يانايم فى العسل

معقولة المصريين اليومين دول اتجننوا ومافيش حاجة تشغلهم غير الحجاب والنقاب والجلباب وإطلاق اللحية وقص الشارب..؟!
معقولة الناس تتلهى على عينها وتفكر بس فى حكايات نسوان يلبسوا إيه ويخلعوا إيه وتنسى جوهر الدين الحنيف ببعض الشكليات الفارغة اللى لا بتودى ولا بتجيب.. وإشمعنا المسلمين بس هما اللى شاغلين دماغهم بكل هذه الأفكار التافهة الفاضية بتاع شغل المصاطب..؟!
لحية إيه ياعم أنت وهو اللى بتتكلموا عنها.. اليس كل الكفار أيام الرسول ملتحين.. وذقون غلاظ كبار طوال أولا الداهية المنيلة..؟!.
اليس معظم المفكرين والفلاسفة العظام كانوا بلحية مثل سقراط وإفلاطون وأرسطو وكارل ماركس زعيم الفكر الشيوعى ومعه على نفس الشاكلة فرويد ودارون..؟!
يا عالم اصحوا وصححوا وكفاية هوس وفوبيا وتفريع الدين الاسلامى الحنيف من الجواهر الثمينة والعظيمة اللى فيه وتأخذوا أنفسكم إلى معارك جانبية فيها كل ضلال وتضليل..!!
»أدعو إلى سبيل ربك بالحكمة والموعظة الحسنة وجادلهم بالتى هى أحسن ان ربك هو أعلم بمن ضل عن سبيله وهو أعلم بالمهتدين« 125 النحل.
وليعلم الجميع أن أى دين سماوى هو من عند الله فيه جوهر التسامح والمحبة والحفظ من عنده ايضاً.. ولا يحتاج للمتعصبين والمتشنجين والمزايدين والأرزقية والضلالية بأسم الدين فالله سبحانه وتعالى لم يعطى توكيلاً لأحد من البشر ليدافع عنه ولا عن انبياءه فهو قادر على كل شىء وعدم إعتراف الإنسان بقدرة الله سبحانه وتعالى على حماية دينية وبشره فهذا ضعف فى الايمان وفى قدرة الله فى خلقه هل هذا معقول..؟! يا عالم يا بشر المطلوب منكم العبادة الحقيقية لله وحده والثبات علي الإيمان..!
ولا تقولوا لما تصف ألسنتكم الكذب هذا حلال وهذا حرام لتفترون على الله الكذب ان الذين يفترون على الله الكذب لا يفلحون« النحل 116.
الكل عمال يتكلم ويجادل ويتشنج ويتعصب فى قضايا الصفصطة والرغى على القاضى والمليان مبتعدين كل البعد عن مشاكلنا التى نمر عليها مر الكرام دون المساس بها أو مناقشتها وإنما نحن مازلنا ندور حولها خايفين ان نقترب منها وعلشان نريح دمغنا نتكلم فى الدين ونعمل من الحبة قبة ويطول الحديث عن الهجس والدروشه ونتفرع إلى أحاديث عن التبول واقفاً واضراره.. وفائدة النحنحة عند دخول الحمام ورنة القبقاب فى قدم المرأة! وللأسف ما حدش كلف خاطره.. وقال يا جماعة حرام عليكم اللى بتعملوه فينا ده.. الناس فى العالم يدور حديثها عن الاقمار?الصناعية واختراق واحتلال الدول وكشف المستور فيها.. وإحنا بالصلاة على النبى كدة مقشفين ومش لاقيين اللضا وبنقول إحنا لينا الجنة!!.
أما ولاد الكلاب الكفار اللى ما عندهمش دم دول هايخشوا النار مش كفاية عليهم اتهنوا وتبغددوا فى الدنيا وكمان عاوزين الأخرة.. كان غيرهم أشطر..!! يا نايم فى العسل وعامل زيطة اصحى نامت عليك وعلى أمك حيطة..
فتكم بالعافية