حصريا لصباح الخير حتى آخر رمضان ننشرحلقات فوازير «حبوها بالأفعال» التى تذاع يوميا على شبكة البرنامج العام عقب أذان المغرب طوال شهر رمضان، والتى يقدمها الفنان شريف منير ويكتبها الشاعر جمال بخيت وإخراج أيمن فتيحة وتدور فكرة فوازير «حبوها بالأفعال» حول الشخصيات التى تركت أثرا وبصمة على المجتمع المصرى بإنجازها..حتى لو لم تكن شخصيات مصرية. والمطلوب هو اسم الشخصية التى تدور حولها الفزورة.. فى كل عدد سنقدم عشر فوازير وإليكم نص الفوازير ..
1 لما زمانى عليّا يغلس والقى الجيب فاضى ومفلس باخطف رجلى لحد ميدانه وباطبطب على اسمه وأملس ... خَد من كد المصريين قرش يهز الاسترلينى وعمل بنك أساسه متين خَلّى الضنك يقول: خبينى وعمل شركة للتأمين وبنى استديو عشان تفانينى ... خَد من كد المصريين وبنى .. ووزع ف الارباح وترك لنا زرع وبساتين ومكن داير كل صباح ولا اكّلنا ف يوم بالدين زى ما غيره عملها وراح ... خَد من كد المصريين قرش بيشقى ويطّرح غَلّة إسال عنه نسيج ف شبين واسأل عنه ف غزل محلة طاهر طيب.. حر.. أمين نفسى انقش اسمه على مسلة
2 حياة فرعون ورقصاته معاركه وانتصاراته وأفراحه وهمساته على الجدران.. يعيشوا قرون لكن بعد القرون .. ماتوا ... لغة ودخلت كهوف الصمت ومين م الصمت يحييها ومين يقرأ حكايتنا ويرجع تانى يحكيها؟! لحد ماجيت ياعالمنا عشان تنصف مظاليمنا عشان تنطق حضارتنا وحجارتنا تكلمنا ... بدون علمك .. لا كان رمسيس رجع تاني، ولا أوزوريس وكان أحمس فضل غايب ف بحر الضلمة والكوابيس ... صحيح أنك فرنساوى لكن بالقلب مصراوى بتقرا فوق حجر ف رشيد تاريخ .. ومحبة .. وغناوى 3 البربرى المحترم الطيبة ساكنة عينيه فى مسرحه.. مطرحه جمهور كبير حواليه ف السيما راح يستلف يادوب.. تلاتة جنيه يملا الحنان ضحكته صوته يدل عليه اسمه العجيب .. شهرته ما اعرفش معناه إيه ؟! إيه ده اللى راح يكسره ولا هو كسره ليه ؟! كسّر شروط البطل لا جمال .. ولا عضلات ولا نار هوى ملهلبة سايبة القلوب ف شياط بالعكس كان غلبان لا شجيع .. ولا عطّاط بواب عمارة الفن ومالوش ف الاشمئناط كان مننا وزينا دمه الخفيف .. شربات
4 قال تونسى قال دا مصرى جدا ابن الرجال أباً وجداً صوته المدوى ف مالطة يدن ويقول لى امتى الزمان يروق؟! ... زجال بيكتب .. زجله بدمه ومصر هية حبيبته وأمه ولما يشكى .. علشانها .. همه لا فؤاد يهمه ولا فاروق ... جورنالجى صاحى .. ياما تجلّى وسهمه صايب .. عمره ما جلّى عمل مجلة .. باسم «المسلة» وعمل مجلة .. باسم «الخازوق» ... فوازيرنا دية هو ابتداها هنا ف الإذاعة ثبت خطّاها وكتب لثومة فوازير سواها ( الجُبلة ) حلوة .. ياعم دوق
