تصدق صح!

عينى عليك باردة، شايفك اليومين دول رايق، ورادد، وبرنس كدا ف نفسك.
- الحمد لله، ربنا هداني، وبطلت أحاول أقنع الناس ب حاجة، ولو حد متخلف، قال رأى عبيط، ب أعمل نفسى مقتنع، وأرفع حاجبى كدا، وأقول له: تصدق صح!
• بس دى سلبية، إحنا لازم نوعى الناس، ونعرفهم الصح من الغلط، والخير من الشر، لازم يبقى عندنا مبدأ ندعو له.
- تصدق صح!
• منشنوا بعض
منشن صاحبك، اللى هو مش صاحبك، ب تعرفه بس عشان المصلحة والظروف
منشن أمك من الأكاونت اللى عامل لها عليه بلوك
منشن أبوك ف العموم
منشن مراتك فى كومنت على بوست ل صاحبتك، ومنشن صاحبتك طبعا فى كومنت على بوست مراتك
منشن ولادك على بوست ف صفحة ما يصحش يعرفوا إنك عامل لها لايك
منشن زميلك فى الشغل اللى ب تزنبقه عند المدير، ومنشن المدير معاه فى نفس البوست
منشن مدرسك فى الفصل على بوست فى صفحة مدرسك الخصوصي
منشن حبيبتك فى أى حتة
منشنى جوزك فى جروب فضفضة ستات
منشنى حماتك فى صفحة ل بيوتى سنتر غالي
منشن أخوك فى بوست غامض تحته هاشتاج مقصودة
منشنى مرات أخوكى فى بوست عن الزوجة العاصية
منشن خطيب الجامع فى بوست كاتبه وإنت ب تسمع الخطبة ف صلاة الجمعة
منشنى جارتكم فى البوست المعتاد اللى ب تكتبيه عن خناقاتها مع جوزها
منشن مصر فى كل مرة ه تمنشن فيها حد من دول
وأكيد أكيد ما تنساش تمنشن نفسك
منشنوا بعض يا ولاد
منشنوا بعض