مساء الخير..آه.. ياولاد الإيه..!

مساء
الخير
آه.. ياولاد الإيه..!
يبدو أننا في طريقنا إلي المراجعات والبحث عن الذات.. مراجعة كل شيء، حتي المسلمات التي تربت عليها أجيال بأكملها.. زي القومية العربية اللي فلقوا دماغنا بيها زمان! مناهضة الاستعمار والصهيونية العالمية اللي اصبحت أضحوكة وموضة قديمة.. وكمان الاشتراكية وحكاياتها العجيبة في عصر الستينيات!!
ومش كده وبس دي المراجعات هاتلم كمان حكاية أبوزيد الهلالي في توزيع الدخل القومي اللي احنا مشتاقين ليه زي عيلة عبده مشتاق بتاع زمان..!!
ناهيك عن مراجعات في مجانية التعليم إللي اصبحت ضحك علي الدقون.. وللا حكاية بابا نويل في تدعيم المواد الغذائية لمحدودي الدخل إللي ربنا ياخدهم علشان الحكومة تستريح منهم..!! يعني باختصار كده.. مراجعات شاملة ماحقة في كل شيء.. ده لو كنا عاوزين نفوق من الغيبوبة اللي سحبانه إلي عالم جهنم اليومين دول..!! وعلشان تكون مراجعتنا مظبوطة وتمام التمام وعشرة علي عشرة لازمن ولابد من عمل مراجعات حقيقية في الدين ونبحث عن تجار الدين اللي خربوا بيوتنا ووجعوا دماغنا وضعفوا ديننا الحنيف وخلوه علي لسان اللي يسوي واللي ما يسواش! ومش كده وبس.. ندور ونبحث داخل أنفسنا ونسأل بصراحة شديدة.. هو تدينا اللي احنا فيه الآن قريب الشبه من الدين الإسلامي الحنيف اللي جاء مع أشرف الخلق سيدنا .محمد. عليه أفضل الصلاة والسلام!! ولا اللي احنا فيه تدين لعقيدة تانية تطالب الإنسان بالانفصام في الشخصية واللوع والكذب وقلة الضمير والبراعة في استخدام أساليب الهبش والنبش.. وكأننا نعيش في غابة يحكمها قانون البقاء للأقوي والأصلح..!! يا جماعة الخير.. أصل الحكاية زادت عن حدها أوي في كل شيء.. وأصبحت الدنيا داخل مصر سايبة.. والحكومة تايهة ومش عارفة تعمل إيه واللا إيه..!! الزحام والفقر والتناقضات في كل شيء والضحك علي الدقون.. حتي المواطن المصري، عامل زي اللي المضروب علي دماغه وماشي في الدنيا سواح مش عارف رايح علي فين أو بيعمل إيه..!! ومحدش عارف حاجة..!! ولما تسأل وتقول فيه إيه..! تشوف العجب.. الناس كلها عارفة كل حاجة.. ويوهموك أنهم اللي مسكوا الهوي بإديهم..! وهمه يا عيني في غفلة وسرقاهم السكينة وعاملين زي الأطرش في الزفة! الحاجة اللي تغيظ وتفرس.. ويبقي الواحد عاوز يضرب دماغه في الحيط، لما تشوف المنظرة والفشخرة علي عباد الله من بعض الناس اللي ربنا كرمهم في دول الخليج..!! أول ما ينزلوا مصر يطلعوا كل العقد اللي شافوها هناك علي إخوانهم الغلابة المصريين اللي بيسألوا الله في حق النشوق..؟! ويتصرفوا تصرفات تسود عيشتنا وتكرهنا في أنفسنا وتحسسنا بمرارة عيشتنا!!
يا إخوانا حرام عليكم كفاية بقي اللي إحنا فيه يوم عسل ويوم بصل وبنحمد ربنا علي الصحة والستر مش ناقصة عقد ومنظرة فاضية علي خلق الله..!! بالمناسبة.. ماكتنش عارف اضحك وللا أبكي وأنا أتابع حواراً بين اتنين من أصحاب السيارات الغالية بتاعة الناس اللي حساباتها معدية في البنوك خبطوا بعض خبطة بسيطة لا تستدعي الوقوف والمنظرة أمام خلق الله اللي مش لاقي ياكل.. واحد منهما يتحدث بزهو المنتصر وقال بقين حامضنين وركب سيارته وفلسع..!! والتاني ماعجبهوش الكلام.. رد عليه بكلام فيه سفالة وقلة أدب ولا سكان تل العقارب..!! والله العظيم يا إخوانا الناس واقفة تتفرج علي دلع الأغنياء وتحديهم لبعض أمام الناس وكل واحد عاوز يتمنظر علي التاني ويثبت للناس إنه الوحيد ابن اللي بارم ديله..! نقول إيه؟! ليكم حق يا إخوانا.. اللي ليه ضهر ماينضربش علي بطنه..!