كافيه تاباسكو واحد من أحب الأماكن ل قلبى كافيه نضيف شيك أسعاره معقوله تكييفه عالِ فيه أكل شرقى «يعنى ملوخية» وأكل غربى والأهم إن متاح ل الرواد لو عايزين يقعدوا يشربوا حاجة من غير أكل يعنى تقدر تروحه والحالة صعبة تقدر تروحه والدنيا مبشبشة عشان تاكل تقدر تروحه مع ضيف «على الأدق ضيفة» تطلب بيكاتا أو شامبينيون ب صوص الحرندق لكن تبقى الميزة الأهم أنه كان جنب عدد كبير من مقار شركات الإنتاج والجرايد والمكاتب يعنى السبابيب اللى الإنسان بيسترزق منها حيث تصادف فى سنة 12 وسنة 13 إنى ارتبطت ب أعمال مع كذا جهة مقرها فى شارع مصدق كدا عرفنا إن تاباسكو هناك شارع مصدق موازى ل شارع إيران شارع إيران موازى ل شارع التحرير فى الدقى أوكى التحرير وعارفينه إيه بقى إيران؟ وليه فيه شارع ب اسمها؟ ثم لما نعرف إن مصدق إيرانى تبقى الحكاية لافتة ل الانتباه لازم نفتش عن القصة دى طلبت من إحدى الجهات الأمنية تقريرًا وافيًا عن الموضوع دا ما هى البلد مش سايبة البلد دى قانون والقانون دا هو أنا فجاءنى التقرير التالى: «كان ياما كان فى سالف العصر والأوان طيار سايق طيارة جى بيها مصر قادمة من إيران على متنها رئيس الوزراء الإيرانى محمد مصدق كنا سنة 1951 أيام حكم الشاه فى إيران الطيار دا خاف ينزل فى مطار القاهرة القديم لما لقى أمة لا إله إلا الله محاوطة المطار أمم كتير أوى ترش الملح ما ينزلش لكنه قرر النزول المقرر لما جت له تطمينات من كل الجهات مصدق كان فى استقباله عشرات الآلاف ب قيادة مصطفى النحاس باشا النحاس كان وقتها ألغى معاهدة 36 مع الإنجليز وبدأ فى تحريض المواطنين على مقاومة «الاحتلال» أهو دا اللى يتقال عليه سبحان الله مش لما تشوف سمكة ب راس ديك ل إن الأستاذ النحاس باشا كان حبيب الإنجليز كلنا عارفين إنه سنة 1942 بريطانيا أجبرت الملك فاروق على قبول النحاس رئيسًا ل الحكومة إنما زى ما قال نجم «ما تحطش المصالح ما بين خاصم وصالح» فى نفس ذات نفس الوقت كان مصدق عامل نفس الحاجة مقاومة بقى والاستقلال التام والموت الزؤام بس المقاومة هناك كانت عشان خاطر الزفت اللى هو النفط اللى هو البترول اللى هو الدهب الأسود والخط الأحمر اللى يتعداه يبقى عليه العوض ومنه العوض النحاس دعا مصدق ل زيارة مصر ب حيث يعنى نقول إن مصر وإيران إيد واحدة فى وش الإنجليز صاحب دا استنفار شعبى ل استقبال الزعيم الإيرانى بعد استقباله الأسطورى فى المطار راح مصدق مقر إقامته فى فندق شبرد حيث يوجد الفندق فى شارع إبراهيم باشا دلوقتى الشارع اسمه الجمهورية وشبرد اتشال راح مكان الحالى وقف مصدق يخطب فى الجماهير المحتشدة لكنه ما يقدر يقول جملتين على بعض وغلبه التأثر ف بكى وتقرر إن خطبة مصدق ل الشعب المصرى تبقى ب الليل عبر أثير الإذاعة المصرية «دى ربما تكون فرصة كويسة نحكى حكاية الأثير دى بعدين» المهم خطب مصدق وبقى اسمه فى المحروسة زى الطبل لفت الأيام الملك شال النحاس والظباط شالوا الملك دا هنا فى مصر أما فى إيران فضل مصدق يصعد مواجهته ل الإنجليز «اللى كان معاهم الأمريكان والسوفييت كمان» فى ملف البترول وأصدر قرارًا ب تأميم النفط الإيرانى والعالم اتكهرب وصلت الذروة يوم 16 أغسطس 1953 الشاه حاكم إيران كان فى صف الإنجليز ومصدق معاه الشعب/ الشارع/ الميادين الثورة خرجت المظاهرات الحاشدة مؤيدة ل مصدق وقراراته هرب الشاه من إيران طلع ع العراق منها على إيطاليا بعد ما مضى قرار ب تعيين رئيس حكومة جديد الإنجليز والأمريكان قالوا ما بدهاش السى آى إيه تولى الموضوع تحت قيادة ظابط مخابرات أمريكى اسمه روزفلت «غير الرئيس طبعًا» روزفلت حط خطة ل عملية سماها العملية أجاكس سى آى إيه خطة عملية يعنى الموضوع خد ب الظبط 3 أيام اتدك بيت مصدق فى طهران اتقبض عليه اتحاكم رجع الشاه كل دا فى 72 ساعة آه والله 72 ساعة طب والشارع؟ والميادين؟ والثورة؟ الشوارع موجودة الميادين محتشدة الثورة مستمرة إنما المظاهرات المرة دى ضد مصدق ومع محاكمته اتعزل مصدق اتسجن ثم اتحط تحت الإقامة الجبرية فى قريته الصغيرة اللى جه منها ل حد ما مات سنة 1967 كويس يعنى اللى سمى شارع مصدق ب هذا الاسم هو مصطفى النحاس باشا؟ لا حضرتك الشارع دا فى حى الدقى اللى كان منطقة زراعية كبيرة هو والمهندسين والحتت دى عندى إعلان عن مساكن فى منطقة العجوزة ب اعتبارها فى حتة هادية بعيدة عن العمران كومباوند يعنى فى التجمع الخامس بتاع أياميها ثم لما بدأت أفئدة من الناس تهوى إلى المنطقة وكان أبرزها عيلة صعيدية مشهورة اسمها عيلة الدقى ف بدأ التخطيط إنها تبقى منطقة سكنية وكان فيه نية إنها تتسمى الفؤادية على اسم الملك فؤاد بس اتسمت ب اسم العيلة الشهيرة الشارع دا اتسمى شارع الشاه والشارع الموازى له اتسمى إيران لما الأميرة فوزية أخت الملك فاروق اتجوزت رضا بهلوى الإيرانى وفضل اسمه الشاه ل حد ما قرر عبد الناصر يسميه شارع مصدق أيوه ليه عبد الناصر يسميه كدا؟ أيون علشان تجربة التأميم اللى هو ب يسوق ل التأميم ب اعتبار إن تجربة مصدق بس مصدق ما نجحش إحنا نجحنا ه تلاقى على الشبكة العنكبوتية «الإنترنط» إن تغيير الشارع من الشاه ل مصدق حصل سنة 79 ه تلاقى مواقع كتير كاتبة كدا ما تصدقهاش صدقنى أنا أنا اللى كنت ب أقعد هناك فى تاباسكو جنب السبابيب دلوقتى ما عادش فيه سبابيب والأهم إنه ما عادش فيه تاباسكو باعوه ل الناس ملاك مطعم أبو السيد مين أبو السيد دا بقى؟ إيه دا؟ داخلين فى 900 كلمة كفاية كدا أوى النهاردا فوتكم ب العافية. •
