عروستي

2 16 الاستوديو نهار داخلى
المكان مرتب يوسف جالس أمام لاب توب. خادمة تضع مج نسكافيه.
عطيات: أنا خلصت الشقة. يلزم خدمة تانية؟
يوسف: لا آدى نسخة م المفتاح عشان ما تجيش تصحينى.
الخادمة تخرج ويوسف يتحدث لنفسه.
يوسف: لما نشوف الموقع دا فيه إيه؟
على الشاشة دمى لنساء. يوسف يقرأ المكتوب.
يوسف: اختار عروستك المفضلة بنفسك.
مربع الماسينجر على الشاشة وبه صورة زهير.
زهير: بتعمل إيه يا جو؟.
يوسف: لقيت ع النت موقع بيعرض نسوان للبيع.
زهير: يعنى إيه؟
يوسف: عرايس لعبة بس زى الطبيعى بالظبط بتفتح وتغمض وتقول «أى لف يو» وعمرها ما تقول « نو».
زهير: لا يا شيخ؟ زى الطبيعى بالظبط؟
يوسف: بالظبط. بس طبعا ما بتحبلش
زهير: طمنتنى. وشكلها إيه؟
يوسف: عندك كذا نموذج نقى واختار. سمرا شقرا طويلة قزعة مكلبظة معصعصة.. مقاس صدرها ووسطها وأردافها.عايزها رومانسية.. فاجرة.
زهير: واخترت أنهى فيهم؟
يوسف: وأنا أتهبلت؟ أعمل علاقة مع لعبة؟. دا رزق الهبل ع المكبوتين.
زهير: وإيه اللى دخلك ع الموقع دا ؟
يوسف: كنت بدور على فكرة ألطشها عشان إعلان البارفان.
على الشاشة صورة دمية تشبه فتاة الحلم.
زهير: طيب هنشوفك الليلة؟ ألو.. ألو..
يوسف: لنفسه وهو يكبر صورتها. هى دى.
مزج بطىء
71 شارع يوسف ليل خارجى
شخص بملامح آسيويه يصل بموتوسيكل وعليه علبة بحجم كبير كتب عليه
(دليفرى) شديد ونعيمة يخرجان من سيارتهما. فيسأل بلكنة أجنبية.
المندوب: من فضلك مستر يوسف ساكن هنا؟
البواب: الدور الرابع.
المندوب: «ثانك يو».
شديد: هياكل كل اللى فى العلبة دى لوحده؟
نعيمة: ماهو الراجل اللى مالوش ست يضطر ياكل من بره أكل زبالة.عشان تحمد ربنا.
شديد يرفع يديه بالدعاء كأنه يدعو عليها.
18 الاستوديو ليل داخلى
يوسف يخاطب لوحة لجوجان.
يوسف: لا مؤاخذة يا عم جوجان. أنا مش هدور على حب زيك وأقطع ودنى عشان واحدة ست. يضع زجاجة ويسكى وكأسين ويخفت الإضاءة.
يوسف: سونيا.. مونيا كله محصل بعضه. عيش حياتك يا يوسف.
مستدركا.. أنا مش هبطل أكلم نفسى؟ إيه الهبل اللى أنا فيه دا؟
جرس الباب يدق. يفتح فيرى المندوب حاملا العلبة.
يوسف: أنا ما طلبتش أكل ديلفرى.
المندوب: سيادتك أنا مندوب شركة العرائس.
يوسف: لحقتوا تيجوا بالسرعة دى؟ أنا طلبتها من أسبوع بس أمال فين طلبى؟
المندوب يفتح العلبة ليخرج منها دمية لأمراة بثوب بسيط لكن بلا رأس.
يوسف: أمال فين راسها ؟
المندوب يخرج رأس الدمية ويركبها.
يوسف: متحسسا ذراعها دى زى ما تكون ست بجد.
المندوب: ما تفرقش عن أى ست و بتتكلم فى حدود المئة كلمة اللى تختارها. أسألها عن اسمها.