5 الجندى الألبانى القائد والبانى دى حكاية وعجبانى ف تاريخك وماضيك ... بقى باشا .. وبقى والى ف القلعة .. ف العالى ولا كانت على بالى مذبحة المماليك ... إتحدى اسطمبول وعمل لنا أسطول والبعثات على طول تفتح لك شبابيك ... دلتاها .. وصعيدها نورها .. وجددها وعمل جيش يسندها وبنى له سلاحليك ... دا تاريخك والماضى وماراحش على الفاضى والوطن المرة دى بيبلغ معاليك ... القائد والبنا إن راح ولاّ استنى مش رح يعلا وطنّا غير بيّا وغير بيك
6 من الصعيد لباريز يامصر واتذكرى رحلة أعز عزيز العالم الازهرى ... واقف على منبرى على مذهب الأحرار بيقول يامصر احضرى قومى إبدئى المشوار قومى ياست الدار وفكرى وعبرى ... قبله .. عقول تربست جوة سنين موجعة قبله .. عقول هلوست ويّا نفوس خاضعة بحضوره .. اتونست جُملة علوم نافعة والألسن اتأسست المدرسة الجامعة وبفضله اتنفست أفكار كتير رائعة افكار كتير مبدعة نورّ بها جوهرى العالم الأزهرى
7 الناس فتنها الهوى وانا بالوطن مفتون لو لم أكن منتمى لوددت أنى أكون مصرى .. صديق للزمن طيب بقلب حنون ... اليأس ضد الحياة ومع الحياة لا يأس الفوز بحريتك ابن العمل بالفأس ساعتها تقدر تقول للمجد كن .. فيكون الناس فتنها الهوى وأنا بالوطن مفتون ... يادنشواى لو غفا صوت الضمير .. صحيه .. وطنى خلاص اصطفى من الولاد .. محاميه ساكن ف درب الوفا وبحبنا .. مسكون الناس فتنها الهوى وانا بالوطن مفتون
8 الحكمة حكمة .. لو نص كلمة والبسمة تكمل .. بنص رسمة تفش غلك .. ح تعيش ف نعمة ولا كُبة تفضل ع القلب كاتمة ... بنص كلمة ولسان طويل خَلّى الحرامى .. خايف ذليل هّون عليّا حملى التقيل وكان معانا ف كل أزمة ... عزمنى مرة .. ف كفر الهنادوة وانا افتكرت العزومة غدوة اتاريها ثورة وليها جدوى بتقول كفاية عذاب ياظَلَمَة ... ف نص كلمة تقرا الجريدة لا تقول لى غنوة ولا قصيدة أراجوز .. عصايته .. زى الحديدة تضرب .. تطرقع .. ف طبقة حاكمة ... بنص كلمة .. نضحك علينا والضحكة تملا روحنا وعينينا نكتتنا تانى تعود إلينا تبرق وتلمع والدنيا ضلمة
9 ف العشق صارت مثل وسيرة على قلوب الجميع أميرة ملكة بتحكم على عرش مصر ف الحب شافت ايام عسيرة ... يوليوس عشقها.. حتى مماته انطونيو خدها.. زهرة حياته والكل شربوا م الحب ذاته حنان.. ورغبة.. وشوق وغيرة ... أميرنا شوقى بقلمه يسرح يكتب سيرتها أشعار ف مسرح رحيلها مشهد درامى يجرح حروب.. هزيمة.. تعابين كتيرة ... الغرب كله عارف قيمتها بأغلى فيلم يروى حكايتها والمحنة.. إحنا لما ف سيرتها عملنا غلطة فعلا كبيرة ... ف كل حتة وف كل حارة تلاقيها حاضرة.. بس الخسارة حطوها ماركة على سيجارة ودى حاجة أقدر أقول: مريرة 10 لا ميدان ولا تمثال ولا أى شعر أتقال ح يعوضك يا شهيد يا للى مالكش مثال من العجب.. واللهب ومن الدهب.. جنرال ... فى حرب الاستنزاف القائد العبقري واقف ف وش العدو فى موقع العسكري بيقول يا مصر الندي إياكى تتصوري أنى ح أسيب العدو ينعم بشط القنال ... يوم العبور ملحمة طلت عليها السما وكل جندى عبر فوق المواجع سما كان عنده من قصتك من ضحكتك .. أوسمة يوم الشهيد يذكرك يا ملهم الأجيال
