تناتيش

* بعد أن استقر البيه والهانم فى مستشفى شرم.. مش ناقص غير إنهم يجيبوا لهم شجرة واتنين ليمون.. وأباجورة..!!
* المحاكمات والتحقيقات التى تجرى الآن مع رموز النظام السابق كشفت عن حقيقة خطيرة جداً؛ وهى أن من يسرق رغيفاً يروح اللومان.. ومن يسرق ملياراً يروح.. مارينا..!!
* بعد أن اقترحت اللجنة المكلفة بإعداد مشروعات قوانين مباشرة الحقوق السياسية استبعاد رمز «الجمل» من الرموز الانتخابية.. يا ريت يتموا جميلهم ويستبعدوا «الجمل» نفسه..!!
* وإيه يعنى لما إسرائيل تسرق «الطعمية» المصرية وتدخل بها موسوعة جينيس..؟!
يعنى هما اللى سرقوا وطن بحاله.. هايستعصى عليهم يسرقوا شوية طعمية.. لا راحت ولا جت..!
* إيه الظلم ده.. عالم بتاع شهادات بصحيح قال بيتكلموا عن مهرجان الصابون فى روسيا، ومهرجان البصل فى سويسرا ومهرجان الليمون والبرتقال فى فرنسا.. ونسيوا خالص مهرجان الكوسة والقرع اللى بيتعمل كل يوم فى مصر..!!
* بعد حبس دومينيك شتراوس مدير عام صندوق النقد الدولى بتهمة التحرش الجنسى بخدّامة، أى والله خدّامة، ياريت يحاكموه بالمرة على تحرشه كمدير للصندوق بالدول النامية والفقيرة..!
* صدقونى الزمالك مش بيفوز بعبقرية مدربه حسام حسن.. دا بيفوز برِجل شيكابالا.. وببركة دعا الوالدين!
* كلمة ورد غطاها:
* الكابتن ماهر عبد العزيز عضو مجلس إدارة نادى الزمالك بيسأل وبراءة الأطفال فى عينيه: إمتى الزمالك بقى هاياخد الدورى..؟!
* * ما أنا قلت قبل كده يا أبو الكباتن.. الزمالك هاياخد الدورى يوم 30 فبراير بالضبط..!!