يوسف: اسمك إيه؟
الدمية: تبتسم وتفتح عينييها. اسمى سلوى.
يوسف: منبهرا. أنا فعلا طلبت يسموها سلوى.
الدمية: دون أن يتحرك فمها. أنا أحبك كثيرا جدا يا يوسف .
يوسف: بذعر. هى هتكلمنى بالفصحى؟!
المندوب: تقدر تخليها عامية .برمجتها سهلة خالص. تدوس زر التسجيل وتنطق الكلام هى تخزنه وتكرره بصوتها ووقت ما أنت تحب.
يوسف: طب أشرح لى طريقة التشغيل قوام.
المندوب: يسدد نحوها ريموت . إيزى خالص. كدهOn وضع التشغيل وكده Off وضع الإيقاف.
يوسف: طب وأوضاع النوم؟! بهزر طبعا.
المندوب: يزيح شعرها فتظهر شريحة صغيرة. الشريحة اللى فى قفاها دى السوفت وير بتاعها تخزن فيها أى معلومات تحب ترجع لها زى مواعيدك. الكلام التى تحب تقولهولك.
يوسف: لخص. ما لهاش كتالوج؟.
المندوب: أوف كورس.'الدى فى دى'' عليها طريقة التشغيل والصيانة.
يوسف: يأخذ القرص. خلاص أنا هشغلها بنفسى.
المندوب: عايز تختلى بعروستك؟ أوكى. ما تنساش كل ليلة تحطها فى الشاحن دا.
موبايل يوسف يرن ويجد اسم سونيا فيغلقه فورا.
المندوب: خارجا.. على فكرة العرايس دى ممنوع دخولها مصر.
يوسف يتحسس وجه الدمية ثم ذارعيها وخصرها.
يوسف: ورينى جمالك. جسمك طرى وملبن يا بت الأيه.
يقلبها على ظهرها ووجها يقذف بها لأعلى ويلقفها.
يوسف: يشد شعرها.. يخرب عقلك يا سلوى.
الدمية: نعم يا حبيبى.
يوسف: يقرصها فى خدها. لا دا أنتى تجننى.
التليفون يرن. وصوت سونيا عبر الأنسر ماشين.
سونيا: موبايلك مقفول. أنا طالعة. افتح لى قبل الجيران ما يحسوا.
يوسف يطفئ النور. صوت طرق.يحمل الدمية لغرفة النوم ويغلق الباب بهدوء.
19 طابق يوسف ليل داخلى
سونيا تطرق الباب.صوت الجرو ينبح. شديد يفتح الباب ونعيمة خلفه.
نعيمة: عايزه مين يا شابة؟
سونيا: عايزه جو.
شديد: يتأملها بشهوة ومش
مكسوفة من جسمك؟!
سونيا: مترنحة وبثمالة. هو مواعدنى.
نعيمة: أهو ما بيردش عليكى. تلاقى عنده واحدة فاسقة زيك.وكمان سكرانة؟ أمشى.
شديد: يمسكها ملتصقا بها تمشى إيه ؟ والله ما سايبها غير لما أجيب لها بوليس الآداب.
نعيمة: تبعده عنها. طب أوعى أنت أيدك.
20 نوم يوسف ليل داخلى
على اللاب توب صورة الدمية وتعليق بالشرح كتعليمات الطيران.
الصوت: حالة التسلية واللهو. حالة ذرف الدموع. حالة قفل العينين
الدمية تذرف دمعة. تفتح عينيها وتغمضها. الخ
الصوت: طريقة تسجيل الكلام.
ينظر للشاشة ويضغط زرا فى قفاها.
يوسف: هاتى قفاكى عشان اسيفك. عند سماع كلمة سلوى يكون الرد. أنا بحبك قوى يا يوسف.
يضغط الريموت. سلوى.
الدمية: أنا بحبك قوى يا يوسف.
