اختراق

عمرو الليثى : بسم الله الرحمن الرحيم مساء الخير مرمر زمان يا زمانى مرمرهو عنوان قصيدة ساخرة للشاعر بيرم التونسى وجاء فى أبيات منها :
" البنت ماشية من زمان تتمخطر**** والغفلة زارع فى الديوان قرع أخضر
والعطفة من قبل مفتوحة **** والوردة من قبل الفرح مدبوحة "
بيرم كان يتحدث عن زواج الملك فؤاد بنازلى ومولد الملك فاروق والشائعات التى كانت تتردد عن علاقات نازلى قبل الزفاف هى إذن ملكة مثيرة للجدل وهذا الجدل هو موضوع حلقة الليلة بين الملكة والملكة الأم بعد الفاصل
فاصل
عمرو الليثى : الملكة نازلى ليست ككل الملكات تعرضت للشائعات منذ بداية حياتها وحتى الممات وأرسل حول سلوكها الكثير والتساؤلات وخاصة فى مجال تعدد علاقاتها فهل صحيح أن الملكة نازلى هربت يوم عقد قرانها على الملك فؤاد مع ش . ش الذى أشار إليه الكاتب محمد التابعى بالحروف الأولى من إسمه ماهى حكاية القصيدة التى كتبها بيرم التونسى فى زواج نازلى ولماذا قامت زوجة أحمد حسنين بطباعة هذه القصيدة توزيعها نكاية فى نازلى ما هى حكاية نازلى وأعمال السحر وقراءة الطالع هل كانت نازلى ملكة تسير وراء غرائزها هل كان الملك فؤاد دائم الاعتداء على الملكة نازلى بالضرب حتى أنه كان يضربها بالكورباج هل أثارت الملكة نازلى نار الغيرة بين الفرسان الثلاثة الذين أحبوها ، ولماذا قتل أحمد حسنين باشا رئيس الديوان الملكى ومن كان وراء مقتله ولماذا حاولت الملكة نازلى إبعاد أسمهان عن مصر وكيف تحول رياض غالى من خدمة الملكة إلى أقرب المقربين لها ثم زوجا لأجمل وأصغر بناتها كيف انقلب رياض غالى على الملكة الأم وصفعها والأميرة الزوجة فقتلها هل كانت فتحية تخطط للعودة إلى مصر قبل قتلها على يد زوجها
فاصل تقريرى
أميمة إبراهيم : الملكة نازلى هى الزوجة الثانية للملك فؤاد هى ابنة عبد الرحيم باشا صبرى مدير مديرية الزراعة بالمنوفية والذى أصبح وزيرا للزراعة بعد زواج فؤاد من ابنته أمها توفيقة هانم إبنة محمد شريف باشا رئيس وزراء مصر الأسبق والملقب بأبى الدستور أما جدها لأمها الكولونيل الضابط الفرنسى الذى تولى إعداد الجيش المصرى فى زمن محمد على واعتنق الإسلام وأصبح اسمه سليمان باشا الفرنساوى ، تزوجت نازلى من فؤاد وهى فى ال25 عاما أنجب منها فاروق ثم فوزية وفايقة وأخيرا الأميرة فتحية
د/عاصم الدسوقى : الأميرة نازلى هى بنت عبد الرحيم باشا صبرى وهو أحد الشخصيات المصرية اللى هم لما بيبقوا على علاقة بالأسرة المالكة بياخدوا مناصب ووظائف هو كان متزوج من واحدة اسمها توفيقة حفيدة ابراهيم باشا ابن محمد على فطبعا ده هنا جزء من الأسرة لما بيحصل نسب بتتفتح السكة للوظائف طبعا كان مدير فى المنوفية لمدة 4 سنين من سنة 1513 لسنة 1517 كان وزير الزراعة وكان محافظ القاهرة بنته ولدت فى سنة 1894 فى يناير عام 1894 من حظها السيئ إن جدتها توفيت وهى صغيرة جدا وكانت توفيقة هانم دى أوصت صفية زغلول اللى هى مرات الزعيم سعد زغلول برعايتها فهى تقريبا عاشت معظم وقتها وهى اقتصادية صغيرة فى مشدة فى بيت سعد زغلول اللى هو بيت الأمة حاليا
فاصل
عمرو الليثى : كانت نازلى قبل أن يخطبها الملك فؤاد كانت تعيش فى بيت سعد زغلول بعد وفاة أمها وفى هذه الأوقات تقرب منها ابن اخت الزعيم سعد زغلول وقيل أنها وقعت فى حبه
