مساء الخير.... بودرة العفريت

إحنا مش هانعرف أكثر من العلماء..!! فبعد أن أكدت كل الأبحاث والدراسات التي أجريت في القرن الماضي أن ثورة القرن الحادي والعشرين لن تكون في الطاقة النووية أو علم الفضاء أو في أسلحة الدمار الشامل بتاعة عم الأرموطي، بل ستكون في أمر أخطر من ذلك بكثير..!! قال إيه ستكون في حقل الجينات الوراثية أو الموروثات يعني إيه يا عمنا..؟! يعني المجهول الذي يعكف عليه العلماء وتضع فيه الشركات الكبيرة اليومين دول أموالا تقدر بالمليارات..! والأخطر يا عالم ياللي عايشين تدوروا علي الأكل والشرب وركوب العربيات والضرب في بعض أن الحكومات الكبيرة تتسابق لمعرفة أغوار وأسرار ذلك العالم المجهول الرهيب.. منهم من يهدف إلي البحث عن الربح زي شركات الأدوية أما الطرف الأخطر الحكومات التي تسعي للسيطرة علي العالم وتهدد بتغيير نظام الكون بكائنات لا يعلم الله ماذا ستفعل بالإنسان..!! يقول إيه في جرائدهم وفضائياتهم إن الشغل واللعب في الموروثات ينطوي علي احتمالين.. واحد جيد وكويس لصالح عمنا الإنسان والتاني سيئ وهايودي الدنيا في داهية سودة! ليه بقي يا عم..؟! علشان اللعب في المجهول خطر معقولة العلماء يلعبوا في عداد عمر الإنسانية.. مش كفاية حكايات القنبلة الذرية وأسلحة الدمار اللي بيقولوا عنها..؟! قال إيه.. العلماء يبحثون عن تحسين النسل لدي الإنسان والحيوان والقضاء علي الأمراض المستعصية كالسرطان والحصول علي أنواع أفضل من المزورعات، بل وتنظيم عمل البكتيريا لتخدم الإنسان!!
أقطع دراعي من لغلوغه لو حد من القراء فاهم حاجة..! أنا بقي هأقول لكم الحكاية بحكم أن جد جد جد جدي كان عالم في أصول البدنجان والفاصوليا والطماطم اللي مدوخانه!!
الحكاية يا إخوانا حسب ما الواحد بيفهم علي قده احتمالية أن الأبحاث اللي يبعملوها تودينا في داهية واحتمال أن الأبحاث تخرج أو تهرب من ايديهم سواء في كائنات غريبة مخيفة أو فيروسات قاتلة تدمر العالم ومش بعيد تظهر لنا أمنا الغولة والحاجة الطيبة النداهة وعم الحاج عفراكوش وأبورجل مسلوخة والشيخ كباب اللي أمي كانت مدوخاني بيه وأنا طفل ولما كبرت قلت ياريت كان طلعلي علشان اتذوق طعم الكباب..!!
ورغم ذلك جربت معظم الحكومات الكبيرة لتنظيم العمل في هذا المجال وجعلته تحت سيطرتها قبل أن يصبح الأمر مستحيلاً.. رغم حجم الأبحاث الرهيبة والتوقعات المثيرة في عالم الجينات..!! أما إحنا بقي يا سلام علي الحلاوة والجمال والدماغ العالية.. جرينا علي طول وغيرنا اسم أكاديمية البحث العلمي إلي الاكاديمية المصرية للعلوم والتكنولوجيا! ليه بقي يا عم علشان الاسم الأولاني نحس وجاب الفقر للاكاديمية قبل ميعاده..! وزي ما بيقول الناس داخل الاكاديمية الحمد لله إحنا لا بنعاني من فقر في الانفاق ولا من قلة عدد الباحثين ولا من المعامل القديمة المتهالكة ولا من عدم استفادة المجتمع من الابحاث مشكلتنا الوحيدة اللي جايبانا ورا هو موضوع اسم الاكاديمية النحس والحمد لله تم تغييره وقالوا إيه كمان حبايبنا داخل الاكاديمية.. احنا مش محتاجين حاجة وسيبونا في حالنا وإحنا هانكسر الدنيا بعد أربعمائة سنة إن شاء الله..!! بصراحة أنا مش داخل مخي خالص إن الاكاديمية هاتكسر الدنيا بعد أربعمائة سنة.. دي الاكاديمية عندها سر رهيب وهاتفجر الدنيا قريب بعد اكتشاف المسحوق الرهيب المستخلص من بودرة العفريت اللي هايغير نظام الكون ويرجع طاقية الاخفا بتاعة عبدالمنعم إبراهيم علشان العالم كله يعرف إن العلماء في مصر لا أي أي ولا زي زي بالصلاة علي النبي..!!