يوسف: هايل.. سلوى.
الدمية: أنا بحبك قوى يا يوسف.
يوسف يضحك. تقلد ضحكته. يصطنع صوت بكاء فتقلده.
يوسف: يضغط الريموت مرات. كده أضحكى..كده عيطى.
الدمية تضحك وتبكى. يوسف يضحك ثم بأشفاق.
يوسف: لا ما تعيطيش يا حلوة.
الصوت: استخدام برنامج التوقيت.
يوسف: نظبط التوقيت على الساعة سبعة. صباح الخير يا حبيبى. أصحى عشان تفطر وتروح الشغل يا روحى. ياللا أشتغلى يا سلوى.
الدمية: صباح الخير يا حبيبى. اصحى عشان تفطر وتروح الشغل ياروحى
يوسف: الله على رقتك.يقبلها. بس ما تفهميش غلط.أنا يا دوب هعمل بيكى إعلان. نسجل اللى بعده.
الصوت: حالة الاستخدام الجسدى.
يوسف: ضاحكا. يا ساتر. أعوذ بالله.
التليفون يرن والأنسر ماشين يعمل.
زهير: من الاسبيكر. جو. رتبت لكم بارتى المزز عندى بكره.
يوسف: مزز مين؟ السهرة بكره عندى. محضر لكم مفاجأة أخر حاجة.
زهير: نسوان برضه؟
يوسف: آه بس مش هحرق المفاجأة دلوقت. باى. للدمية. ياه الوقت معاكى يجرى هوا.
يضعها على كرسى ويبدأ خلع ملابسه.
يوسف: عيب يا بنت غمضى عينيكى. يوجه الريموت لها فتغلق عينيها. تصدقى قعدت أنا وحنان شهرين كل واحد ما يقلعش قدام التانى لحد ما خدنا على بعض؟
يوسف: تصبحى على خير يا سلوى.
الدمية: وأنت من أهله يا حبيبى.
يوسف يبتسم ويحضن الوسادة ويطفئ النور.
12 نوم حنان ليل داخلى
ساعة الحائط بالصالة تدق الثانية .حنان تسير جيئة وذهابا. تدخل بطبق
وكانز عصير.
تضع الطبق على طاولة وتأكل منه بيدها وهى واقفة وتشرب العصير وتوقعه على ملابسها. وفى نفس الوقت تتصل بالموبايل نسمع الرد بأن الخط مغلق فتلقى بالطبق والكنز أرضا.
حنان: كلكوا صحبات فاشلين. ولا واحدة فيكم صاحية؟
فى السرير تطفئ المصباح المجاور. تضع الوسادة فوقها.
تنظر للوحة كبيرة
لوجه طفل وتحته الدبدوب على كرسى ثم تنام. صوت فتح باب.
حنان: نائمة تغمغم.أنت جيت يا يوسف؟.
تتحسس بيدها الفراش. ترفع رأسها فترى عينين تبرقان فى الظلام.
حنان: تهب مفزوعة. يا ماما..
تضىء المصباح فتجده عينا الدبدوب. تسترد أنفاسها و تضحك. تدفن رأسها فى الوسادة.
حنان: تبكى بصوت عال. تعاليلى يا مه.
22 نوم يوسف نهار داخلى
يوسف نائم. صوت الدمية من خارج الكادر.
الدمية: صباح الخير يا حبيبى.
يوسف: يغمغم بنصف وعى. هه ؟ طيب.. طيب.
الدمية: أصحى عشان تفطر وتروح الشغل يا روحى.
يوسف: يفتح عينيه. مين؟
الدمية: صباح الخير يا حبيبى.
يوسف: صباح الفل ع الفل.إيه الحلاوة دى؟
الدمية: اصحى عشان تفطر وتروح الشغل يا روحى. صباح الخير يا..