د/عاصم الدسوقى : وهى صغيرة واقتصادية وشابة فطبعا بييجى زوار عند بيت سعد زغلول فتعرفت على سعيد زغلول ده ابن أخت سعد باشا زغلول اتعرفت على حد ثانى اسمه شريف شاهين وشاهين ده برضه شخص مصرى اللى هى برضه من الأسر الشرسة اللى موجودة فى مصر وأشار له الكاتب محمد التابعى فى كتابه الأساس فى السياسة بحرف شين شين برضه ساعات كان فيه اتصال بين شريف شاهين ونازلى لما كثرت الشائعات بعد كده على شريف شاهين يوم خرج سعيد زغلول من حلبة السلاح اللى موجودة
فاصل
عمرو الليثى : انتى أشرتى إلى أن الملكة نازلى لم تكن زيجاتها من الملك فؤاد هى الزيجة الأولى إنما كانت مطلقة قبل الزواج منه دى معلومة الحقيقة أنا أول مرة أعرفها
الإعلامية / راوية راشد : دى معلومة محدش يعرفها الحقيقة المعلومة دى عرفتها وأنا ببحث فى شخصيتها هى اتجوزت السلطان فؤاد سنة 1919 هى اتجوزت الملك فؤاد وهى كان عندها 27 سنة إزاى امرأة جميلة وسليلة حسب من القاهرة فازاى تقعد من غير جواز واحنا عارفين إن جداتنا كانوا بيتجوزوا وهم عندهم 12 و13 سنة فده اللى خلانى أدور على فترة شبابها يعنى كل المعلومات اللى وصلت لها إنها سافرت باريس رجعت عندها 17 سنة وبعدين اتجوزت وهى عندها 25 سنة طب فى الفترة دى راحت فين فمن خلال بحثى وقعت على كتاب لكاتبة إنجليزية إسمها كلارا جوينت اكتشفت إن الملكة نازلى بعد عودتها من باريس قريب والدتها توفيقة هانم انت عارف طبعا مين توفيقة هانم إبنة شريف باشا كان رئيس وزراء مصر فقريب لشريف باشا اسمه أمين سليم جاء مصر وكان بيستثمر فلوسه شاب برضه متنور وأوروبى إسمه خليل عنده حاجة وعشرين سنة فاتجوز الملكة نازلى أو نازلى هانم اتجوزها سنة واحدة وتم طلاقها بالضبط بعد 10 شهور لأن هم الاثنين كانوا نموذج للشباب اللى هو يعنى أوروبى شوية بعيد عن تقاليد المجتمع المصرى الولد بيلعب ورق وبيشرب وبياخدها فى أماكن أجنبية ده أزعج عبد الرحيم باشا صبرى وأصر على الطلاق وفعلا تم طلاقها بعد 10 شهور ورجعت تانى قصر والدها عبد الرحيم باشا صبرى وفضلت إمرأة مطلقة من سن 17 لسن 25 لغاية بالصدفة البحتة قابلها الملك أو السلطان فؤاد فى هذا الوقت
د/ عاصم الدسوقى : فيه بقى تعرف أو علاقة بينه وبين الملكة نازلى وبين فؤاد السلطان فؤاد بس المصادر لا تفصح عن كيف تم التعرف بين الاثنين كان فيه تعرف تم وفيه لقاءات تمت خصوصا إنها من الأسرة المالكة يعنى هى أمها حفيدة إبراهيم باشا ونفس أمها جدها سرور باشا اللى هو كان أبو الدستور
فاصل
عمروالليثى : فى اليوم الذى تقرر فيه عقد قرانها على الملك فؤاد هربت نازلى من قصر أبيها مع قريب لها وهى القصة التى أشار إليها الكاتب محمد التابعى وهى أن قريبها أراد الزواج منها لكنه أعادها لقصر أبيها
د/ عاصم الدسوقى : الراجل بقى العلاقة بقى مع شريف شاهين كانت مستمرة هى طلبها السلطان أحمد فؤاد قبل أن يصبح ملكا ، عقد الزواج بينه وبين نازلى كان شريف خدها وقعد يذهب من بيت لبيت من بيوت أصدقاؤه أو أقارب الأسرة ولكن فى الآخر بعد ما زهق من عملية الهروب من مكان لمكان رجعها إلى القصر الملكى حيث يتم عقد الزواج خوفا من البطش به
فاصل
د/ عاصم الدسوقى : هى نفسها لم تكن تستنكر فؤاد كشخص وبعدين فيه فرق بينها وبين فؤاد فى السن فؤاد لما طلق مراته الأولى اللى هى شويكار هانم 1898 كان هى عندها 4 سنين كانت نازلى عندها 4 سنين وقت ما طلق فؤاد شويكار هانم فطبعا شخصيته واسمه معروف لدى الخاصة أخو شويكار نفسه ضرب فؤاد بالنار لأنه بيسيئ معاملة أخته فى النادى الدبلوماسى اللى هو نادى محمد على بس ما كانش فى المكان الحالى كان ما بين قصر النيل وما بين عدلى كان النادى هناك فإذن سيرته وخلقه سيئ ومسمع فى وسط العيلة مش معقولة نازلى كانت توافق إنها ترتبط بهذا الشخص السيئ السمعة والأخلاق لكن لما أصبح سلطانا وأصبح الأمر فى إيده طلبها للزواج
