الشيطان متسلسل فى رمضان.. أومال أنت مين؟!

أنا بابا يلا

هذه الحكايات، حكايات من وحى خيال الكاتب والرسام، وليست لها أى علاقة بالواقع الجميل، حكاية أب شايف المصلحة وعارفها وفاهمها.. ما هو كان جاى لما الباقى كان لسه هيروح! أومال إيه؟!
غصب عنه، مش بخاطره، رافض يسيبهم يجربوا بحريتهم، خايف عليهم حتى من نفسهم، أما أولاده.. لأنهم لسه رايحين فمش فاهمين، عايزين يجربوا، عايزين يفكروا بنفسهم لنفسهم.. وهنا تبدأ الحكاية.

وليد: منة.. هو فعلا الشيطان بيتسلسل فى رمضان؟!
منة: آه أكيد.. ليه؟!
وليد: أصل أنا بحس أن عندى أفكار شيطانية لسه حتى واحنا فى رمضان أهو.
منة: يعنى إيه أنا مش فاهماك؟!
وليد: يعنى ما بيجيش فى دماغك تفطرى وتشربى وكده؟!
منة: لأ مش بيجيلى.. إزاى يعنى؟!
وليد: طيب ما حدش بيستفزك وتبقى عايزة تخبطيه على راسه تقسميها نصين وخصوصا واحنا صايمين ومش طايقين نفسنا!
منة: لا.. بقول اللهم إنى صائمة!
وليد: يا سلام .. ده إيه البرود ده؟!
منة: برود إيه يا ابنى أنت.. هو ده المفروض.. نمسك أعصابنا عشان ما ناخدش ذنوب.
وليد: يعنى حد يستفزك ويضايقك وأنت تسيبه.. ليه ملاك؟!



منة: يا ابنى أنت فى رمضان.. يعنى روحانيا لازم تبقى أهدى أنت إيه ما بتذاكرش دين؟!
وليد: ما تغلطيش طيب
منة: أنا غلط فى إيه دلوقتى.. هو أى تلاكيك؟!
وليد: لما تقولى ما بذاكرش دين.. يبقى غلط ولا مش غلط؟!
منة: ما هو أنت كأنك ما تعرفش دينك بجنيه!
وليد: الله.. ليه كده يا منة، كل ده عشان بسألك؟!
منة: يا أخى ما أنت غريب ومستفز!
وليد: أنا عملت إيه حرام عليكى.
منة: يا أخى حرمت عليك عيشتك.. أنت إيه؟!
وليد: شايفة أهو.. شيطانك قدر عليكى.. إزاى بقى متسلسل؟!
منة: لا بقى.. أنت الشيطان نفسه والله



وليد: طيب إزاى أنا مش متسلسل؟!
منة: عشان شيطان على هيئة إنسان.. أقوى من الشيطان الحقيقى.
وليد: أنت بتغلطى تانى أهو.. الله يسامحك
منة: والله.. دلوقتى افتكرت ربنا؟!
وليد: ربنا فى قلبى.. بس أنت شيطانك غالبك!
منة: أنت الشيطان نفسه .. يا مستفز.. يا..
وليد: يا منة اهدى.. أنت صايمة واحنا فى الشهر الكريم.. كده غلط.
منة: اخرس مش عايزة أسمع صوتك.. كلمة كمان وأجى أكسر راسك!
وليد: أنت إيه يا بنتى.. ما بتذاكريش دين؟!
منة: وليد.. بطل استفزاز.. يا مستفز.
وليد: أنا هادى أهو.. صلى أنت على النبى وقولى اللهم إنى صائمة.
منة: اللهم صلى عليك يا نبى وإيه رأيك بقى هفطر عليك وهبقى أطعم المساكين.
وليد: الله ده شيطانك.. طلع أفجر من شيطانى.. استعيذى بالله يا بنتى
منة: أعوذ بالله منك يا أخى.. والله إنك شيطان فعلاً أول مرة أفقد أعصابى فى رمضان.
وليد: السؤال بقى لما الشيطان متسلسل.. ده يبقى مين؟!