يوسف: يسكتها بالريموت. دى فهمناها خلاص. ما تعرفيش تعملى نسكافيه حتى؟
أمال لزمتك إيه ؟. بس قوليلى إيه رأيك فيا؟
الدمية: أنت كويس يا يوسف أنت سيد الرجالة .بس ما حدش فاهمك. ما يهمكش من حاجة.
أبتسم بكره هيبقى أحسن من أمبارح.
يوسف: يحتضنها. وأنا عبيط أظهرك على حد؟ أنتى ليا أنا لوحدى.
الدمية: أنت جميل قوى يا يوسف.
يوسف: بجد ؟ طب نفسك فى إيه ؟
الدمية: بوسنى يا يوسف.
يوسف: إيه دا؟ شفايفك بطعم الفراولة.
الدمية: ما تنساش تغسل سنانك يا يوسف.
يوسف: يضربها على مؤخرتها. برافو أنك فكرتينى.
يلقيها على الفراش فتتعرى ساقيها.
يوسف: تجحظ عيناه. بت.. بطلى شقاوة ع الصبح.
23 الأستوديو نهار داخلى
يوسف يظهر يضع الريموت على المائدة ويدخل الحمام. عطيات تدخل من الباب.
عطيات: صباح الخير يا سى يوسف.
يوسف: طلسئى الصالة بسرعة لحسن مستعجل النهارده.
عطيات: حاضر.
تمسك الريموت وتوجهه للتليفزيون فتسمع صوت الدمية.
الدمية: أنا بحبك قوى يا يوسف.
عطيات تتحرك باتجاه الصوت فتلمح من باب النوم سيقان الدمية العارية.
يوسف يعود مسرعا ليأخذ منها الريموت.
يوسف: ما تلعبيش فى حاجة. بعصبية. أنتى لسه ما خلصتيش الشقة؟!
عطيات: بخبث. خلصت! أرتب أوضة النوم ؟
يوسف: يغلق الباب. مترتبة. وأنا مش نازل غير لما تخلصى. من هنا ورايح كفاية يومين فى الأسبوع. ولا أقولك كفاية يوم.وهاتى مفتاح الشقة.
عطيات: تغمغم متنهدة. ناس لها بخت.
42 نادى الصيد نهار داخلى
مروه تأتى بحركة كاراتيه صارخة. نكتشف أنها تدرب مجموعة أطفال.
حنان رانيا ونجوى فى صفوف الأهالى الذين يتابعون أطفالهم. حنان شاردة تنظر بلهفة للأطفال وتقرقض أظافرها.
نجوى: بيقولوا فيه محل جديد فتح جنبنا مليان هدوم ترى شيك.
رانيا: طيب ما تيجى نشوفه بعد ما مروه تخلص التمرين.
جرسون: حضراتكوا تحبوا تاخدوا حاجة ؟.
نجوى: اتنين نسكافيه. عايزه إيه يا حنان؟.
حنان: شاردة وبتوتر. عايزه أتباس. عايزه حد يبوسنى!.
الجرسون تسقط منه الصينية ويبتعد.
رانيا: وطى صوتك بلاش فضايح.
حنان: هو مش من حقى أتباس يا ناس؟.
نجوى: أمال أنا أعمل إيه؟ الراجل بيسافر ويسيبنى بالشهور.
رانيا: شوفوا الوليه ..وهو حد حايشك؟ .
نجوى: اتجوزى يا حنان ما فيش أحسن م العفة.
حنان: والجوز دا ألاقيه فى أنهى سوبر ماركت؟.
رانيا: بس قوليلى مواصفات الراجل اللى عايزاه وأنا أخلقهولك.
حنان: راجل أقوله بوس يبوس.غور يغور. ضحكنى يقولى نكت.أخرس يخرس.
مروه: وقد وصلت. لا دا أنتى عايز لعبة بزمبلك.
حنان: ناظرة للأطفال. أهم حاجة أقوله عايزه أخلف, يحبلنى. المنيل على عينه غضب عليا أمنع الخلفة وحرمنى م العيال.