فاصل
عمرو الليثى : تمت ليلة الزفاف على الملك فؤاد فلما أنجبت مولودها الأول فاروق بعد 7 أشهر أثارت قصيدة الشاعر بيرم التونسى ضجة كبيرة وجاء فى القصيدة :
ربك يبارك لك فى عمر الغلام **** ويا خسارة بس الشهر كان مش تمام
د/ عاصم الدسوقى : تم عقد القران فى مايو 1919 طبعا سنة 1919 أحداث فى مصر أحداث ساخنة ثورة 19 كانت موجودة ابتداء من 9 مارس وهناك مشكلات الوفد اللى اعتقل فى مالطا ثم نقل إلى باريس وإلى لندن ومفاوضات من هنا وهناك فالظرف نفسه اللى تم فيه عقد القران ظرف دقيق وظرف مثير وظرف غير مناسب ولكن يبدو من تداعيات الأحداث بعد كده إن فؤاد أثار أن يعجل بعقد القران خشية افتضاح الأمر لأنه الزمن مش وقته وبعدين كانت تقول المراجع إن حفل الزواج كان يحضره عدد قليل جدا جدا فمن هنا بدأت خروج الشائعات أكثر وأكثر
فاصل
د/ عاصم الدسوقى : ومن ضمن كمان الشائعات هى أن هناك علاقة تمت ما بين فؤاد وما بين نازلى قبل هذا الزواج اللى أكد بقى الشائعات دية ولادة فاروق اللى حصلت فى يناير سنة 20 بعد 7 أشهر من هنا الكلام بدأ يتردد بقى إن تمت علاقة بين فؤاد وبين نازلى وساعتها بيرم التونسى الشاعر اللى هو ناقم جدا وساخر وإلى آخره خلد هذه الواقعة فى قصيدة قصيدة زجلية هى مرمر زمانى يا زمانى مرمر الكلمات مرمر على أساس المرمر يا زمانى مرمر من المرارة يعنى البنت ماشية من زمان تتمخطر والغفلة زارع فى الديوان قرع أخضر فطبعا البنت دى إشارة لنازلى والغفلة إشارة لفؤاد على أساس إنه طرطور يعنى فى المكان الكلام ده فى حد ذاته بيبين حاجات كثير بس المصادر صامته فى هذه الجزئية هل العلاقة دى كانت بين فؤاد ونازلى اللى هى الثمرة دى وللا بين شريف شاهين ونازلى يعنى مش معروف على وجه الدقة وهذا يفسر لنا المعاملة السيئة التى كان يلقاها فاروق وهو صغير من أبوه وكذلك أخته
فاصل
عمرو الليثى : وهنا بدأت رحلة المتاعب حيث كانت حياة العزلة التى فرضها فؤاد على نازلى على مدى 17 عاما هى تجربة زواج الملكة نازلى من الملك فؤاد وظلت نازلى سكينة الموت وقيل أن الغيرة كانت السبب فالملك كان يكبر نازلى ب20 عاما
د/ عاصم الدسوقى : فكان تعليمات فؤاد لرئيسة الوصيفات إنها مين اللى جاء النهاردة مين اللى زارها مين اللى ما جاءش واللى عايز يزورها الأول يقدم طلب وهى تكتب الأسماء سواء من الرجال سواء من السيدات بتعرض الأسماء عليه آدى الأسماء اللى عايزين يجيئوا لمقابلة الملكة فهو يشطب على ناس ويوافق على ناس فأصبحت سجينة ده على طول من بعد الزواج من بعد الخلفة يعنى
الإعلامى / أحمد السلمانى : البعض بيتعتبر إن المعاملة القاسية والشديدة والقمعية للملك فؤاد لزوجته الملكة نازلى تبرر سلوكها أثناء الملك وبعد وفاته ده كلام فارغ والتماس عذر فى غير محله الملكة نازلى لم تكن فى مستوى القصر ولا تليق أن تكون السيدة الأولى لممكلة مصرية ولا زوجة للملك فؤاد وبالتالى وقتها كان معظم الستات المصريات يخضعن للقهر وكان الزوج رجل قوى جدا فى هذا الوقت نجيب محفوظ صور كل المجتمع بكل طبقاته وحتى طبقة البشوات كان فيها الزوج فى قوة شديدة وكانت المرأة منكسة فى عموم الثقافة المصرية فلم تكن نازلى استثناء فى تعامل الملك فؤاد زوجها معها لكنها كانت استثناء فى أنها لم تكن مؤهلة لهذه المكانة ولا لقيادة هذا القصر ولا أن تكون زوجة لملك قوى ومؤسس لتاريخ مصر مثل الملك فؤاد لا يبرر تعامل الملك فؤاد السلوك غير المسئول للملكة نازلى لم تكن إنسانة مسئولة وكان اختيارا خاطئا منذ البداية
