4 لون

فى كارثة من أكبر كوارث ما بعد الثورة.. إزالة جرافيتى شارع محمد محمود.. مين اللى سمح بإزالته؟! أشك أن العقلية اللى فكرت فى كده كان همها تجميل الميدان والشوارع المحيطة به.. لأن العمل كان من أعظم وأروع ما حكى عن الثورة والثوار.. الحكومة قالت إن الميدان هيكون مزار عالمي.. طيب هو كان فى أجمل من كده علشان الناس تيجى من كل حته فى الدنيا وتشوف سيرة الثورة مرسومة بمنتهى الروعة.. إزالة الرسوم هو إهانة للثورة ومحو لتاريخها العظيم.. الا بقى لو اللى شال الرسوم دى كان فاكرها رسوم مسيئة للأديان لا سمح الله!!

دار الإفتاء أفتت أخيرا بأن تحية العلم والوقوف للسلام الوطنى جائز شرعا! طيب الأفاضل اللى رفضوا قبل كده الوقوف للسلام الوطنى فى التأسيسية هيعملوا إيه؟ واللا هما مستنيين علم مصر يتغير للون اللى هما عاوزينه علشان تبقى التحية واجبة؟! أحب أقول لكم النسر هيفضل فى مكانه.. ونشيد «بلادي» هيفضل يطرب كل مصرى أصيل.

الإضرابات اللى شغالة فى كل الهيئات والإدارات مش هتجيب فلوس.. ولو الناس دى رجعت أشغالها وقعدت فى مكاتبها برضه مش هنجيب فلوس لأن 90٪ منهم مش بيشتغل.. يا أما بيشرب شاى.. يا بيحل كلمات متقاطعة.. والستات منهم بيجهزوا الخضار عشان الغدا!!

وكل اللى على لسانهم فوت علينا بكرة! أو ناقص ختم أو اطلع الدور الثانى عند الأستاذ فرج وهو يخلص مشكلتك وتطلع ما تلاقيش عم فرج وتنزل تانى ما تلاقيش اللى «بعتك»!

حل الأزمة أن الناس تشتغل بجد.. ينسوا البيروقراطية.. ويبعدوا عن الإضرابات وتعطيل حياة بقية المصريين اللى عايزين يشتغلوا بجد.. لازم نشتغل ونسيب الحكومة تشتغل عشان لما نيجى نحاسبها.. يبقى نحاسبها على حق!

أزمة الأنابيب كانت صداع فى كل بيت مصرى ما وصلوش الغاز.. مرة واحدة تلاقى الأنابيب اختفت وهوب سعر البومبة يضرب لحد ما يوصل 50 جنيه وزيادة حسب المنطقة والفصال ممنوع.. ووصل الموضوع إنك تعمل صفقات مع البوابين أو ناس ايديها طايلة علشان أنبوبة ولا كأنك بتعمل صفقة مخدرات.. المهم الحكومة سهلت علينا موضوع الصفقات والتنطيط.. والبومبة هتجيلنا بالكوبون بس بسعر مفروض عالكل.. غلبان زى سوبر مان.. الكل هيدفع صحيح هما 10 جنيه حسب ما سمعنا.. بس روح أنت شيل يا معلم من المخزن إلى المنزل.. واللى عايزها عند البيت يدفع 25 جنيه.. هو الشعب ده هيفضل يشيل.... الهم كده طول عمره؟!