هادية وقوية.. ناعمة وكلها حنية!

الأم قالت لها: بقولك إيه الفرح اللى هنروحه فيه شباب زى الورد.. متقوميش ترقصى ولو لزم الأمر ابقى ارقص بكتفك بس!! الولاد بيحبوا البنت المحترمة الرزينة..
أختها وصفتلها: محمد فى الجامعة بيتقرب أوى أوعى تدلقى اتقلى على الرز.. الولاد بيحبوا البنت التقيلة..
صاحبتها قالت لها: أنا من تجربتى مع حسام اكتشفت أن الولاد عايزين بنت ضعيفة مش ند ليه تحسسه برجولته يقولها اعملى وتقول أمين.. متبقيش مسيطرة ولا قوية.. الولاد هيحبوكى وانتى ضعيفة..
وجارتها نصحتها: بصى لما تروحى أى تجمع فيه ولاد خليكى ناصحة ومش دقه قديمة.. اعملى نفسك فاهمة كل حاجه بس متقوليش تعليق.. الولاد بيحبوا البنت الذكية واللماحة..
ومنى صاحبة الكوافير شرحت لها: لازم تبقى مدردحة مش مقفله.. اضحكى حتى لو بصوت عالى فيها ايه.. ارقصى فى عيد ميلادك عادى يا بنتى الولاد بتحب ترتبط بالبنات النغشة مش البط البلدى!!
وأنا بقى من موقعى هذا أحب أقولكم اسكتى انتى وهى.. مش معنى أن لكل واحدة تجربة نجحت أو فشلت يبقى اللى عملتيه هو ده مطلب الولاد!! نصايحكم دى خلت أغلب بنات مصر مش مرتبطين، مطلقات، أو متزوجات وحياتهم باردة.. وجزء صغير أوى اللى نجح فى حياته لأنه ما سمعش كلامكم ولا نصايحكم..
وعلشان تعرفوا الولاد عايزنها ايه.. وبيحبوها ازاى.. يبقى الموضوع ده يخصكم ومهم ليكم أوى ولو انتى لسه ما مشتيش على الأشواك.. أقصد لم ترتبطى.. اقرى الموضوع هتفهمى وجهة نظر الولاد.. الكلام ده من على لسان ولاد كتير واحنا جمعناهم هنا.. ولأن الأذواق كلها مش واحدة حرصا منا على الجودة جمعنا أذواقا مختلفة.. وبعيدا عن التشبيه المجازى زى ما فيه ولاد بتشرب القهوة سادة فيه ولاد بتحبها سكر زيادة..
أما بقى عزيزتى لو أنتى متجوزة أو أنت متجوز فالموضوع ده مش ليكم خالص..
شخصية مستقلة
أحمد وردانى 25سنة، مسئول دعاية وإعلان: بما أنى ولد أقدر أقول رأى أغلب الولاد اللى أعرفهم طبيعى تبقى البنت اللى هيتجوزها عندها أخلاق.. واخلاقها ليس المقصود بها شكل لبسها أو شكلها الخارجى.. وإنما المقصود به أسلوب التعامل والسلوكيات اللى مبيختلفش عليها اتنين ومن هنا بيظهر اختلاف التربية من بنت لأخرى.. أنا شخصيا تانى حاجة بعد الأخلاق اللى كل الولاد متفقة عليها أحب البنت اللى ارتبط بيها تكون لها شخصية منفصلة.. بمعنى آخر متكونش تابع.. يكون لها رأى مستقل.. وتفكير مختلف.. أقدر آخد رأيها واستشيرها.. أغلب الولاد المتجوزين مبيخدوش رأى زوجاتهم لأنهم بيقولوا رأيهم زى عدمه لأن اجابتهم بتكون «اللى أنت تشوفه» طيب معندكيش عنين تشوفى معايا.. و بالوقت بيبطلوا ياخدوا رأيهم.. أحب شريكة حياتى يبقى لها وجهة نظر علشان الحياة بينا تبقى استشارة مش أوامر وبديهيات ومسلمات.