فاصل
د/ عاصم الدسوقى : استطاعت الوصيفة دية تعمل مقابلة بين نازلى وبين صحفية أمريكية إحدى الصحفيات الأمريكيات هى أخفت الإسم عن فؤاد كانت بتبعت له اسماء الناس فأخفت إسمها عن فؤاد فمعرفش إنها قابلت نازلى فى فبراير سنة 22 وحكت بقى نازلى الهوان اللى هى عايشة فيه إزاى هى المفروض إنها ملكة وعايشة فى القصر وهى عايشة فى قفص ولا تشعر بأى قيمة لها كإنسانة يعنى حكت فضائح وإن فؤاد ده كان كل شوية من غير مناسبة يضربها بالكورباج من غير مناسبة مع إن مفيش أى خبر راح من رئيسة الوصيفات إن هى قابلت فلانة أو حتى لو عرف إنها بصت من الشباك وكان فيه حد من الحرس تحت يديها تحية كده فيها تهديد بعد الحديث ما نشر فى نيويورك تايمز بعد ما نشر هذا الحديث هى صحفية أمريكية بعد ما نشر هذا الحديث عرف الملك فؤاد راح سجنها فى قصر القبة تماما لا تخرج تماما نهائيا من سنة 22 حتى مات سنة 36
فاصل
الإعلامية / راوية راشد : الملكة نازلى يعنى وقفت جنب فاروق وصارعت بضراوة لإستلامه للعرش هنا بنتكلم عن علاقة أم بإبنها مبدأ التوقعات فى علم النفس إن لما الأم بتدى كثير وبتضحى كثير من أجل إبن من أبنائها بتتوقع وفى البداية كانت العلاقة بينهم هم الاثنين فى غاية القوة بدليل إنه قبل زواجه طلع لها أمر ملكى بتنصيبها صاحبة الجلالة هى كانت ملكة مصر ولكن لا تحمل لقب صاحبة الجلالة صاحبة الجلالة الملكة نازلى الملكة الأم احنا فى البداية طبعا ما كنتش عارفة إيه الفرق بين إنها ملكة وبين إنها صاحبة جلالة لا ده فيه فى البلاط الملكى المصرى أو فى أى بلاط صاحبة الجلالة لها مخصصات معينة لها أداء معين لها تشريفات معينة لها يعنى سكرتارية بحاشية لأن صاحبة الجلالة لها أوامر ملكية ففى البداية كان الملك فاروق شديد الاقتراب والاعتزاز بأمه وكانت هى مصدر من مصادر قوته ده أزعج جهتين الحاشية وأزعج أيضا الأسرة العلوية فى اعتقادى ومن خلال تتبعى لما حدث تاريخيا نجد إن حصل أكثر من مرة عملية ضرب هذه العلاقة
فاصل
عمرو الليثى : بعد وفاة الملك فؤاد تحولت نازلى إلى شخصية مختلفة تماما فانطلقت وراء عواطفها وتعددت علاقاتها فتحدثت العائلة المالكة عن 3 فرسان فى حياتها وهم الضابط عمر فتحى ، وكذلك عزيز المصرى ، أما الثالث فهو الفارس الذى امتلك قلبها كان رئيس الديوان الملكى أحمد حسنين باشا
د/ عاصم الدسوقى : لما فؤاد مات كان عندها 42 سنة ، 42 سنة دية زى ما بيقول الروائى الفرنسى هى اكتمال الأنوثة عند المرأة شوف بقى خارج من رحلة كلها عذاب ومشقة ولا متعة ولا أى شئ من الحياة يعنى لو واحدة عايشة فى عشة فقيرة مع واحد فقير زيها سعداء بيبقى أحسن الحياة فى القصور اللى هى عايشة فى قصر من الذهب يعنى فمن هنا بدأ يدخل فى حياتها هذه الأسماء الثلاثة ثلاث أسماء اترددوا فى الفترة دى لإن من بعد 36 ؛ عمر فتحى ده أحد الضباط اللى كانوا بيرافقوا فاروق لما كان طالب فى البعثة لما بعتوه من آخر 35 يدرس عسكرية فى بريطانيا فكان معاهم عمر فتحى وأحمد حسنين وعزيز المصرى عمر فتحى كان أصغرهم كان أصغر سنا عشان مرافقته لهم يعنى أحمد حسنين ده بيربيه لها وعزيز المصرى ده كان أحد رجال الجيش العسكرى للمصريين اللى كانوا بيقدموا لجيش الأفراد زمان
فاصل
