إبداع

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بعيد تحرير سيناء، بعد عودة أرضها إلى السيادة المصرية والذى يوافق 25 أبريل من كل عام.

وأرض سيناء أو أرض الفيروز قد تغنى بها العديد من الشعراء فى قصائدهم والتى سال فى سبيل عودتها الكثير من الدماء المصرية الطاهرة، انتهاءً بطاولة المفاوضات التى تمت بعد انتصار أكتوبر المجيد.

يا حبيبتى يا مصر

يا بلادى يا احلى البلاد يا بلادى

فداكى انا والولاد يا بلادى

بلادى يا بلادى

بلادى يا بلادى

يا حبيبتى يا مصر يا مصر

يا حبيبتى يا مصر يا مصر

ما شفش الأمل ف عيون الولاد وصبايا البلد

ولا شاف العمل سهران ف البلاد والعزم اتولد

ولا شاف النيل ف احضان الشجر

ولا سمع مواويل ف ليالى القمر

اصله معداش على مصر

اصله معداش على مصر

يا حبيبتى يا مصر يا مصر

يا حبيبتى يا مصر يا مصر

يا بلادى يا احلى البلاد يا بلادى

فداكى انا والولاد يا بلادى

بلادى يا بلادى

بلادى يا بلادى

يا حبيبتى يا مصر يا مصر

يا حبيبتى يا مصر يا مصر

ما شفش الرجال السمر الشداد فوق كل المحن

ولا شاف العناد ف عيون الولاد و تحدى الزمن

ولا شاف اصرار ف عيون البشر

بيقول احرار ولازم ننتصر

اصله معداش على مصر

اصله معداش على مصر

يا حبيبتى يا مصر يا مصر

يا حبيبتى يا مصر يا مصر

يا بلادى يا احلى البلاد يا بلادى

فداكى انا والولاد يا بلادى

بلادى يا بلادى

بلادى يا بلادى

يا حبيبتى يا مصر يا مصر

يا حبيبتى يا مصر يا مصر

شعر: محمد حمزة



راية العرب

عجبى على راية العرب فى الريح

فى الأرض ثابتة وفى السما تفاريح

والنجمتين الخضر بيبصوا لنا

وبيقولوا لنا بكل عربى فصيح

الوحدة الوحدة الوحدة

مجد العرب فى الوحدة

الوحدة راية ونجمتينها صبايا

علشان عيونهم ياما راحوا ضحايا

شجعان زمان فرسان حروب الوحدة

من دمهم نبتت وصبحت راية

وكم شهيد وسط الميدان وجريح

هتف وقال بكل عربى فصيح

الوحدة الوحدة الوحدة

مجد العرب فى الوحدة

يا نجمتين يا خُضْر يا عيون بلدى

باحبكم حبى لبنتى وولدي

حبى لأبويا وأمى يا نجوم رايتى

باحبكم حبى لعزى ومجدى

وزى ما العربى كلامه صريح

أنا أقول بكل عربى فصيح

الوحدة الوحدة الوحدة

مجد العرب فى الوحدة

زى الربيع ما لابد يوفى بوعده

لابد يوم كل العرب يتحدوا

ونجمة خضرا بعد نجمة حاييجوا

يتقابلوا فى الراية مكان ما اتواعدوا

ويرفرفوا فى العيد على المراجيح

وهناك يقولوا بكل عربى فصيح

الوحدة الوحدة الوحدة

مجد العرب فى الوحدة

عجبى على راية العرب

عجبى !

