أصل الحكاية

المال السايب!

طبيعي جداً ان يكون المهندس أحمد عز في السجن الآن.. وطبيعي كمان ان يظل «الفلول» القابضون علي مفاصل بلدنا باقين حتي الآن.. لسبب مهم جدا.. لان المال السايب بيعلم السرقة.. مثل اعرفه ونعرفه جميعاً ونراه في ربوع المحروسة طول عمرنا.. أي مكان ما فيهوش حساب أو محاسبة تلاقي الحرامية بيلعبوا براحتهم.
أحمد عز «ملقاش» حد يقول له: انت بتعمل أيه؟ فاشتري الدخيلة بفلوس البنوك.. البنوك اللي جايبة الفلوس من مدخرات التوفير اللي بجنيه وبمائة وبألف علشان تأخذ فايدة خمسة ولا عشرة في المائة.. ولأن عز لم يسأله حد، أكل البلد كلها.. عز «دلوقتي» مستغرب قوي وتلاقيه بيقول: أنا هنا ليه؟!
كمان جماعة الخير.. لا.. جماعة الفساد اللي بيسموهم: «الفلول».. مازالوا موجودين.. أنا شخصياً شايفهم في كل مكان، في كل صباح، وفي كل مساء، بيتحركوا وبيتكلموا وكمان
ب "هبشوا".. عارفين ليه؟.. لان محدش بيسألهم: انت بتعلموا أيه؟.. الثورة لسه في التحرير.. وهمه لسه معاهم مفاتيح الكرار!!
نرجع لشغلنا اللي هو الرياضة.. من زمان قوي وانا باكتب علي هجمة نجوم الكورة علي كاميرات الفضائيات.. هات يارغي.. لت وعجن.. وفضائح «وجرس».. اللي بيحصل في اتحاد الكورة ، بعد 3 دقائق تلاقيه علي شاشة فضائية.. طبعا صاحب الشاشة سعيد لان الاخ بيأخذ حق غيره وحق الدنيا كلها.. بيأخذ الاسرار والخطط والحكايات طازة في طازة.. والفضائية تجذب اعلانا.. والاعلان يجيب فلوس.. وفلوس تملأ خزائن «المعلم» والمعلم يعطي الكابتن والكابتن عينه ما «تتملاش»، لو جت له فضائية تانية ودفعت جنيه زيادة تلاقيه نط وغير جلده وهات يارغي.. والغلابة علي القهاوي «مبحلقين» وفاتحين «بقهم».. وبيدخله «الدبان» وحاجة تقرف!
المنظومة الشيطانية اللي حتودينا في داهية سببها ان مفيش حد بيسأل ولابيحاسب.. يبقي طبيعي كل «هبيش» يعمل اللي هو عاوزه.. تصدقوا ان اتحاد كرة القدم لسه فاكر يمنع موظفيه أو اعضائه أو المنتمين والداخلين خارجين منه باعتبارهم أصحاب البيت في العمل في «سبوبة» الفضائيات.. حالنا مش حيتعدل إلا لما السرقة تتوقف.. حتي لو كانت سرقة: «خبر» أو «حدوتة».