نفسي أروح شرم الشيخ!

يا باختك ياريس.. اقصد ياريس »سابقا«.. قاعد في شرم الشيخ يا عم ومزاجك عال العال.. بزمتك في احلي من كده.. أخرب الدنيا.. وأبوظ البلد.. واتعاقب بأجازة في شرم الشيخ.. حاجة آخر حلاوة.. بختك التاء مكسوره يا ماما سوزان.. وانت كمان يا عم علاء ويا عم جمال.. بس اللي مزعلني انه شوية اسابيع والجو حيولع نار وحتي الحرارة 54 والشمس حتكون قريبة من نفوخكم .. لكن طبعا »التكييف موجود«.
طبعا أنا بهذر.. ليه؟.. لاني لا أتمني ان أكون مكانكم والعياذ بالله.. الشر بره وبعيد.. ولا مال الدنيا كلها يساوي ساعة واحدة.. اتهام.. ولا دقيقة علي بورش.. ولا ثانية خلف القضبان.. ولا ثانية امام محقق.
لو كنت مكانكم لاعترفت.. لو كنت مكانكم لا رجعت كل مليم واتركونا نحكم عليكم.. يمكن نكون أرحم منكم.. يمكن نعفو عنكم.. يمكن علشان كنت يوما لنا رئيسا.. وكنت يوما لنا بطل.. ايام البطولة اللي صعبانة علي قوي.
بيتهيئلي ان الجماعة البعدة محدش حايسامحهم.. آلاف أفدنة وملايين الامتار.. ومليارات الجنيهات.. لا جنيهات ايه.. الدولارات.. حتودوا كل ده فين.. ولا فين؟