التحالف الميكيافيلي والثعبان الأقرع!

انتهت انتخابات برلمان فرم الثورة، واكسر للثورة ضلع.. يطلعلها أربعين، وإن جالك الطوفان.. حط الثورة تحت رجليك.. واجري علي القبة يا شيخ زعزوعة، انتهت معركة الصناديق الثانية، وانتصر الإخوان بعد الصلاة علي نبينا الزين، وخدوا القبة باللي تحتها إيجار جديد، وسوف يتم تحويلها بإذنه تعالي، إلي عمة خضرا وجنبها سيفين أطول من المدنة لزوم الغز والزغ، وقدامها علم السعودية المبروك، وعلم حماس النصر مبروك، تحت شعار دقن عربية واحدة.. ذات رسالة خالدة، واللي يحب النبي يزق يا مشايخ، ولانهم ناس مبروكة بتاعة ربنا، كما اكد لي صديقي الضائع، وهو يضرب البانجو، فسوف يكرمنا الله بدون مقاطعة عشان خاطرهم، وإذا حطت أي مصيبة سودة علي دماغنا، سيكشفون رؤوسهم بعد صلاة العشاء،
ويدعون الله أن يزيل عنا الغمة، ويا خفي الألطاف.. نجنا مما نخاف، فتنقشع الغمة، وتركبنا الهمة، فنبرطع في الشوارع صائحين مهللين.. افرحي يا ولية.. مولانا خبي المصيبة بالعمة والجلابية، كما أكد لي صديقي الضائع، أنهم قد اتفقوا بالفعل، مع مشايخ السعودية المبروكين، لإقامة صلاة استسقاء أمام قبة المجلس، حتي تتحول مصر الخربانة، إلي آبار بترول لا لها أول ولا لها آخر، وبدل ما العيال الصايعة ما تلعب في الطين، تقعد تعبي في البراميل، عشان النسوان تستحمي فيها، بدل ما تروح تتنيل في الحمامات الشعبية، واللي هايفضل، نبعته علي الحمير للدول اللي مش لاقية تطفح، ونذل أمريكا ذل الإبل، لكن قبل ذلك كله، سيتم تبخير المجلس لطرد عفاريت الفلول، اللي لابدة في جتته، خاصة عفريت الراجل اللي لابس نضارة وعامل فيها كرومبو، بعدها.. يدخل الأعضاء برجلهم اليمني، والمحروق اللي هايدخل برجله الشمال من الأحزاب الكفرة، يبقي عليه كفارة.
لكن بقية الأحزاب الغلاوية، اللي صعبان عليها تشوف الإخوان في الأملة دي وكأن القبة في أيد اليتيم عجبة، قرروا فقع الإخوان مقلب حرامية، فقد قررت الكتلة المصرية، بتاعة العين صابتني ورب العرش نجاني، والوفد بتاع يا طالع النخلة.. هاتلي معاك معزة،
والسفليين بتوع الفانوس يجلي الصدر، ويهدي النفوس، تكوين تحالف ولا دول المحور في زمانها، لرزع الإخوان شومة علي دماغهم، والاستيلاء علي القبة، وانزال العمة، والدقن اللي لا لها أصل من فصل، ووضع دقن محترمة طولها اتنين متر، وفانوس ونخلة وعين، علي الأقل.. تمنع الحسد والقر، كما قرروا عدم استخدام ميزان الإخوان.. وهايبقوا يوزنوا بره، عند الراجل بتاع البسطرمة اللي في الشارع اللي وراهم، كما تقرر إقامة صلاة العيد والتراويح في المجلس الطاهر، بدل ميدان مصطفي محمود، اللي سمعته بقت وحشة من أيام خليك هنا خليك يا ريس..
بلاش تفارق، هذا التحالف الميكيافيلي الغريب بين الفانوس، وبين كفار قريش حسب تصريحات إخوانا الفوانيس الصغيرة، يؤكد أننا مقبلون بعون الله، علي مرحلة التكفير والهجرة، فإذا كانت الأحزاب الأخري تعتقد أن الاستعانة بالفانوس في مواجهة الميزان كله خير وبركة، علي اعتبار أنه لا يفل الدقن إلا الدقن اللي زيها، وربنا بيسلط أبدان علي أبدان، فإن الفانوس يتحالف مؤقتا مع الشيطان اللي هو العين والنخلة وأي رمز تاني، لضرب الميزان، ثم رقع هذه الأحزاب مطواة في كرشها، لأنهم يصرون علي إقامة الحدود، وأن يدفع الأقباط الجزية، وما فيش فانوس يعيد علي قبطي، وإلا سرقوا الشمعة بتاعته، ولو كان بالكهربا.. يشدوا الفيشة، ويصرون علي أن تلبس مصر كلها السواد، وتضع النقاب، وتركب الحمارة وتطلع علي الخرابة وهي تغني وصلي صلي.. صلي.. ع النبي صلي.. صلي، ولا جايز اتفقوا معاهم، إنهم يدفعوا لهم الجزية نيابة عن مصر كلها من تحت لتحت، ويبقي الفانوس يحط إيده في ديل الجلابية، قبل ما يسلم علي قبطي، وممكن يعيد عليه من ورا الستارة.
إن التحالف الغريب بين التعبان الأقرع.. وعبده بسكليتة.. نهايته سودة.. ومصر.. راحت في الوبا خلاص.