وائل رياض يوضح حقيقة اشتباكه مع لاعبي الأهلي

كشف وائل رياض "شيتوس" ، المدرب المساعد لفريق الإنتاج الحربي عن حقيقة اشتباكه مع لاعبي الأهلي عقب انتهاء المباراة التي جمعت الفريقين مساء اليوم على استاد "بتروسبورت" ، ضمن مباريات الجولة الثانية عشر للدوري الممتاز.
وكتب "شيتوس" عبر صفحته الشخصية بموقع التواصل الاجتماعي "فيس بوك": "توضيح مهم جدًا، الناس اللي فاهمة اني كنت بتخانق مع لاعيبة الأهلي دول ناس مش فاهمة حاجة، اولًا انا نزلت علشان لقيت اللعيبة بتتخانق ونطيت على حسام غالي علشان لقيته بيشتبك مع فادي نجاح".
وتابع: "عماد متعب كان بيتخانق مع محمود عبد الحكيم وبردو نزلت علشان افض الاشتباك ده والحمد لله قدرت اعمل ده، وبعد المباراة كنت متواجد في غرفة ملابس الأهلي ببارك ليهم على نتيجة المباراة، وبعد المباراة اخدت محمود عبد الحكيم وفادي نجاح لغرفة ملابس الأهلي علشان يعتذروا لمتعب وغالي وفعلًا تم الصلح".
واضاف: "لاعيبة الأهلي الكبار الموجودين في الأهلي مش زمايل ليا أو اصدقاء دول اخوات بمعني كلمة اخوات وعلي فكرة متعب وعبد الله السعيد روحوا معايا بعد الماتش، والمشهد اللي ظهرت فيه وانا على الخط متعصب ده بسبب احساسي أن فريقي اتعرض لظلم باحتساب 6 دقائق وقت بدل ضائع وده من وجهة نظري".
واستكمل: "رغم اعتراضي الا انني لم ولن اتلفظ بأي كلام للحكم الذي أكن له كل احترام، والنادي الأهلي علمنا الاخلاص والاجتهاد والابتعاد عن أي شبهة وضرورة النزاهة دائمًا والحمد لله الواحد دائمًا بيحاول يعمل ده علشان هو ده اللي اتربيت عليه في النادي".
واتم حديثه قائلاً: "مبروك للأهلي اللي بتمني من كل قلبي أنه يكون بطل الدوري، ومبروك للإنتاج الحربي الأداء الرجولي الجيد امام فريق كبير، شوقي غريب مدرب بجد محترم"