مروه: أحمدى ربنا العيل كان هيربطك بيه.أنا خلصت هنصيع فين النهار دا؟.
رانيا: حسن ابن خالتى جاى وهيوصلنا. بعربيته مطرح ما نحب.
حنان: ناهضة يبقى بالسلامة أنتم أنا مروحة.
25 مكتب يوسف نهار داخلى
يوسف جالس إلى مكتبه شاردا.
زهير: إيه المفاجأة اللى محضرها لنا عندك الليلة ؟.
يوسف: مرتبكا.هه؟ أنت صدقت؟ أنا كنت بهزر.
زهير: يعنى هتسهر معانا الليلة؟ .
يوسف: لا أعفينى ما ليش مزاج للنسوان.
سونيا تدخل وتقبل يوسف فى خده.
سونيا: كده تفرقعنى وأقف على باب شقتك والجيران يهزأونى؟ .
يوسف: أسكتى حصل لى ظرف طارئ و اسألى زهير.
سونيا: مصدقاك. وحشتنى موت.. موت.
يوسف: مصدقك. وأنتى كمان وحشتينى.
سونيا: أجى لك الليلة عشان تصورنى؟ .
يوسف: لا هكلمك بعدين. معلهش عشان هنا مكان شغل ومديرنا راجل بشع.
ويأخذها للخارج ثم يعود.
زهير: حد تيجى له النعمة ويرفسها؟ .
يوسف: لقيت مش هى اللى كانت فى خيالى.
زهير: يبقى ما اتبسطتش منها.
يوسف: ولا انبسطت من نفسى.
زهير: مش تقضى الغرض والسلام ؟.
يوسف: الظاهر أنى لسه رومانسى, بدور ع الحب وبشحته والحب عمرى ما هلاقيه لأنه سراب.
زهير : أكبر صح لكن تعيش من غير نسوان إزاى؟ هتعتمد على نفسك؟
يوسف: ضاحكا.لا عيب يا راجل.
زهير: أمال لما تتعب تعمل إيه ؟ .
يوسف: آخد حمام بارد واحضن المخدة.
زهير: وهى الوسادة الخالية تغنيك عن مرتبة طرية؟ .
يوسف: يا سيدى لما أتزنق قوى آخد مهدئ.
26 محل ملابس نهار داخلى
يوسف يتفرج. نجوى ورانيا بالمحل يلمحانه فتراقبانه خفية.
يوسف يشير للبائعة على ملابس عارية فتأتى بها.
يوسف: ألاقى بقى عندكم لبس منقبة؟
البائعة: بدهشة. أفندم؟.
يوسف: احتياطى ما حدش عارف الظروف.
يعاين ملابس داخلية حريمى ثم يتحدث لمجموعة سيدات.
يوسف: رأيك المقاس دا مناسب؟.
سيدة: بتسخيف. علشان حضرتك؟.
يوسف: أيوه. لا قصدى للآنسة بتاعتى.
سيدة 2 : هى لسه آنسة؟.
يوسف: لا قصدى المدام يعنى.
سيدة 3 : بسخرية. هى المدام مكسحة؟.
يوسف: النسوان بقى وشها مكشوف كده ليه؟!
27 الاستوديو نهار داخلى
يوسف يدخل بأكياس مشتريات الدمية.
يوسف: هاى يا سلوى. يشغل الريموت تجاهها.
الدمية: وحشتنى.اللحظة اللى بتغيب عنى ما لهاش طعم ولا معنى.
يوسف: وأنا الظاهر عليا هصاحبك. شوفى جبت لك هدوم إيه؟ وكل أنواع الماكياج عشان نبتدى الشغل م النهاردة. هيه جاهزة؟.
الدمية: أنا خدامتك يا يوسف.
يوسف: سلوى حبيبة مين؟ .
الدمية: أنا حبيبة يوسف.
يوسف: طيب هزرنا كتير نشوف شغلنا. هخليكى أشهر بنت فى المنطقة العربية.
