قصائد

أنا وأنت
أنا وأنت
وليل ساكت بتمايل
أنا وأنت
وشوق ثاير وقول داير
بتنهد
رصيف الوقت من صبري
أنا وأنت
نعيش شوقنا
نوشوش بعضنا غنوه
علي موال
نهار أبيض علي عيونا
علي بكره
علي كل اللي ما فتنا
علي سكتنا
بنهجه ف طول البعد
في بعادنا
ويا عنيه
ويا ساكنه حواليه
وحوياني
وتايهه بس لقياني
وحساني
برغم البعد حباني
هنتلملم علي قارب
كما لحظة نجاة غارق
ونصبح في اللقا تعبير
نتسرسب
علي حضن القمرتعسيل
ويشرب العطش فينا
وتندهنا أسامينا
حروف العشق تحمينا
ونتلاقي ونرسلنا علي مينا
يا ليل ساكت
أنا البادي
أنا الفارس برغم الحزن
هزرعلك
زهور رياحين
وهعقدلك عقود ياسمين
وهملاك غنا وحنين
وهارئيكي بآيات حبي
من الحاسدين
أنا سهرك يا قمريتي
وأنا أرضك يا شجرتي
أنا دارك آه يا جرتي
يا نَورتي
وأنا جوه حروف اسمك
بتتشابك أيادينا
بتنطقنا أسامينا
وواعديني وغني لي
وإحكي لي
علي أجمل
حكاية بنت حبتها
وشدتني فدارتها
وتاهت في ولقيتها
وسهرتني وناديتني
أنا وأنت
وليل ساكت
هنتواعد
في يوم أخضر علي بيتنا
صوتك
صوتك
بيونسني في ليلي
بيحسسني
بأني فراشة وأنك نور
صوتك
بيوصلني لحالة من التفكير
مزقزقة زي العصافير
صوتك
لية بيلمس إحساسي بيدوبني
لما بيبعد عني
أشعر وحدة أشعر خوف
أشعر كل الناس ديه غريبة
تصبح كل ملامحي كئيبة
صوتك صدي
لدروب في الفضا
لأماكن مفتوحة مفضفضة
صوتك
في روعة لون النيل
صوتك
له رنة وله تعبير
أنا ليه بحبك
فوق معاني شكوتي
أنا ليه معاك .
إسكندرية
يا متوهاني وساكنه بالي
يا جنيه
يا صفو القصد والنيه
أنا بعدك مليش غيه
في لسع البرد حنيه
يا ساكناني ونسياني
يا طله ف عز أحلامي
ميملكش الطريق تاني
غير الجوابات لعنواني
وشوق حكايات بتملاني
أنا ساعة ما فوتيني
معدش العشق بيجيني
أيووه يا إسكندرية
يطول الليل كتير بيه
بمنيني بصفحة عمر مطويه
سفيني حزينه في الرمله
بتستني وتتمني يرد البحر
أتحني أروح للشط للجنه
يا حرماني يا حمياني وحباني
بحبك وإنتي حساني
صور ورق
توهه في غرق
زنقه في ميدان
طريق قديم وأثار رومان
بقايا زاويه في مكان
عواد شجي
صوره في دكان مكوجي
يا ملاحه
ولماحه وساعة النوه في الساحه
يا غجريه
يا بنت الإيه يا جنيه.
سيد درويش
إفتح
بيبان العمر تتاخر
جوه آنه ف قلب عودك
جوه منك صوت ألوفك
جوه مني يا سكني
كنت بشتالك لاني
بسمعك من غير ما أشوفك
يا سيدنا متلمنيش
وحشني
يا سيد درويش
أنا المصري
هتفضل رنه ف وداني
وعفقتة عود ملزماني
ولو دار الزمن تاني
يردك روح
ف وجداني
منين أبدأ كلام
منين أبدأ كلامي
منين أبدأ
بداية القول
الصلاة والسلام
خير ما نبدأ
الكلام
(علي المصطفي )
أبدأ من قلب بيرم
من رسمه لمحمود سعيد
من غنوه الدرويش تعيش
جوه آنه عود إمام
ألقي خطوي للمقام
جوه غنوه بصوت حليم
ألقي ف السكه النديم
لساه حزين
ألقي رباعيات جاهين
الحياه والعجايب
ف عقود الفل أنادي
تختلف ف عصور بلادي
مصر واقفه
زي سومة نخله طارحه
ياه يا نجم ف قصايدك ألف حلم
إمشي يمين وشمال
ألقي وشوش الناس أحزان
الكلمه سيف والكذب زيف
ف الأبنودي تلقي جدودي
ألقي مشاعري زي الأرض
عشق صعيدنا أصبح فرض
نظره ناصر
ضمه رمال النهر ف صبر
نظرة حلم ف توب القبر
مصر الأرض
والمشاوير والتراتيل والترانيم
مصر سبيل للتفكير وللحريه
جوه جمال حمدان
مرسومه جوه خريطه
يمكن ف أوجاع للصوره
منين أبدأ كلام
قصر الشوق
ف حضن نجيب
كان بيحب
طرف ملايه اللف تلملم
فينا تسيب
طه يسافر بينا يحلق
فوق العمه والطربوش
نرسم نظارته نوشوشها
ع فكره تحضرنا نقوش
نلقي مراكب شمس النيل
تطرح إزميل
فيه مختار سرج القنديل
وأتكون جوه تماثيل
صوت الناس
وأتمرد علي كل خيال
منين أبدأ كلام
لفين خطوطي
لفين أحزاني لفين عشقي
لفين كتمان
إوعي يا مصر
لما أسافر تقسي عليه
أو تمنعي فرحتي في عنيه
أنا جواك أنا بهواك
أنا عشقاك موال أخضر
موال أسمر
ليل متمطر
فجر مبدر
يا أم الدنيا
يا مصر يا مرمر.