دقن الحاج حسن.. ومطربة كفر مصيلحة!

لطيفة
الفنانون الذين كانوا يلفون حول الحاج مبارك، كما يلف المشايخ حول مقام سيدنا الولى، ويقيمون له الموالد وحفلات الزار، ويسرحون على القهاوى بالربابة، ينشدون سيرته العطرة وعلى كتافه يجفوا صجرين.. ياصلاة الزين على مبارك ياصلاة الزين، ويحلفون على المصحف أنه أجدع من محمد على، على الأقل.. كفاية الكبارى اللى مالية البلد، وإنه خلص على إسرائيل لوحده بعون الله مازالوا مصرين على عدم الاعتذار، مع أنهم ببساطة يستطيعون أن يقولوا إنهم كانوا مخدوعين فى هذا النظام الفاسد المنحط، لكن للأسف.. البعض منهم قلع بدلة التشريفة، ولبس الجلابية والبلغة وقالك.. أرضنا العطشانة.. نرويها بدمانا، على اعتبار أننا شعب أهبل وعنده زهايمر، زى الزعيم عادل إمام، الذى لم يترك مناسبة واحدة، إلا وأعلن أن جمال مبارك.. هو أجدع واحد بيسوق ميكروباص الوطن.. وهو أنا خلفت غير جمال، وبعد الثورة.. قالك.. أنا مع الثورة يارجالة.. والحاجة عفاف شعيب اللى بعد ما الثورة اتكسحت.. وأولاد أخوها كلوا البيتزا والريش بالهنا والشفا.. طلعت تناضل فى المسلسلات، هى وتمورة اللى قعد يعيط فى الميدان ياقلب أمه، لحد ما بقى ماشى فى الشارع ينادى.. جهاد.. أنت فين ياجهاد؟!
حسن يوسف
البعض الآخر.. وهو الأكثر غرابة، مازال يدعى البطولة، ويؤكد أنه فيه تار بايت من زمان بينهم، لأن الحاج مبارك.. سمم له المواشى بتاعته، فالحاج حسن يوسف خرج علينا مؤخراً وأعلن أن مبارك كان بيكرهه لأنه مربى دقنه، تقولشى مبارك ده كان حلاق، وكان عايش على البقشيش بتاع الحاج يوسف، ولما خلع منه.. بقى قاعد ينش قدام الدكان؟! وبعدين.. لما هو كان بيكرهك ياعم الحاج، خرجت ليه أيام الثورة، وقلت أن العيال دى بتاكل كنتاكى وبتقبض بالدولار، مع أنك راجل بتاع ربنا ياأخى، والحاجة شمس البارودى قالت إنها مكسوفة ياضنايا تقول أنها مصرية من عمايل العيال السودة، قلها ماتزعلش نفسها قوى كده لحسن تعيا وتبقى تقول أنها إيرانية، ويادار مادخلك شر.. والحاجة لطيفة التى ظهرت فى برنامج كش ملك مع هبة الأباصيرى، وأعلنت صارخة ولا عصام الشوالى، أنها لم تغن لرئيس ولا لملك فى حياتها، وعندما سألتها هبة عن أغنية اخترناك، والتى غنت فيها كفر مصيلحة.. روحه السمحة.. أدب ومصالحة.. مش متكبر.. لكن أبسط خلق الله.. علشان كده احنا اخترناه، قالتلك.. أنا ماكنتش باغنى للريس.. أنا كنت باغنى لكفر مصيلحة.. ودى فيها ناس كويسين قوى، مش الريس بس!! شوف ياأخى.. واحنا اللى ظلمناها، وكنا فاكرينها بتغنى لمبارك.. أتاريها بتغنى لكفر مصيلحة.. وبعدها إن شاء الله هاتغنى لكفر الشيخ، احنا فعلاً آسفين ياست لطيفة، وكفاية أنك ماغنتيش ماما سوزان ياماما سوزان.. كلك رقة وذوق وحنان.