تناتيش

* الممثلة منة شلبى قالت فى حوارها مع إحدى المجلات إن الرئيس السابق مبارك طلبها بالاسم علشان يكرمها..!!
طبعاً أنا لسانى عايز يقول حاجات كتير بس خايف لا أدخل تحت طائلة القانون، لذلك أكتفى بكلمتين بس «نو.. كومينت» يعنى لا تعليق!! إنجليزى ده يا مرسى؟!..
* سواق كاتب على التوك توك بيقول: إذا وقع بيت أبوك.. خدلك منه قالب.. واجرى!!
سواق تانى بيقول: إذا جالك الطوفان حط ابنك تحت رجلك.. واجرى..!!
الحمد لله إن سواقين التوك توك مش أصحاب قرار فى حكومة الدكتور شرف.. وإلا كانوا خربوها وقعدوا على تلها..!!
* كلما شاهدت عمايل سواقين الميكروباص اليومين دول فى شوارعنا تأكدت من أنهم مش واخدين رخص سواقة زى كل خلق الله من إدارة المرور.. دول لقيوها فى أكياس الشيبسى..!!
* كل برامج المقالب بتاعة رمضان السنة دى عبيطة وسخيفة، زى كل سنة، وحسين الإمام بيكرر نفسه.. وبيستظرف، ورامز جلال.. بيستخف بعقولنا..!
هى الناس دى مابتتكسفش خالص؟!
* أنا زعلان قوى من الفنان الجامد قوى أحمد مكى.. فعلى الرغم من أن أغنيته الجديدة «فيس بوكى» مكسرة الدنيا ومجننة الشباب، إلا أننى أرى أنها هايفة وتهييس فى تهييس ولا تختلف كثيراً عن أغانى البانجو بتاعة اليومين دول..!
قال إيه الأغنية بتقول: أنا ماليش أكاونت على الفيس بوك اسمع من مكى.. خد بالك من اللى بيعمل فيس بوكه إنه فيس بوكى..!!
إيه التفاهة دى.. يقطع البانجو وسنين البانجو..!!
* كلمة ورد غطاها:
* القذافى اختفى تماماً.. أنا شاكك إنه هرب للجزائر أو تشاد..!
** أنا شخصياً.. لأنى عارف إن القذافى أذكى إخواته.. فأنا شاكك إنه هرب.. إلى ليبيا..!!