د / عاصم الدسوقى : ظهر فى حياة نازلى الاثنين دول من واقع الحرمان ده اللى كان موجود بدأت بقى تنظر إليهم نظرة الأنثى بقى يعنى واحد بيشتغل عندها الاثنين متجوزين أحمد حسنين مشكلته إن حتى مراته بنت شويكار طليقة فؤاد يعنى منسب وأبوه شيخ أزهرى ومراته إسمها أنيسة عمر فتحى برضه متزوج فبدأت هى بتضرب الاثنين ببعض تقول كلام لده وتقول كلام لده علشان تفوز بأحدهما يحصل منافسة بين الاثنين يعنى حاجات من اللى ممكن تتقال إنه من كيد النساء حاجات زى كده يعنى بالبلدى بتاعنا فعمر فتحى انسحب من الساحة واقتصرت المسألة على أحمد حسنين
فاصل
أميمة إبراهيم : أحمد حسنين سياسى مصرى لعب أخطر الأدوار فى حياة العائلة المالكة اشتهر برحلاته لإستكشاف الصحراء خاصة الصحراء الغربية فضلا عن وصف البعض له بأنه يجيد التعامل مع النساء كان مرافقا مقربا لولى العهد الملك فاروق فى رحلته الدراسية فى بريطانيا والتى لم تكتمل بسبب وفاة الملك فؤاد كما تولى منصب رئيس الديوان الملكى فى عهد الملك فاروق فى عام 1940 تزوج إبنة شويكار مطلقة الملك فؤاد وتزوج من الملكة نازلى أم الملك فاروق زواجا عرفيا بموافقة الملك فاروق توفى فى فبراير عام 46 فى حادث سيارة على كوبرى قصر النيل
د/ عاصم الدسوقى : أحمد حسنين كانت مشكلته إيه إن هو إنسان من اللى ممكن ينطبق عليه مواصفات اللى يقول لك عنده تطلع بوظائف أعلى من وضعه الاجتماعى
الإعلامى / أحمد السلمانى : علاقة الملكة نازلى بأحمد حسنين كلها قصاصات صحفية لا يوجد ما يؤكد هذه العلاقة كله من القصاصات الصحفية لغاية ما ظهرت بعض المذكرات كلام إنه تزوج لم يتزوج كانت معه لم تكن معه فى قصر الرماية ده كلام القصور إنما أحمد حسنين ده شخص شايف نفسه جان شخصية يعنى مهمة عند النساء واخد بطولات عالمية كان كشاف يروح يمين وشمال كان بيروح هنا وهنا فهو شخص يبان كفارس عربى وبالتالى جاذب للنساء لكنه شخص غير مسئول بالمرة ولم يقدرالمكانة اللى هو فيها واستغل الضعف النفسى الشديد للملكة نازلى فيمكن اعتبارإن من مقامات الرجولة الكبيرة إن يستطيع أحمد حسنين إنه يعلق فى ذهن الملكة نازلى
الإعلامية / راوية راشد : أحمد حسنين ما صحابش ماديا زى بقية الحاشية اللى كانت حواليه بدليل إن هو كان عليه ديون معينة علشان يقدر يتولى منصب نائب أو غيره فكانوا بيسددوا له الديون فحاجة كده تحس إنه لايحمل أى أطماع
فاصل
د/ عاصم الدسوقى : بدأ بقى الاحتكاك المباشربينه وبين نازلى بعد سنة أو أقل من سنة من وفاة فؤاد بعد أقل من سنة كده الترييحة للنفس والخروج من الحزن الخاص بالحزن على الملك فؤاد راحوا رحلة لسويسرا مين بقى معاهم ، معاهم أحمد حسنين رحلة بحرية تطلع نازلى تتفرج على المياة على الترابزين بتاع على المركب فهو يقف جنبها ويحط إيده على كتفها ويقول لها ماتبصيش كده يعنى إيه أشياء من هذا القبيل فبدأ الكلام يتنقل للصحف
فاصل
الإعلامى / أحمد حسنين : أحمد حسنين فى النهاية كان ذو منصب وكان لابد أن يحترم هذا المنصب ويعمل مع ملك كان لابد أن يحترم هذا الملك كان لابد ألا يسكت عن شائعات الخيانة التى تثار فى كل مكان عن علاقة أحمد حسنين والملكة نازلى
فاصل
عمرو الليثى : فى مطلع عام 1940 تعرف أحمد حسنين باشا على المطربة أسمهان وتعددت لقاءاته معها وعرفت الملكة نازلى بذلك فأجبرته على الابتعاد عنها وطلبت إبعادها عن مصر وانتظرت نازلى أن يطلب أحمد حسنين الزواج منها وعندما لم يحدث سافرت فى رحلة إلى المجر