لا تصطنع الرقة
أحمد ممدوح 28سنة، صيدلى: نفسى اللى ارتبط بيها تكون بنت رقيقة مش مصطنعه الرقة والكسوف.. والبنات المصطنعة تظهر جداً وبتكون فاكرة إنها ذكية ومش باينة بس أحب أقولكم انتوا بتبقوا باينين أوى واحنا عاملين مصدقين.. وده سبب أنى لحد دلوقتى مش مرتبط.. لأنى مش لاقى بنت فيها رقة فى كلامها ورقة فى تعاملها وصوتها وأسلوبها.. ولا رقة فى لبسها.. البنات الأغلب اللى مغطين على باقى البنات هما اللى بيضحكوا ضحكة عالية، آسف فى اللفظ زى «المحششين» والبنات اللى طول كلامها مسترجلة وتتكلم «يا صاحبى ويا زميلى ويا كباره».. البنت دى حلوة كزميلة لأنها بتكون خدومة وجدعة بس مش هى دى اللى أتمنى أكمل عمرى معاها وهى واقفة جنبى بتضرب كفها على كفى مع أى نكتة وتقولى جامدة يارياسة!! عايز بنت تكون فعلاً بنت.. مش شكلها بنت وأفعالها ولد.
خفيفة الدم
أندرو أيميل 26سنة، مهندس برمجيات: بحب البنت اللى دمها خفيف.. وأغلب البنات دمهم خفيف بس غالبا بيكون ده وقتى لأن مجرد ما بتبدأ تدخل فى ارتباط حتى مش رسمى يعنى تعارف بتلاقى البنت اتحولت وبدأت تبقى كئيبة.. وحشرية.. عايز بنت تكون بجد دمها خفيف حتى بعد الارتباط والجواز تبقى بتضحك وبتهزر مش تتحول لزوجة نكدية.. أنا مع أن فيه رجاله هما السبب فى تحويل زوجاتهم لنكديات.. بس ده ميمنعش أن البنت أول ما بترتبط بتكون أكثر فضولا فى حياة الولد والفضول بيجيب مشاكل ومن ثم نكد ومن ثم غابت الضحكة.. ليه مثلا البنت لما ترتبط تقارن نفسها أنا ولا ماتش الكرة؟؟ يعنى أنا بتفرج على كرة وبلعب كرة من 21سنة ولسه عارفك من 5 شهور بديهى متقارنيش ده حتى بالأقدمية هتبقى الكرة!!
نغشة وشقية
عادل عبدالحميد 35سنة، محاسب بأحد البنوك الأجنبية: بحب البنت الشقية.. نفسى ارتبط ببنت بشقاوة سعاد حسنى.. وفيه فرق بين الشقاوة والنغاشة والدلع وبين الشقاوة المبتذلة، الرخيصة التى تصل الى حد «البجاحة».. ولأن الفرق بينهم شعرة فللأسف أغلب البنات إما بيفتقدوا للشقاوة والجنان وحب الحياة.. أو مجانين رسمى وحابين الحياة لدرجة أنهم غير مسئولات ولا يهتمون بأى شىء.. الوسطية حلوة.. أغلب الولاد بيحبوا البنت الشقية.. الجذابة بأسلوبها.. بكلامها، بضحكتها.. هذه البنت تجعل قلب الرجل يرق بسهولة وتستحوذ على إعجابه بشكل كبير.. فكل رجل يتمنى أن يستيقظ من نومه على صوت زوجة تغنى وليس صوت زوجة تتعارك.. يتمنى الرجل أن تكون معه فى البيت بنت «دلوعة» وليست «مايصه» - واعتذر عن اللفظ - البنت الشقية تملى الحياة وبالبيت التفاؤل والإيجابية والطاقة وهو ما يجعل الرجل أفضل فى حياته ويومه المعتاد.. شقاوة البنت ودلعها تساعد الرجل على تخلصه من الأرق والتفكير فى هموم الحياة.. لأن الحياة عندهم بتبقى لونها «وردى».
