لا إنت ولا غيرك ولا اللى تعرفهم ولا اللى جابوك ولا اللى يتشددولك ولا اللى إنت فاكره هيحميك يقدر يولع فى مصر ولا يهز البلد، لا الصوت العالى ولا قلة الأدب ولا الشتائم ولا الإهانة والخوض فى أعراض الناس ولا التمثيل والدهاء والمسكنة ولا أى وجه بتظهر بيه فى أى حتة بقى بيخوف أى حد، إنت مجرد فقرة للتسلية كان لها دورها فى وقت انتهى.
إنت عارف إن دورك انتهى مش مصر اللى هتاخد حقها، ولاد مصر كتير يا مرتضى، احترم بلدك اللى إنت عايز تولع فيها، وإذا كانت أعصابك فلتت لما عرفت أن دورك انتهى وأن المسرحية خلصت، واسأل عكاشة، وامسك أعصابك الجاى أحلى، إذا كنت قدرت تقول «أحذرك يا سيسى»، وعدت لأنك مش فى دماغ الكبير ومش عاملك قيمة مهما تقول، لكن الكبير ابن مصر خلاص مش هيسيبك، إنت المحامى اللى جبتلنا العار فى الرياضة بالتعاون مع الوكيل الإسرائيلى، وباركت اتهام مصر بالحرب الأهلية من أجل التهرب من مستحقات لاعبين ساهموا فى صنع تاريخ الزمالك الأبيض العظيم الذى تلطخ على يديك فى معارك لا شأن للكيان الكبير بها.
مصر كلها مش هتسيبك يا مرتضى ولو راجل كررها، خلاص اللعبة انتهت، والأيام الجاية هتأكد كلامى، وهتدفع الثمن غالى وبكررها تانى، لو راجل وابن راجل احبسنى زى ما قلت على الهوا فى قناة LTC مع خالد الغندور، اللى قلت معاه هحبسك يا إيهاب يا خطيب وهسمعهالك تانى، لا أنت ولا اللى يتشددولك تقدر تحبسنى، قضاء مصر الشامخ، وقضاة مصر الشرفاء وقانون مصر اللى عايز تولع فيها أكبر منك وأنا أحترم كل ما سبق، وأصونه.
ومعاك للنهاية أنا، وكل ولاد مصر الشرفاء، من الكبير أوى لأصغر واحد على أرض مصر عايزين ننضف البلد من الشتائم، عايزين نرجع الأخلاق، كفاية قلة أدب، الرسالة إلى الجميع، مش للمحامى بس، وكمان لخالد الغندور بوق الفتنة وناشر التعصب ومعلن وناقل الشتائم والسباب، ريهام سعيد دفعت ثمن غلق برنامجها بسبب نشر صور لفتاة دون علمها بذلك، فما بالك بوصلات الردح والشتائم وقلة الأدب فى نشرة المحامى مرتضى كل يوم.
إلى كل وسائل الإعلام المحترمة حان الوقت لمقاطعة الغندور وحرمانه من الظهور على شاشات الفضائيات، لأنه ضد أخلاق مصر ولن أتحدث أكثر من ذلك عن «الغندور» الذى كنت أحترمه كلاعب فى نادى الزمالك العظيم ولاعب لمنتخب مصر، وهو الآن الذى لم يستطع الرد على المحامى حتى وهو يتطاول عليه ويتعصب عليه.
هو مين صاحب البرنامج، شكلك وحش قوى يا خالد بس على فكرة هو ده شكلك الطبيعى اللى إنت خليت نفسك فيه، كل يوم زمايل عمرك يتشتموا عندك، ورموز الزمالك فاكر المحترم والخلوق حازم إمام قال عليك إيه، المهم إنت زيك زى المحامى مرتضى، مصر اللى هتولعوا فيها وكل يوم تغلطوا فى ولادها خلاص ولادها قدها وقدود، وإلى كل إعلامى وصحفى ومحترم وابن من أبناء مصر اليوم، سينطلق هاشتاج #أرحل - يا - غندور - كفاية، وسترى حجمك الحقيقى إنت والمحامى بتاعك.
تشويه صورة مصر بادعاء الحرب الأهلية فى مخاطبات رسمية لن يمر مرور الكرام، أما عن التطاول وكلمات هولع فى مصر كلها، ولاد مصر من الكبير أوى لأصغر واحد فيها هيعرفوك مين مصر.