آخر كلام

× عايز أرد على كلاب السكك وصراصير البلاعات، من بتوع حماس وإخوان الشياطين الذين يهاجمون مصر الآن، الرد الذى يليق بهم لكننى خايف أخدش الحياء العام.. وأنا زى ما أنتم عارفين راجل مؤدب ومابتخرجش العيبة منى أبدًا..!
× عبيط وللا بيستعبط..؟!
خليل "الحية" بتاع حماس اللى بيلقح على مصر وبيتهمها بأنها سايبة أهل غزة يموتوا من الجوع؛ واضح أنه لا عبيط ولا بيستعبط دا سايق الهبالة على الشيطنة وبينفذ أجندة أسياده فى تصعيد الحملة المسعورة على مصر؛ رغم كل ما قدمته مصر وتقدمه للقضية الفلسطينية وللشعب الفلسطينى.
عمومًا إذا كنت إنت "حية"، فمصر فيها "رفاعية" بيعرفوا إزاى يتعاملوا مع التعابين اللى زيك يا "حية"..!
× أستاذة الفقه المقارن "إياها" تستاهل كل اللى يجرى لها..!
إنت مالك ومال الحشيش حلال ولا حرام..؟!
خلاص انتهت كل مشاكلنا ولم يبق إلا تحليل شرب الحشيش..!
إن شاء الله إنت والأخ "الضلالى" عاشق الأضواء بتاع جواز التضحية بفرخة، لكم من الله ما تستحقون نظير ما شوهتم الدين وأغرقتم الناس فى التفاهة..
× صديق لى بدرجة وزير، مابيعرفش الهزار أبدًا لكنه عالِم كبير فى تكنولوجيا المعلومات، كتب معلقًا على ما كتبته الأسبوع الماضى قائلا: ربنا يرزقك رزق راغب علامة فى حفلة الساحل..!
رددت عليه: ولكم بمثل مادعوتم لى..!
واضح إن حفلة راغب عاملة قلبان فى البلد كلها؛ وخلت الناس كلها تقلش..!
نسأل الله العفو والعافية..
× ياليلة سودا إيه اللى بيحصل لرجلاتك يا مصر..؟!
واحدة بتقول إن جوزها، خدوا بالكم جوزها، إداها عشر تلاف جنيه علشان باست راغب علامة فى حفلة الساحل..!!
أما راغب علامة نفسه فبيقول فى برنامج تليفزيونى إن زوجًا مصريًا ترجاه أن يبوس مراته، مرات الزوج مش مرات راغب، حتى لا تخلعه..!
مرة تانية وتالتة ورابعة يا ليلة سودا هى بقت كدا..!
واضح إن الرجولة بعافية حبتين اليومين دول.. والمصيبة السودا إن الرجولة هى الحاجة الوحيدة اللى مالهاش قطع غيار..!!
× خدوا بقى التقيلة دى..!
"راجل" ناشر صورته على الفيس بوك وهو بيعيط وبيستغيث بالناس تنقذه من مراته اللى بتضربه لما مايعملش شغل البيت.. وبيقول إنه اكتشف كمان أنها متجوزة عليه من سنتين..!
نعم يا سوسو.. والناس هاتعمل لحضرتك إيه..؟!
دا أنت كدا مش جوزها دا إنت أختها الكبيرة..!
نصيحتى لك: إلبس طرحة واكشف راسك وادعى عليها ساعة المغربية.. علشان تبقى دعوة ولية ساعة مغربية..!
يخرب بيت الفراخ البيضا وهرمونات الفراخ البيضا اللى مبهدلة الرجالة..!