رامى محمود 32 سنة، خدمة عملاء: أحترم البنت اللى شخصيتها قوية.. ونفسى ارتبط ببنت تكون لها شخصيه قوية.. كتير بيخافوا من البنت اللى شخصيتها قوية من داء السيطرة وأحب أرد على الشباب اللى بيكره قوة البنت وبيحب ضعفها.. إنما لو أنت شخصيتك قوية بتتناقشوا قبل اتخاذ أى قرار وبتوصلوا لحل يرضى الطرفين أصبحت البنت متحكمة فاعلم أن الخطأ فيك وفى تعاملك وليس فى قوتها.. قوة شخصية البنت بيندرج تحته إنها مسئولة.. قادرة على اتخاذ القرار.
عايزها انطوائية
عبدالرحمن محمد 29سنة، مسئول مبيعات: عايز بنت انطوائية.. لا تهتم كثيراً بالعلاقات الاجتماعيه والمجاملات والذهاب إلى هنا وهناك.. وتقضى أغلب وقتها فى البيت أو فى عملها.. أما أيام الأجازة يكون لنا كأسرة فقط.. والأصدقاء يكفى رؤيتهم فى العمل.. فالبحث عن الحياة الاجتماعية لا يتناسب مع الحياة الزوجية، فسرعة اليوم وصعوبة عمل كل شىء فيه جعل حياتنا الاجتماعية شبه منعدمة لأننا ندور فى ترس العمل والحياة ولا نستطيع أن نحيد عنه.. كما أن أغلب العلاقات الاجتماعية والصداقات تكون سببا فى انهيار البيوت.
مروان حاتم 23سنة، محاسب: البنت التى أتمنى أن تصبح شريكة حياتى.. عايزها مهتمة بنفسها.. والمقصود هنا ليس فقط الاهتمام بنوعية الملابس أو جودتها.. المهم تكون ألوانها متناسقة حتى لو اشترتهم من الرصيف.. تكون مهتمةبنظافتها الشخصية.. تكون مهتمة بحجمها.. وتفضل محافظة على ده اهتمامها الداخلى بنفسها.. مش هيخليها بعد الجواز والخلفة حجم الدولاب المتنقل.. هتكون أكثر حرصا أنها تستعيد رشاقتها.. واهتمامها بنفسها مش مقتصر على المظهر فقط أو النظافة تكون مهتمة بنفسها فكرياً.. يعنى مثقفه بتتكلم كلام موزون.. عارفه متى تتكلم ومتى تسمع، عندها اتيكيت فى كل حاجه فى حياتها.
عملية ومسترجلة
ماجد عبدالعليم 21سنة طالب بكلية هندسة: عايز ارتبط ببنت عملية مش رومانسية.. لأن الرومانسية تعنى الحساسية الزيادة.. والاهتمام المفرط.. والمشكلة ليست فى الاهتمام الذى ستقوم به إتجاهى وإنما ستكون المعاملة معها مرهقة.. دائما ستكون بحاجة إلى الكلام الرومانسى والمفاجآت والأحلام الوردية ورتم الحياة أصبح أسرع من أن أقضى يومى فى سماع أغنية هجرتك لأم كلثوم فى أكثر من نصف ساعة.. البنت العملية تفكر بعقلها كثيراً ولاداعى لقليل من العاطفة فى أوقاتها فزمن شادية وعبدالحليم وأغنية «حاجة غريبة» مر عليها سنوات والحياة الزوجية بحاجة إلى مشاركة امرأة عملية تعلم حقوقها وواجباتها وتجعلنى منضبطا فى عمل واجباتى وأخذ حقوقى.
أحمد عاصم 25 سنة، مدرب سباحة: عايز ارتبط ببنت جدعة بمية راجل.. مسترجلة مع كل الناس.. مشيتها شاويش.. تعرف توقف أى حد عن حدوده.. تعرف تاخد حقها.. ومعايا تكون زوجة جدعة، أصيلة وطيبة..•