د/ عاصم الدسوقى : سنة 40 أحمد حسنين اتعرف على أسمهان وكانت عايشة فى ميناهاوس فيروح يزورها إذا حتى ما لاقاهاش يسيب لها كارت إنه جاء ومالقهاش كده فتتصل به نازلى عرفت إنه على صلة بأسمهان فبرضه قالت له بطريق غير مباشر إبعد عن أسمهان فبعد عن أسمهان هو فهم إن دى إشارة إن هى عاوزاه أكثر مراته برضه عارفة القصص دى أنيسة هانم بس ساكتة ما بتتكلمش ففاروق بدأ ينضج أكثر ويعرف حاول يربط يكون الاثنين قاعدين مثلا مع بعض أحمد حسنين يقعد مع والدته فكان ييجى ما يلاقيش حد حاجات زى كده
الإعلامى / أحمد سلمانى : الملكة نازلى لم تكن مسئولة وجزء من عدم المسئولية هى المنافسة بينها وبين الأميرة أسمهان إن هى اعتقدت إن أسمهان هو كان مع أسمهان لإن أسمهان نفسيا لها وضع خاص وما بين ملكة مصر منافسة امرأتان أو سيداتان نازلى وأسمهان كان مضر بالمكانة المعنوية للمملكة هل أسمهان فى مكانة تضعها فى منافسة مع الملكة نازلى أسمهان أميرة ولكن أميرة فى ماذا أميرة فى ممكلة أد كده ممكلة الدروز هذه ممكلة صغيرة جدا أو إمارة الدروز الأستاذ هيكل قال لى إنها لاتمثل شيئا فى التاريخ وبالتالى هى أميرة شكلا هل أميرة شكلا تنتمى لإمارة محدودة للغاية لم يعترف بها أحد أن تنافس ملكة مصر الملكة نازلى زوجة الملك أحمد فؤاد و أم الملك فاروق على رأس المملكة المصرية طبعا ده دليل أن الملكة نازلى لم تكن تعرف من هى وماذا تملك وزوجة من وأم من الدليل أنها دخلت فى هذه المنافسة التى لا تليق أبدا لا عائليا ولا سياسيا ولا فى مقام الملوك مع الأميرة أسمهان أو المطربة أسمهان
فاصل
د/ عاصم الدسوقى : نازلى لما عرفت بعلاقة أسمهان بأحمد حسنين فأبعدتها عن مصر لكنها رجعت تانى رجعت ليه رجعت برضه بضغوط من المخابرات الفرنسية لأن فرنسا متحالفة مع انجلترا أثناء الحرب فهى دى المسألة لكن هم ما يعرفوش إن هى كانت متورطة فى علاقة مع المخابرات المتناقضة دى المخابرات الفرنسية والمخابرات الألمانية فى النهاية أن هذا التناقض أنقل هنا كلام وأنقل هنا كلام عميل مزدوج وينكشف فبيبقوا عايزين يخلصوا منه فده أحد يعنى شخص آخر أو جهة أخرى مرشحة لقتل أسمهان يا إما فرنسا يا إما ألمانيا ليس فقط نازلى 3 حاجات كون إن الفاعل مجهول أو قضاء وقدر معناها أن الفاعل معلوم ولكن لا توجد إشارة إليه
فاصل
عمروالليثى : وكما انتشرت شائعات اتصالات حسنين بنازلى فقد جن جنون زوجة حسنين باشا وأصبحت تشاهد الملكة نازلى فى بيوت العائلة المالكة وكبار العائلات فى مصر كما أعادت طبع زجل بيرم التونسى ووزعته فى الشوارع فما كان من نازلى إلا أن أجبرت حسنين باشا على تطليق زوجته
د/ عاصم الدسوقى : أنيسة زوجة أحمد حسنين لما عرفت بموضوع فكرة الزواج دى شهرت بنازلى راحت فى كل البيوت الملكية أو بيوت الأميرات أو الأمراء أو كبار رجال الدولة شوفوا نازلى العجوزة بالمعنى ده قعدت تقول يمين وشمال لكن مفيش فايدة فمن هنا تم تخييره بين الزواج بنازلى وطلاق أنيسة فهو فضل إنه يطلق مراته وده بيؤكد مسألة التطلع اللى عنده إنه زواجه بنازلى هيوصله لمرحلة أعلى
الإعلامية / راوية راشد : فاروق كان يعرف أنا بحلل السلوك يعنى الأم المصرية فى هذا العصر كانت شديدة ولها صطوة على أولادها فى النهاية هو ملك بس كمان فى النهاية هى أم ولكن طريقتها معاه كانت بتزعجه جدا فده اللى خلاه يفتح الباب للأعداء إنه يستمع للأقوال الحقيقة هو يعنى 23 سنة شاب عنده اعتزاز بنفسه حواليه كلهم هو ملك فى النهاية لما أمه تحب قريبه فده بيثير الإزعاج أو الغضب وكان متضايق جدا من طريقتها بدأ يفتح ودنه للآخرين هو على الصعيد الشخصى أصيب أكثر من