إيه رأيك في البنت سوسو..؟ : بنت حلال قوي وظريفة جدا.. مالها؟ انت عارف إنها بتكتب كمان؟ : والله..؟ بتكتب إيه.. مقالات والا مسلسلات والا مسرح..؟ بتكتب الحاجات دي كلها.. بصراحة هي لسه ما كتبتش، بس نفسها تكتب وخايفة أحسن أعمالها ما يتوافقش عليها.. : طمنها.. خليها تكتب في الأول وما تخافش من الحكاية دي.. أنا واثق إن البنت دي هايلة من يوم ما شفتها بترقص في فرح محمود. كويس إنك جبت سيرة محمود.. إيه رأيك فيه؟ : إنسان ممتاز.. قصدك رأيي فيه من ناحية إيه؟ رأيك فيه كمخرج؟ : للأسف ماشفتلوش حاجة.. هو أخرج إيه قبل كده؟ لأ.. لسه ما أخرجش.. بس عاوز يخرج. : من عيني.. وما قاليش ليه الولد ده..؟ خلاص .. يخرج الحاجات التي حاتكتبها سوسو.. بس أرجوك عاوزهم يشتغلوا بهمة عشان يلحقوا يتحطوا علي خريطة رمضان.. بس عاوز أنبهك لحاجة لو قدموا من خلالنا، انت عارف البيروقراطية والفساد .. حا يعطلوهم، وممكن يوافقوا لهم علي الشغل بعد سنة.. وجايز يرفضوا شغلهم، ولذلك أنا أفضل يقدموا الشغل جاهز بإعلاناته عن طريق روحية إنت عارف طبعا إن روحية متجوزة خليل وخليل عمره ما حا يرفض طلب لسوسن أو محمود.. طب والمسرح؟ : ماله..؟ أصل سوسو نفسها تشتغل كمان في المسرح.. تألف، تخرج، تمثل، ترقص.. انت طبعا ما شفتهاش وهي بتألف وتخرج.. بس شفتها طبعا وهي بترقص لنا يوم ما حضرتك اترقيت.. ده انت حضرتك من فرط الانسجام كان نفسك تقوم ترقص معاها.. : تألف أو تخرج، حايبقي صعب.. تمثل وترقص في البداية.. بس المهم هو وجود النص. النص جاهز يافندم.. ومتوافق عليه.. وفيه ميزانية.. ونص هايل.. يكفي إن حضرتك تعرف إني اللي كاتبه. : هو انت بتكتب مسرح كمان؟ طبعا يا فندم.. أنا ما عرفش أكتب أي حاجة تانية إلا المسرح.. صحيح ما طلعليش حاجة قبل كده بسبب أعداء النجاح.. لكن الفرصة مواتية الآن لظهور أعمال مسرحية جيدة.. المهم وجود مخرج واعي مثقف.. إيه رأيك في الواد أيمن.. أهو أخرج قبل كده وهو في الكلية مسرحية ما طلعتش، ودلوقت بيدوّر علي فرصة.. ومفيش حد غير حضرتك ممكن يديله الفرصة دي. : آه.. بس الواد ده جبناه يخرج مسلسل قبل كده وعمل لنا مصايب وبعد ما خلّصه مفيش حد اشتراه، ولا محطة وافقت عليه .. وهو احنا يافندم حا نستني المحطات عشان تشتري شغلنا؟ حضرتك عارف هم بيحسوا بالغيرة من الدراما المصرية.. عارف حضرتك المسلسلات اللي بتتذاع في مصر دلوقت، اللي اتصرف عليها مئات الملايين.. مش حا يشتروها.. عارف ليه؟ بلاش أقول ليه.. : لأ اتفضل قول.. فيه بعد سياسي مهم جدا.. النفوذ الأمريكي قوي جدا في المحطات العربية.. وانت عارف طبعا إن الأمريكان بيشتغلوا لحساب إسرائيل، وطبعا إسرائيل مش عاوزة الريادة المصرية في المنطقة العربية.. ولذلك أنا أستطيع أن أتنبأ بأن كل الأعمال اللي أنتجها التليفزيون المصري في رمضان.. حا تبقي صعب جدا في تسويقها.. بس الحاجات دي ما تهمناش يافندم، لأن الإنسان مادام بيشتغل من أجل الريادة، وإشاعة المثل العليا في المنطقة، فعليه ألا يهتم بالفلوس اللي بيصرفها.. هذا هو قدر مصر.. هذا هو قدر الشقيقة الكبري.. ما تنساش كمان يافندم إن تركيا دخلت حلبة الصراع.. قبل ماانسي يافندم.. إيه رأيك في البنت ميرفت؟