عبد الرحمن الأبنودي للمخلوع الجديد وجماعته المحظورة : «من كتر خوفنا عليك.. شوفنا ريس تانى»!

مكانش بيبات فيها جعان.. دلوقتى نشفت تنشيفة
ضرايبنا رايحة على الإخوان.. وشبابنا مش لاقى وظيفة
داير يبيعنا للترك والفرس.. ومفيش بيعة ملهاش عمولة
بيقولوا دا اللى هيفتح القدس.. هى القدس يابنى إزازة كوكاكولا؟
لو منهم لأتغر.. الأهداف أنجزوها.. والقدس صَبَحِت حر من كتر ما حرروها
وش الغروب ما يترسم غير بالشفق.. يمشى الشفق يستفرد الليل بالبلاد.. وما يقتل الحرية غير داء الزهق.. وما تتقل أحلامكم غير بالاعتياد مؤامرة متخططة تخطيط غريب ومريب.. راسماه أمريكا بخط حويط ومش باين.. الضبع يعمل حمل والكلب يعمل ديب.. وملكش فيه دور رئيسى إلا لو خاين
رصوها رصة الإبل وهللوا فى العرض.. ودنسوا كل قيمة وكل زعقة بأجر
لو تحشدوها آلاف إحنا نبات الأرض وإحنا التمرد وإحنا بوابات الفجر
لسه واطى القصر وانت لسه خايف.. علّى علّى كل ما تعليه بيوطى أو كأنه الهدير الجاى للشعب اللى زاحف.. الحيطان مهما تعلى أوطى منه
فى الحرب ما يتقتل إلا اللى بص وراه.. ولا ينتصر على العدو إلا اللى نفسه طويل.. وياما زحف الشعب غيّب شموس لطغاة.. كان فى اعتقاد الجميع غروبها من المستحيل
راجل عجوز زينا ولحيته شبرين.. الشر شحنه بطاقة كره شيطانى.. واقف بيدعى علينا ''«عصبة الكافرين''» رجله فى مصر لكن إيده فى بلد تانى
وهيعملوا اللالى يا خلى.. لكن على مين؟.. الشعب حافظ ألاعيبهم وقاريهم.. عاملين أئمة وأهل نصوص وفتوى ودين.. هما قتلة ولسه الدم فى أديهم من بيوت الطين وجدران الصفايح ساعة الساعة تلاقينى طلعت حافى.. لا تصدق سكتتى أنا مهر جامح فى ثوانى هانطرك من فوق كتافى
لو حتى راح تنزل لوحدك انزل متقولش احنا كام وهما كام.. هتافك الصادق أكيد هيزلزل قلب الزمن ويعدل الأيام
عندى حل لكن لئيم وخبيث يبطل الثورة من السلمية.. ارموا مولوتوف وسطنا يا رئيس وابتدى أحكامك العرفية
امنع البنزين وشلّ المدينة.. برضه هيكونوا هناك فى الميعاد.. هى دى الحيلة يا أبو راس تخينه؟ كل ما تعاند هنزداد فى عناد
وشعبنا مش لاقى العيش.. واللى محدش بيحاسبه غضبان أوى علشان الجيش عرف الطريق تانى لشعبه
ويا ريس المركب يا حلاوتك ياللى سواقتك عجبانى.. من كتر خوفنا على راحتك هنشوفلها ريس تانى.. هنشوفلها ريس تانى.