المخرفاتي سألني وقاللي.. قوللي يا أبو خليل.. همه كانوا بيلفوا وبيدوروا كلهم علي ايه قلتله مش فاهمك يا مخرفاتي.. همه مين دول اللي كانوا بيلفوا وبيدوروا. قاللي انت مش كنت قاعد مسهم ومركز علي خطبة التحديات. قلتله ايه حكاية خطبة التحديات اللي بتقول عليها دي.. المخرفاتي قاللي دا مش أنا اللي بقول دولهمه اللي قالوا.. قلتله دولهمه مين.. قاللي بتوع الحكومة وعلي لسان رئيسها.. الخطاب ياراجل اللي استعرض فيه السيد نظيف التحديات اللي حتخوضها الحكومة.. الخطاب اللي القاه في مؤتمر الحزب الوطني.. أنا الحقيقة افتكرت وقلتلته ايوه يا مخرفاتي أنا افتكرت دلوقتي قاللي طب قوللي بأه فاكر لما سيادته بص كده للناس بمعلمه كده وقالهم نيجي بأه للتحدي اللي كلنا بنلف وبندور حواليه قلتلهإيواه فاكر.. وهمه كانوا بيلفوا وبيدوروا عشان يحاولوا يشوفوا سكة عشان يلغوا الدعم اللي مخلي الناس لسه عايشه.. يعني كانوا سايبين الريس يقف ويطمن الناس انه مش حيلغي الدعم ويؤكد انه لا مساس بيه. وهمه بأه من وراه عمالين يلفوا ويدوروا عشان يدوروا علي سكة يقنعوا بيها الريس بالغاء الدعم.. قلتله انت يا مخرفاتي قاصدك يعني تقول ان الريس ماشي في سكة.. وهمه عمالين يدعبثوا من وراه علي سكة تانية خالص. المخرفاتي قاللي ايوه ما هي وضحت من كلام السيد رئيس الحكومة وقالها بصراحة وباللفظ قال تحدي الدعم اللي كلنا كنا بنلف وبندور حواليه "أنا قلت للمخرفاتي يا نهارك اسود يا مخرفاتي.. انت يا جدع مش ختخلع من دماغي إلا لما جتجيبلي الهلع.. المخرفاتي قاللي وحجيبلك انا الهلع ليه.. هوه انا اللي حلغي الدعم.. قلتله يا جدع انت ما هو كما قال انه حيعوض الفقراء عن الدعم بانه حيدهولهم دعم نقدي المخرفاتي قاللي حيدي لمين الدعم النقدي ده.. قلتله حيديه للفقير.. المخرفاتي قاللي طيب تقدر يا أبو خليل تعرفللي من هو الفقير اللي يستحق الدعم النقدي.. أنا الحقيقة سكت.. لاني حسيت انه غلب حماري.. فرديت علي المخرفاتي بحدة وقلتله وأنا ادور علي تعريف من هو الفقير ازاي.. المخرفاتي قاللي علي رأيك .. اذا كانت كل الحكومات من أيام الثورة ولغاية دلوقتي مقدرتش تعرف من هو العامل ومن هو الفلاح تبقي انت حتعرف.. والحقيقة بأه ولا همه كمان حيعرفوا.. طب يا أبوخليل حيقدروا يوصلوا الدعم للفقراء مستحقيه ازاي.. فين الدراسات اللي نتيجتها تطلع كشوف فيها اسماء اللي حيدوهم الدعم النقدي من بين سبعين مليون مصري.. دي حتبقي ربكه ما اكبرها ربكة يعني مثلا حيدوا لكل فقير بطاقة لما يروح يشتري كيلو طماطم يطلع للخضري بطاقة الفقر ويقوله انا فقير يقوم الخضري يديله كيلو الطماطم ارخص.. والاحيعملوا اسواق مخصوصة للفقرا ما يدخلش من بوابتها إلا الفقير اللي شايل بطاقة الفقر.. هي البلد يا أبوخليل ناقصة رابكة عشان يربكوها أكتر.. تقدر تقوللي يا صاحبي بعد الغاء الدعم رغيف العيش أبوشلن حيبقي بكام قلتله حيبقي بربع جنيه.. قاللي طب انبوبة البوتاجاز اللي بستة جنيه وبتجيلك البيت بعشرة حتبقي بكام.. قلتله انا قريت النهارده في الجرائد ان الحكومة بتدعمها ب 37 جنيها يعني حتبقي ب 43 جنيها.. قاللي وكيلو الكهربا حيبقي بكام.. ولتر الميه ساعتها حندفع فيه كام.. والمواصلات المدعمة بعد شيل الدعم حتبقي التذكرة بكام وغيره وغيره وغيره.... أنا قلتله والله يا مخرفاتي انت لك حق ده كده اللي حيبقي دخله هوه وعيلته 2000 جنيه في الشهر مش حيعرف يعيش. يعني يروح يموت احسن... المخرفاتي قاللي طب ما هو ده اللي همه عايزينه يخففوا التعداد شويه.. ما همه فشلوا في السيطرة علي خلفه الناس بتحديد النسل.. قالك يبقي نموتهم أسهل.. قلتله طب والعمل يا مخرفاتي.. قاللي مابدهاش.. زي ما دايما الريس هوه اللي بينقذ الشعب من ايديهم يبقي ما قدمناش غير الريس. قلتلته يعني نعمل ايه.. المخرفاتي قاللي نصرخ من جوانا باعلي صوتنا ونقوله سايق عليك النبي ياريس ما تسمع كلامهم .. ولا تصدق اللي حيقولوهولك.