تناتيش

* للمرة الثانية.. أجد نفسى مضطراً للتعليق على كلام أستاذى وأستاذ أساتذتى محمد حسنين هيكل.. فكون حضرته يصور الضربة الجوية الأولى ضد العدو الصهيونى فى حرب 1973 على أنها كانت مجرد مظاهرة لرفع الروح المعنوية للجنود المصريين فده كلام غريب جداً..!
فحرب 73 لم تكن لعبة «أتارى» يا أستاذ بل كانت حرباً حقيقية شارك فيها مصريون وطنيون من لحم ودم.. وقدموا فيها أرواحهم ودماءهم رخيصة من أجل تراب هذا الوطن..!
وبعدين يا أستاذ هيكل عيب أنك تصور حرب 73 على أنها زى فرح العمدة.. كل واحد يضرب له عيارين تلاتة مجاملة للعريس والعروسة.. وكل عام وأنتم بخير، وسمّعنى يا جدع سلام الصُلح خير قوم اتصالح.. الصلح خير..!
يا ريت نتقى الله شوية فى مصر..!!
* يا خرابى على اللطافة والظرافة.. ففى الوقت اللى الشباب العربى فيه بيعملوا ثورات الربيع على الفيس بوك.. لجأ رئيس الوزراء الكندى ستيفن هاربر للفيس بوك علشان الناس تساعده فى اختيار اسم ل «قط» اشتراه مؤخراً..!!
نقول إيه..؟! ناس هايصة.. وناس لايصة..!!
* جميل جداً أن يقدم الكابتن حسن شحاتة استقالته من تدريب المنتخب.. الأجمل هو أن المنتخب كله يقدم استقالته..!
فالشعب كله بيقول للمنتخب: ارحل يعنى «جو».. عيب ماتقولش «نو»..!!
* بالمناسبة.. مش عارف الناس زعلانة ليه للخروج من التصفيات المؤهلة لكأس الأمم الأفريقية؟! يا جماعة دى النقطة اليتيمة اللى كنا واخدينها قبل ماتش جنوب أفريقيا ماتدخلناش ولا حتى التصفيات المؤهلة لبطولة حوارى دوران شبرا..!
* كلمة ورد غطاها:
* بوصفك جهبذ من جهابذة اللغة العربية.. ما هو مفرد فلول..؟!
** ودى عايزة جهبذة يا هندزة.. المفرد المذكر للفلول هى «فل».. والمفرد المؤنث هو «فِلة»..!!
بالمناسبة هو حضرتك عامل لى فيها فل ولاّ فِلة..؟!!