نشطاء: ابن الريس واحد مننا.. فاشل زينا

قبل ظهور نتيجة الثانوية العامة بأسبوع وبعد ظهور نتيجة التنسيق للكليات والمعاهد العليا هى حديث الساعة فى كل بيت مصرى بين سباق اللحاق بكليات القمة فى قلب العاصمة والانزلاق إلى المعاهد الإقليمية.. ولكن هذا العام للنتيجة مذاق خاص فهى السنة الأولى التى تشارك فيها أسرة رئيس الجمهورية المواطنين القلق على مستقبل ابنهم طالب الثانوى الذى لم يحصل على مجموع يؤهله لكليات القمة مما جعل «ابن مرسى» حديث الساعة على مواقع التواصل الاجتماعى فيس بوك وتويتر، حيث تبادلوا التعليقات والصور الساخرة لتظهر رئيس الجمهورية وهو يقوم بدور الأب فى عقاب ابنه من بين هذه التعليقات اخترنا لكم التالى حوار مرسى مع عبد الله:

«بابا بابا.. النتيجة دى ظلم.. انا عايز اقدم شكوى لديوان التظلمات اللى انت عامله ده» - ابن محمد مرسي.

مرسى بيزعق لابنه. «ايه المجموع ده؟.. كده تعرنى قدام صحابى فى مكتب الارشاد؟.. ابن عمو عصام العريان جايب 90%.. أودى وشى من المرشد فين دلوقت».

«بيقولك بعد ما ابن مرسى جاب 75%» ..عاجل: سماع دوى طرقعة حزام جلد من داخل القصر الجمهوري»

‎« ابن الرئيس جاب 75% راح أبوه زعلان وقاله كده تقصر رقبتى قدام الناس - قام الولد رد عليه وقاله ما إنت لسه جايب 52% حد كلمك».. «ابن مرسى مش هيدخل كلية عسكرية عشان أبوه عنده ملف فى أمن الدول».

«ابن مرسى بعد ما جاب خمسة وسبعين فى المية مافيش قدامه غير انه ينضم لصفوف الثوار.. هم دول اللى هايحموه من ابوه».

ويعلق الناشط إبراهيم الجارحى «العيال بتبقى هاتموت وتطلع الاول فى الثانوية علشان صورها تطلع فى الجرايد.. الواد ابن مرسى عملها بخمسة وسبعين فى المية».

أما الكاتب محمد فتحى فيعلق على حسابه الخاص بتويتر «أشاعوا أن ابن مرسى معموله لجان خاصة وبيتصححله كوسة، وبعد ما نتيجة الثانوية العامة طلعت قعدوا يتريقوا انه جاب 75% بس.. يا منافقين».

«احسن حاجة مرسى يعملها انه يدخل ابنه الحربية، اهو يبقى عينه هناك... ومحدش يقدر يمنعه من دخولها، ده ابن ريس».

على جانب آخر هناك من انتقد اسلوب السخرية من نتيجة عبدالله محمد مرسى.. وكانت تعليقاتهم فى إطار: «مش عارف الناس اللى بتنشر نتائج ابن الدكتور مرسى و«شمتانة»، شمتانين من ايه، كلكم كنتم 100% يعنى ولو كان جاب 100% كنتم قلتم كوسة»

«عجبا لكم ايها المصريين ابن الرئيس محمد مرسى يجيب 75% نتريق عليه ولو كان جاب 99% كنتم قولتوا علشان ابن الريس زوروا النتيجة».