتك ومتسبهاش ليلة الوقفة وتخرج تهيص مع أصحابك، ولو اضطرتك الظروف، ولو إنى معرفش إيه اللى ممكن يضطرك، اعمل حسابك أنك تخرجها أول يوم العيد وميقتصرش الموضوع على الخروجات العائلية سواء الست الوالدة أو الست حماتك.
شوية اهتمام ممكن يودوا العلاقة فى حتة تانية ويخلوا العيد جميل ومن غير بوز ولا خناقات.
فكرة الخناقة بتبدأ أول لما تشعر الست أنها كم مهمل، وأنه حيخرج ويسيبها وأنها حتفضل فى العيد لوحدها بالعيال فى البيت، ليه؟ يا تخرجوا كلكم يا تقسم وقتك يوم ليك ويوم ليها. وده مش علشانى ده علشانك لأنك لو قضيت العيد ببوز الست المصرية الأصيلة حتزعل جدا وحتكره يوم الوقفة اللى قررت إنك تنزل وتسيبها فيه لوحدها.