آخر كلام

× سيكتب التاريخ أن رئيس أقوى دولة فى أوربا تجول فى أزحم حى شعبى فى مصر المحروسة ويده فى يد قائد مصر بأمن وأمان فى حماية ورعاية الشعب المصرى العظيم..
مش كدا وبس.. دا شرب شاى بالنعناع.
× فى تقديرى أن الزيارة أتاحت للرئيس الفرنسى أن يختلط برجل الشارع المصرى العادى؛ وأن يحس بنبضه ويلمس بصدق ، دون أى رسميات أو تزويق دبلوماسى، عظمة هذا الشعب ومدى حبه وإحترامه للشعب الفرنسى العظيم ورئيسه؛ الذى وصفته منذ أيام بإنه راجل من ضهر راجل؛ لإنه قال لأمنا الغولة فى عقر بيتها الأبيض : إنت عينك حمرا..!!
× والرسائل التى وجهتها الزيارة لا حصر لها؛ لكن أهمها فى نظرى هى رسالة "للغولة أم عين حمرا" تؤكد أن مصر تحظى باحترام وتأييد العالم الحر لأنها دولة صاحبة حضارة عريقة عظيمة.. رائدة وقائدة فى محيطها والعالم؛ وليست جمهورية موز فى الفناء الخلفى لأمنا الغولة تؤمر فتطيع..!
ياريت أمنا الغولة تفهم وتعى كل هذه الرسائل هى و"أم قويق" مجرمة الحرب برخصة اللى إيديها ملطخة بدماء النساء والأطفال..!
× سؤالى للمحترم المهذب دولة رئيس الوزراء: إنت بتختار وزراءك منين بالضبط..؟!
فوزير الصحة قال لمريض بيغسل كلى: قبل ما تشتكى إحمد ربنا إن الحكومة عملت لك مستشفى..!
ووزير التربية والتعليم تقمص دور صاحب طابونة عيش بلدى وقال لمدير مديرية تعليم: إنت مرفود.. المعلم مبسوط منك وبيقول لك ماتجيش بكرة..!
فسقط الراجل من طوله.. ومات..!
أما وزير التموين السابق، شفاه الله وعافاه من السرطان، فقال ساخرًا من محدودى الدخل: هما بيتقنزحوا ليه.. مش يحمدوا ربنا إنهم بياخدوا تموين على البطاقات..؟!
أنا طبعا عارف النوعية دى من الوزرا بتيجى منين بس مش هاأقول حتى لا أقع فى الغلط..!
فمصيبتى السودا إنى ساعة الغلط باأطرطش زلط..!
× يا عالم ياهووو.. معقولة أن رسوم أى بنك فى الدنيا تصل إلى 95% من قيمة الحساب..؟!
حصلت معايا فقد فتحت حسابا بألف جنيه فى بنك الإسكان والتعمير ففوجئت بأنه أصبح 50 جنيها فقط.. أى والله العظيم ..!
ولما شكوت لرئيس البنك أكد لى بالنص: فعلا أنا معاك أن الرسوم شكلها غريب جدًا..لكن الحسبة صحيحة..!
فكرنى بنكتة "السيستم" البايخة اللى بتؤكد إن الدنيا بايظة لكن السيستم عال العال..!
ياريت محافظ البنك المركزى المحترم يشوف لنا حل فى سيستم بنك الإسكان والتعمير اللى من الواضح إنه محتاج ضبط زوايا..!