نكسة فشل زواجه وأمه والضغوط السياسية الوحيدة اللى كانت محيطة به احنا بنتكلم على سنة 42 يعنى حادث 4 فبراير إجباره على تعيين مصطفى النحاس مرة أخرى شاب عنده 24 سنة يعنى كان فيه ضغوط جامدة جدا ما كانش بقى فيه حاجة إلا ضغوط داخلية شخصية وأنا هنا بلوم الملكة نفسها يعنى كأم إنها بتضحى أو بتتراجع أو تحاول تستوعب هذا الرجل الصغير بكل همومه وبكل مشاكله وانتهى الأمر بفضيحة أحمد حسنين باشا تضييق الخناق عليها يعنى لدرجة إنه كان بيحط لها ناس تراقبها أكثر من 24 ساعة يعنى أى امرأة فى الدنيا لا تحتمل هذا لا تحتمل آخرين يشككوا فى سلوكها يشككوا فى كرامتها فما بالك لو كان إبنها
عمروالليثى : فى أواخر عام 1948 سافرت الملكة نازلى القدس بعد أن اشتد الخلاف بينها وبين الملك فاروق بسبب علاقتها بأحمد حسنين باشا ونزلت فى فندق الملك داوود وبدأت أخبار مغامراتها تصل إلى مسامع الإبن الملك فاروق فطلب من أحمد حسنين باشا إقناعها بالعودة والسفر إليها لكنه تراجع وطلب من مصطفى باشا النحاس وقرينته هذه المهمة ونجحا فيها وعادوا بالملكة الأم التى صارحت إبنها برغبتها فى الزواج من أحمد حسنين باشا بعد إعلان هذه الرغبة أمام القصر كله وافق
الإعلامية / راوية راشد : الملك فاروق رفض سفرها وده كان بيؤلمها جدا فسافرت فجأة إلى القدس الناس كانت بتقول إنها عشان ترقص وتعمل الحقيقة اللى كاتباها كلارا كلويد الكاتبة البريطانية الست دى كان عندها فشل كلوى فلك أن تتخيل حجم الآلام اللى كانت بتعانى منها فأحد الأشخاص قال لها فيه منطقة فى البحر الميت بيندفنوا فيها فبيخفف الألم ده سبب سفرها للقدس ما كانتش عايزة ترجع
د/عاصم الدسوقى : راحت القدس فى 42 برضه هربا من الحياة اللى هى فيها دية وعدم الاستقرار راحت القدس ونزلت فى فندق الملك داوود فندق الملك داوود ده كان جزء منه للإدارة البريطانية أيام الاحتلال البريطانى هناك طبعا فيه ضباط انجليز والأخبار وصلت لفاروق إنها بتراقص الضباط الانجليز وتشرب وتلعب والحياة منفتحة فقال لأحمد حسنين روح هاتها أحمد حسنين خاف ليه بقى ما هو كونه يقول له روح يا أحمد يا حسنين معناه إن أحمد حسنين حس بإن فيه إخبارية عند فاروق اشمعنى اختاره هو وفيه هناك عشان يلبسه التهمة فأحمد حسنين رفض ينفذ الأمر راح فاروق لمين جاب النحاس وزينب هانم مراته وقال له يا مصطفى بيه يعنى يا باشا يا نحاس أمى نازلى انت عارف إنها وفدية بيشير لتربيتها فى بيت سعد زغلول وبتقدرك قوى انت وزينب هانم فتروحوا إيه صالحوها يعنى وهاتوها فراح النحاس ومراته زينب الوكيل وقابلوا نازلى قالت لهم آجى بس على شرط إن أنا آجى مصر وأدخل البلد يتعمل لى مراسيم استقبال ملكة رفض وقالوا لفاروق فاروق رفض و أوهموها بإن فاروق وافق هيعملوا إيه هو كل اللى عملوا فاروق عشان يسترضيها راح مسمى شارع رمسيس ده الحالى بشارع الملكة نازلى وجاءت الملكة نازلى ساعتها لقت الأمور ما اتغيرتش وأحمد حسنين ما اتحركش هنا بقى أصبح لا مفر من إن نازلى تطلب إنها تتجوز من أحمد حسنين فقالت لفاروق إبنها إنها عاوزة تتجوز أحمد حسنين وعاوزاه يوافق ففاروق قال لأحمد حسنين وده اللى كان عاوزه أحمد حسنين إن هو ما اتقدمش حتى لا يخيب أمله وما يبقاش متطفل لكن لما يطلب منه يبقى عنده هو نوع من الكرامة والعزة لإن هذه الفوارق الاجتماعية ولأن الرجل الحقيقة لم يرتكب معها شئ
فاصل
