مدرب الإنتاج الحربي: «أتمني فوز الأهلي بالدوري»

علق وائل رياض، المدرب المساعد لفريق الإنتاج الحربي، على الاشتباكات التي وقعت بين لاعبي الأهلي والإنتاج الحربى عقب انتهاء المباراة بفوز الفريق الأحمر بهدف نظيف، على ملعب ستاد بتروسبورت، ضمن مباريات الجولة الثانية عشر للدوري الممتاز.
وقال «رياض»، عبر صفحته الشخصية بموقع «فيس بوك»، مساء اليوم: «توضيح مهم جدًا، الناس اللي فاهمة اني كنت بتخانق مع لاعيبة الأهلي دول ناس مش فاهمة حاجة، اولًا انا نزلت علشان لقيت اللعيبة بتتخانق ونطيت على حسام غالي علشان لقيته بيشتبك مع فادي نجاح».
وأضاف: «عماد متعب كان بيتخانق مع محمود عبد الحكيم وبردو نزلت علشان افض الاشتباك ده والحمد لله قدرت اعمل ده، وبعد المباراة كنت متواجد في غرفة ملابس الأهلي ببارك ليهم على نتيجة المباراة، وبعد المباراة اخدت محمود عبد الحكيم وفادي نجاح لغرفة ملابس الأهلي علشان يعتذروا لمتعب وغالي وفعلًا تم الصلح».
وتابع: «لاعيبة الأهلي الكبار الموجودين في الأهلي مش زمايل ليا أو اصدقاء دول اخوات بمعني كلمة اخوات وعلي فكرة متعب وعبد الله السعيد روحوا معايا بعد الماتش، والمشهد اللي ظهرت فيه وانا على الخط متعصب ده بسبب احساسي أن فريقي اتعرض لظلم باحتساب 6 دقائق وقت بدل ضائع وده من وجهة نظري».
واستكمل: «رغم اعتراضي الا انني لم ولن اتلفظ بأي كلام للحكم الذي أكن له كل احترام، والنادي الأهلي علمنا الاخلاص والاجتهاد والابتعاد عن أي شبهة وضرورة النزاهة دائمًا والحمد لله الواحد دائمًا بيحاول يعمل ده علشان هو ده اللي اتربيت عليه في النادي».
واختتم: «مبروك للأهلي اللي بتمني من كل قلبي أنه يكون بطل الدوري، ومبروك للإنتاج الحربي الأداء الرجولي الجيد امام فريق كبير، شوقي غريب مدرب بجد محترم».