آخر كلام

× إيه الفوضى والهرتلة دى..؟!
إزاى "الكوسة" ترتفع أسعارها بالشكل الخرافى دا..؟!
الناس هاتمشى مصالحها إزاى..؟! فالكوسة هى اللى بتفتح كل الأبواب المقفولة وبتحل أى مشكلة مهولة.. وهى اللى بتعين الحبايب والقرايب.. وهى كلمة السر فى كل الوزارات والمحليات.. وهى اللى بتجوز الولاد والبنات وبترجع للدنيا أى حد مات..!
آه يا دماغى..!!
× الناس اللى عينيها تفلق الحجر بيقولوا ليه الراقصة بتاخد 60 ألف جنيه فى الساعة.. هى بتعمل إيه يعنى..؟!
يا جماعة الرقص دا "علم" بحره واسع..بياخدوا فيه دكتوراه وماجستير.. علشان كدا الرقاصة اسمها "عالمة"..!
كفاية عليها بس تعمل حركة القبة..والرعشة والقصعة.. والرقص بالشمعدان والكوليشنكان.. دا شغل عالى قوى..!
وبعدين إنتم باصين للرقاصين الغلابة اللى بياخدوا 60 ألف ملطوش فى الساعة؛ وسايبين "المطبلاتية" بتوع "إعلام ما قال لى وقلت له ياعوازل فلفلوا"؛ اللى بياخدوا ملايين على قلبهم مقابل الطبل والزمر والهيء والميء والدريبئ..!
وماحدش يسألنى يعنى إيه طبل وزمر..على أساس إنكم كلكم طبعا عارفين يعنى إيه هيئ ميئ ودريبئ..!!
× إيه كم التفاهة والهيافة دى..؟!
القيامة قايمة على ممثل لإنه لم يسلم على واحد مد له إيده..!
اللى يقول عليه مغرور.. واللى يقول هو نسى نفسه.. واللى يقول سبحان العاطى الوهاب بعد الشبشب والقبقاب؛ والست مرات حضرته طلعت تقول: يا ناس احترموا تاريخه.. وهاتك يا هرى فى كلام لا بيودى ولا بيجيب..!
جرى إيه يا جماعة.. دا ممثل.. يعنى لا هو أينشتاين صاحب نظرية النسبية ولا هو إديسون ونيكولا تسلا مخترع الكهربا.. ولا هو "محسن حسنين" مخترع طاجن المسقعة باللحمة المفرومة..!
اتلموا بقى..!
×.. ولأن التفاهة فى بلدنا، صاحبة حضارة السبعتلاف سنة، عرض مستمر من أيام "بس" إله المسخرة عند المصريين القدماء.. فقد قامت الدنيا ولم تقعد على ممثلة مخضرمة محترمة؛ لأن واحد من دور أحفادها حط إيده على كتفها.. فشالتها..!
يا ليلة سودا إزاى تشيل إيده من على كتفها.. وهاتك يا تهزىء فى الممثلة وكأنها عملت الدنيئة، أو غلطت فى البخارى..!!
فكرونى بالمثل اللى بيقول: "علمنى يابا التفاهة.. قال له تعالى يا ابنى فى الهايفة واتصدر"..!
× عشم إبليس فى الجنة..!
ليست نكتة.. فالحاج أبو حنان بيقول إنه عاوز يخش الجنة لدوره فى إحلال السلام العالمى.. بأمارة إيه مش عارف..؟!
فكرنى بالراجل السكران اللى سأل شيخا: هل تنفع الصلاة من غير وضوء..؟!
فرد عليه الشيخ غاضبا: لا طبعًا لا تنفع..فقال السكران بكل نطاعة: لكننى صليت من غير وضوء.. ونفعت..!!