د/ عاصم الدسوقى : هو لما تزوج كان رئيس الديوان الملكى والزواج كمان كان عرفى الزواج عرفى وشهد عليه سليمان نجيب الفنان سليمان نجيب كان وقتها مدير الأوبرا وسليمان نجيب برضه من أسرة كبيرة قوى فشهد سليمان نجيب على عقد الزواج وواحد إسمه محسن مراد مراد محسن كان ناظر الخاصة الملكية
راوية راشد : الزواج ما بين نازلى وأحمد حسنين كان زواج عرفى كانت ورقة حتى أفتكر إنه كان بيقول دى ما تعتبرش نصيحة يعنى هو بيقول إن يوم وفاة يوم حادثة أحمد حسنين إن فاروق راح مكتبه وقعد يدور على الورقة بتاعت الجواز وكدة لا هو كان معروف إن فيه معروف فى محيط ضيق لكن الشعب ما كانش عارف فى نهاية الأمر يعنى أما بالنسبة لى فأشكك فى زواج الملكة نازلى من أحمد باشا حسنين لأسباب هقولها ما تردد يخلينا نحط سؤال إذا كان الملك عثر على وثيقة زواج لماذا لم يحتفظ بها ولماذا شاعة الموضوع
عمروالليثى : هو قيل إن من ضمن شهود العقد كان سليمان بك نجيب كان أصدقاء أحمد حسنين
راوية راشد : إذن احنا بنتكلم عن شخص قال فقال فقال أنا شوية بالتالى بتتبع نقطتين
عمرو الليثى : انتى مش متفقة على فكرة زواج أحمد حسنين
راوية راشد : رأيى الشخصى أن شخصية أحمد حسنين وأنا يعنى عاملة لها تحليل علمى فى كتابى هذا الرجل النبيل الأرستقراطى الذى صنع نفسه وهو ابن قرية مصرية ليكون أحد النبلاء في بلاط الملك فؤاد فأكيد شخصيته وسلوكه لا تتوافق مع روحه وسلوك الملكة نازلى وحالتها الصحية فى الفترة ما بين 1943 و1946 الفترة التى أصيبت فيها الإشاعة ما اعتقدش إن إمرأة عندها فشل كلوى ومدمرة نفسيا نتيجة تغيير العلاقة بينها وبين إبنها وبنتها على أطراف بلاد إيران بتعانى من آلام وتعاسة وأمراض إنها كانت تفكر فى الزواج
عمرو الليثى : أنتى ترى أن العلاقة بين أحمد حسنين والملكة نازلى علاقة لم تكن شرعية
راوية راشد : أعتقد أنها كانت علاقة غير شرعية
د/ عصام الدسوقى : هم يا دوبك 5 سنوات ومات أحمد حسنين قتلا بحادث سيارة على قصر النيل
فاصل
عبارة عن مشهد تمثيلى لمقتل أحمد حسنين باشا
د/ عصام الدسوقى : مات فى حادثة غامضة يعنى فى الزمن ده يعنى فى الروقان مفيش لا زحمة ولا العربيات نفسها ما كانتش سريعة يموت فى حادثة أكيد لازم تكون بفعل فاعل كان بيدور على فرصة الموجودة ما هو أنا لو فى وسط الزحمة دية محدش هيلومنى لكن أنا ماشى بقى بالليل بعد منتصف الليل الدنيا فاضية وبعد ما اتقتل أحمد حسنين جرى فاروق على مكتب أحمد حسنين فتش فتح الدرج فتش وفتح الأدراج ودور على العقد فتش ودور وجرى من المدفن راح على البيت طبعا هو اتنقل بقى عاش مع نازلى فى بيت أبوها اللى هو حاليا قصر اللى فى شارع عبد الرحيم صبرى اللى هو مكانه الحزب الوطنى دلوقتى قصر عبد الرحيم باشا حتى الشارع إسمه شارع عبد الرحيم باشا صبرى فلقى أمه قاعدة حاطة صورة أحمد حسنين بالحجم الطبيعى وحاطة عليها حزام إسود كده طرحة سوداء وعاملة مندبة تحت عمالة تعيط والجماعة الندابين الستات اللى معاها وكانت حزينة عليه تماما ما لحقتش هم 3 سنوات إلا حاجة بسيطة بعدها طبعا اسودت الدنيا بقى فى حياتها
فاصل
عمرو الليثى : لم يمض على زواج الملكة من أحمد حسنين سوى 3 سنوات وبضعة أشهر حتى لقى أحمد حسنين باشا مصرعه فى حادث تصادم على كوبرى قصر النيل فى 19فبراير عام 1946 كانت هذه السنوات هى الأكثر استقرارا فى حياة نازلى لتبدأ معها رحلة الهجرة إلى الخارج والتى شهدت أكثر السنوات جدلا فى حياة الملكة الأم ولم تعد أبدا إلى مصر مرة أخرى وأعتقد أن هذه المعلومات سوف نستطيع أن نلقى عليها الضوء فى الحلقة القادمة إن شاء الله فتابعونا