البنت اللى يحلم بيها أى راجل. اقلعى بقى عشان تقيسى. بعد لحظة. ما قلعتيش ليه؟! مستدركا. يعنى لازم أنا اللى أقلعك ؟. يبدأ خلع ملابسها. ما تبصليش عشان أبحلق فيكى براحتى. وما تفهمنيش غلط دا عشان أصورك بس . يتحسس ذراعها.
صحيح أنا وأنتى لوحدنا والشيطان شاطر لكن ولو!.
28 شقة شديد والأستوديو نهار داخلى
شديد يهم بغلق النافذة ثم ينتبه. من وجهة نظره يرى يوسف يخلع للدمية ملابسها. الصورة تبدو غائمة لضعف بصره.
شديد: نعيمة تعالى شوفى الفضايح.
نعيمة : بتقول إيه؟
شديد: لا و لا حاجة. لنفسه أحسن. عنك ما شوفتى.
يوارب الشيش وينظر. يوسف يضع السوتيان للدمية.
شديد: بحسد. يا ابن الفاجر.
يوسف: بتحبينى يا سلوى؟ .
الدمية: أنا بعشقك.
يوسف: نفسك فى إيه؟ .
الدمية: أحضنى وبوسنى يا يوسف.
شديد: بغيظ. يا بنت الفاجرة.
يوسف يقبلها. الكلب ينبح كأنه مغتاظ مثله.
29 استقبال حنان ليل داخلى
حنان بجلباب وقد أهملت مظهرها.
رانيا: دا اشترى كمان بورايك وأدوات ماكياج وسوتيانات وأندر وير.
حنان: كنت متأكدة أن فيه مرة وسخه فى حياته. وإلا ماكنش تف عليا السافل أكمنى ضربته بالشبشب!.
نجوى: الرجالة كلهم كده يا حبيبتى.
حنان: طظ. يشبع بيها.بس إيه رأيكم بقى أنا قررت اتجوز قبل منه.
نجوى: كنت أنا عرفت أتجوز بعد المرحوم.
حنان: أنا شابه وحلوة وعندى شقة يعنى ألف من يتمنانى.
رانيا: العريس موجود مش هتدورى.
حنان: بتستهبلى؟ عايزه تقرطسى جوزك وتعملينى برافان .جايبه لى قريبك اللى ماشيه معاه عشان تجوزهونى؟ .
رانيا: بضيق. أنا ماشية معاه؟ .
حنان: أمال بتعملى إيه لما جوزك بسيبك بالشهور؟ بتحطى أيدك على خدك وتغنى أنا بستناك؟ .
رانيا: أخص عليكى طب والله ما أعرفك تانى. ياللا بينا يا نجوى.
حنان: هتسيبونى لوحدى؟ طب استنوا لما تيجى مروة.
نجوى: إذا كنتى ناوية تتجوزى يبقى الأحسن ترجعى تعيشى مع أهلك
حنان: عشان يشمتوا فيا؟ دول قاطعونى لما اتجوزت زفت. وانكسفت أقولهم أنى اطلقت.
نجوى: يبقى ما تشتكيش م الوحدة. أمليها براجل لحد ما تتجوزى. باى.
حنان غفت على الأريكة فى إضاءة خافتة. صوت فتح الباب وصوت أقدام.
لقطة لحذاء رجالى يخطو متسللا. يد تحسس عليها وصوت رجالى.
الصوت: إيه القمر دا؟.
حنان: تصحو بفزع مين؟
تظهر مروة بحقيبة ملابس وفى فمها سيجارة.
مروة: مالك مرعوشة ليه ؟ مش أنتى اللى اديتنى المفتاح؟
حنان: لاحظى أنى عايشه من غير راجل.
مروة: بصوت رجل. يا حبيبتى. بسيطة قولى لى يا عباس.
حنان: ليه؟ أنا أقدر اتجوز فى ظرف أسبوع وقبل ما سى زفت يتجوز.