شحاتة أبو كف

لعبة كرة القدم هى اللعبة الشعبية الأولى فى معظم بلاد العالم وفى مصر.
ما بين أنك أهلاوى أو زملكاوى أو من أنصار أى فريق بتلاقى الناس عاملين تكتلات حول فريقهم المفّضل.
السينما طلع فيها عدد مش كبير أوى من الممثلين الليّ مثلوا دور لاعب الكورة سواء بشخصياتهم الحقيقية أو لأ.
فى فيلم «رجل فقد عقله» مثّل عادل إمام دور لاعب كرة مشهور اسمه زكى واسم الشهرة هو زيكو.
فى الفيلم بنشوف علاقة زيكو بأبوه أحمد سعد رجل الأعمال الكبير متعدد العلاقات النسائية وبيبرر لزيكو وأخواته ده بأن أمهم « فهيمة» الليّ قامت بدورها كريمة مختار غير مهتمة بنفسها خالص وإنها مهتمة بس بالبيت والولاد وجوزها طالع من الحسابات.
فى أحداث الفيلم أحمد بيتعرف على سوزى الفنانة الصاعدة وبيغرقها فلوس وبيوعدها بالجواز ولما زيكو بيعرف الموضوع ده بيضحى بنفسه ويتجوزها حرصًا منه على استقرار البيت وبيتخلى عن خطيبته كمان.
فيلم تانى قام فيه عادل إمام بدور لاعب كرة شعبية فى الساحات وهو «الحريف» وكان فيه بيقوم بدور فارس المهوس بالكورة وبيلعب كورة شراب وبسببها بيفقد وظيفته فى مصنع الأحذية وبنعيش معاه حياة المهمشين فى فيلم من أفضل أفلام السينما المصرية.
أما إكرامى حارس مرمى الأهلى فده ظهر فى كذا فيلم بصفته كحارس مرمى ومن أهمهم «يا رب ولد».
فى فيلم حديث نسبيًا بتدور أحداثه حول لاعب كرة القدم اسمه مالك، أو «لوكا» الليّ بيعترض والده على فكرة امتهانه كرة القدم وبيحاول يقنعه يشتغل معاه فى المطبعة بتاعته.
وبتستمر الأحداث وبيحترف لوكا الكورة وبيلعب فى الأهلى وبعدين المنتخب وبعدها نادى ڤالينسيا.
أما «غريب فى بيتى» فده الفيلم الأشهر على الإطلاق لحد لعب دور لاعب كورة وهو هنا فى الفيلم ده كان «شحاتة أبو كف» الليّ قام بدوره نور الشريف.
قصة الفيلم بتتكلم عن شحاتة القادم من الصعيد والموهوب جدًا فى الكورة وهو نجم فريق الزمالك.
لما بينقل للقاهرة النادى بيجيبله شقة مفروشة بس صاحب الشقة بينصب عليه وبيبيع الشقة له ولست تانية عايش معاها ابنها.
وفجأة شحاتة والست دى بيلاقوا نفسهم عايشين فى نفس البيت وكل واحد منهم معاه عقد أنه صاحب الشقة.
الفيلم تم إنتاجه 1982 وكتبه الراحل وحيد حامد وأخرجه سمير سيف وهو الفيلم الأبرز فى السينما المصرية الليّ اتكلم عن عالم الكورة وتحديدًا نادى الزمالك.
يظل شحاتة أبو كف رمزا للزملكاوية كلهم وخصوصًا أنه فى الفيلم كان لا يُهزم وبجيب أجوان زى الرز وبيعلق عليه الجمهور الآمال العريضة للفوز على منافس الزمالك المعتاد.. النادى الأهلى.
بما أنى زملكاوية لازم أقول أن شحاتة أبوكف هو من ألطف الزملكاوية فى السينما وفى الحياة.. ولذا دومًا وأبدًا سنظل أوفياء.