دراويش الحضرة

قصيدة

للعمة خضرة
وهدمتين دايبين
انا وانتى ليه هايمين

عمال بنرمح
فى الغطان رهوان
الحلم بيبان
زهقان
لحظة بيان
الحلم جواكى
كان نفسى ألقاكى
فى البيوت ضحكة
الكلمة حاكة
فى الوريد والزور
تقول زرزور
بيتنطط بعرض السور
من فوق جذور
الفرع بيلقط بذور
كان نفسي، اتور
من نومى وأصحالك
اطرشق بيبانك
على الخلا جنب البيوت
الحلم توت
يشبه عيال الكون
عل الرصيف
ساعة غروب
جايز الهروب
الحلم اصدق م الكلام
ساعتين وأنام
وتهل دراويشك
تقسم رغيف عيشك
وتلم تناتيشك
حبة آهات
متوجعين
أنا وانتى ليه متعفرين
يطلع نهار
يسبق سمار
الشمس بتلم المدار
كان نفسى احكيلك
واغنى غنوتك
للسمرة بنت البيوت
النى
الحلم ضى
ف عيون الولاد
فرفر رماد
كان نفسى ما تقولهاش
بعناد
أنا كنت حاسس بالوجع
أنا كنت افضفضلك
اكتب كلام البنات
على الورق
حدوتة لازم تتحرق
ساعة الأذان
ساعة ما كان
الحلم جواكى بأوان
أنا كنت اغنيلك
اشطب اسامى العيال
الزايغين
من الوجع
ارسم حاجات ف الوسع
كان نفسى أقولها لك
قبل أما اموت
اصبغ شعور الحى
بسمار لونك
سبتينى تايه ما بين
دراويش
للعمة خضرة
وحضرة
وحاجات بتعيش