شعر: صلاح جاهين

طالعين على أرض الفيروز

طالعين على أرض الفيروز

الرمل ماس والقلب كنوز

اخضرى يا سينا مطرح خطاوينا

بعرقنا نرويكى بالحب تروينا

دى ميتك شربات اللوز

على الرملة لافرد منديلى

وافرش جنينى على جبيني

واندة على الحلوة تجيني

دنا كنت نادرها فى يوم محررها

واقول مفش غيرها

عروستى من أرض الفيروز

من غير ما تندة أنا جاية

دنا من زمان مستنية

يوم الفرح والصبحية

فستانى بحراوى والحنة سيناوي

دنا جدى شرقاوى

مصرية من أرض الفيروز

يا نعسة ورجعلك ايوب

عدى القنال وجيبلك توب

اخضر بلون وشم المحبوب

يام الجبين عالى دة مهرك الغالى

بروحى وبمالى دفعتة على أرض الفيروز

دى الارض بالخير ولادة

والمية عندنا بزيادة

نرويها تطرح سجادة

ده كل رملاية شجرة ونخلاية

نسمة وضلاية على بتنا فى أرض الفيروز

نحلف بطور سنين وشقنا طول السنين

لنخلى أرضك بساط

لون ابتسمت البنات ونعوضك على اللى فات

وتندهى تلتئينى ليل نهار حاضر

يا سينا يا أرض الفيروز

شعر : عبدالسلام امين


النجمة مالت ع القمر

النجمة مالت ع القمر فوق فى العلالي

قالت لة شايفة يا قمر أفراح قبالي

قال القمر بينا نسهر على المينا

دا النور على شط القنال سهران يلالي

شاف القمر ع الضفتين زفة وزينة

قال دا السلام فارد جناحة على المدينة

واللى تحلى المحبة والغنا

واوعوا تخلوا فى أرضكم دمعة حزينة

قال القمر بينا نسهر على المينا

دا النور على شط القنال سهران يلالي

النجمة مالت ع القمر فوق فى العلالي

قولوا لدموع الفرح تروى كل وردة

خلوا الأمل يبaقى تمللى شمعة قايدة

حيوا اللى قال نفتح لأحبابنا القنال

وخلوا بكرة يبقى أحلى م النهاردة

قال القمر بينا نسهر على المينا

دا النور على شط القنال سهران يلالي

النجمة مالت ع القمر فوق فى العلالى

شعر: محسن الخياط



مصر اليوم فى عيد

ياللى من البحيرة وياللى من آخر الصعيد

ياللى من العريش الحرة أو من بور سعيد

هنوا بعضيكم وشاركوا جمعنا السعيد

سينا رجعت كاملة لينا

ومصر اليوم

مصر اليوم فى عيد

ألف ميت مبروك علينا بالسلام

حقنا عاد بين ايدينا بالتمام

وإحنا حنصونوا فى عينينا ع الدوام

أصل مافى ع الارادة أى شىء بعيد

سينا رجعت كاملة لينا

ومصر اليوم فى عيد

ليل نهار عاهدونى نبنى ليل نهار

علشان مصر بلدنا تبقى فى ازدهار

نبنى ونحولها جنة بالعمار...

والامان ضليلة فوقنا وكل ايد فى ايد

سينا رجعت كاملة لينا

ومصر اليوم فى عيد

بكره أحلى م النهارده.

.بكره ياجيلنا الجديد

تحصدوا خير ما زرعنا..

.والجميع يسعد أكيد

مصر علشان تقوى بينا

لازم الانتاج يزيد

والكلام مش وقته خالص..

.العمل هو المفيد

سينا رجعت كاملة لينا

ومصر اليوم فى عيد

شعر : عبدالوهاب محمد


صباح الخير يا سينا

فى الأولة قلنا جيِّنلك وجينالك . . ولا تهنا ولا نسينا

والتانية قلنا ولا رملاية فى رمالك . . عن القول واللة ما سهينا

والتالتة إنتى حملى وأنا حمالك . . صباح الخير يا سينا

وصباح الخير يا سينا . . رسيتى فى مراسينا

تعالى فى حضننا الدافى . . ضمينا وبوسينا يا سينا

مين اللى قال كنتى بعيدة عنى . . إنتى اللى ساكنة فى سواد الننى

مش سهل ع الشبان يسهوا عن الأوطان

ورسيت مراسينا على رملة شط سينا

وقلنا يهون علينا . . دا أول الشطئان

وصباح الخير يا سينا . . رسيتى فى مراسينا

تعالى فى حضننا الدافى . . ضمينا وخدينا يا سينا

الأولة قلنا . . والتانية سيرنا . . والتالتة سيرنا وحطينا ع الرملة

قالوا الحياة غالية . . قلنا الشرف أغلى

بلادى يا بلادى يا عيون قمر الربيع

اندهى يا بلادى يجاوبك الجميع

وصباح الخير يا سينا . . رسيتى فى مراسينا

تعالى فى حضننا الدافى . . ضمينا وخدينا يا سينا


شعر : عبدالرحمن الأبنودي