الحجار: الأغنية جت على الحتة الطرية.. لهذا يهاجمها الجميع

أكد المطرب علي الحجار مساء اليوم أن هناك حالة تعمد لإظهار أغنيتة " إحنا شعب وإنتو شعب" المثيرة للجدل على أنها تنشر التفرقة بين أطياف الشعب وترسخ التمييز بين الطبقات.
وكشف الحجار خلال حواره على فضائية "صدى البلد"، عن أن معنى كلمة "رب" في مقطع "لينا رب... وليكو رب" في أغنيته تعني "مسئول" وليس "الإله" كما يدعي منتقدوه.
ونفى الحجار أن الأغنية تدعو إلى التمييز أو التفرقة لأن التمييز بحسب اعتقاده كان موجودا بالفعل قبل إذاعة الأغنية وليس بسبب الأغنية، قائلا "الأغنية جت على الحتة الطرية لهذا هاجمها الكثير".
وعن بعض التعبيرات التي وردت في الأغنية مثل: "إحنا شعب وإنتم شعب"، أوضح الحجار أنها تقصد كل من يحاول السيطرة على عقول البسطاء باسم الدين، لأغراض في نفسه وتقصد أيضا كل أولئك الذين يرهبون الشعب.
وكانت الأغنية شغلت الرأي العام في مصر وواجه على الحجار والشاعر مدحت العدلي كاتب كلمات الأغنية عدة اتهامات من بينها التحريض على العنصرية والتفرقة بين أطياف المجتمع، واتهمه آخرون بالتحريض على إقصاء جماعة الإخوان المسلمين بعد عزلها عن حكم مصر.
إحنا شعب وإنتو شعب
إحنا شعب وإنتو شعب
واللى هز القلب منا
عمره ماهزلكو قلب
رغم إن الرب واحد ..
لينا رب... وليكو رب
وردة برية وبراءة
إحنا بنشوف الطفولة
وإنتو شايفينها سبايا
تثبتوا بيها الفحولة
إحنا يسعدنا خيالها
لما ترسم ف الكتاب
وإنتو لو عدى خيالها
يطلعلكوا فى ثانية ناب
إنتو بتحبوا الجهامة
وإحنا بنحب ابتسامة
إحنا حرية وكرامة
وإنتو سجن وشرع غاب
إحنا شعب وإنتو شعب
مصر بالنسبه لنا ثومة
والا ناصر أو حليم
مصر بالنسبه لكو خيمة
أو إمارة أو حريم
إحنا نفديها بحياتنا
ونحبها ونرضى بقليلها
وإنتو عايزين تنهبوها
وتسرقوا خيرها ونيلها
إحنا يسقط منا شهدا
زينة الدنيا وشبابها
وإنتوا قلتوا كنتوا سعدا
لما داسوا فوق ترابها
إحنا أقرب وإنتوا بعدا
إحنا ثورة وإنتو ردة
ياطابور خامس وقاعدة
للعدو الواقف ببابها
إحنا شعب وإنتو شعب
إحنا بنشوف ربنا
رحمة للعبد اللى تاه
عفو عن مخطئ مسىء
توبة أو طوق للنجاة
وإنتو تِعبان القبور
والمقارع للحريم
سد باب الرحمة غية
واللى يغلط ف الجحيم
واللى يضحك يبقى كافر
والعبوس آخره النعيم
إحنا بنحب الحياة
وإنتو أعداء الحياة
إحنا شعب وإنتو شعب
إحنا بنشوف الحقيقة
والعقيدة ف أى دين
كنت قبطى أو يهودى
والا ضمن المسلمين
رب واحد... معنى واحد
الرسالة يا مؤمنين
ماتكدبوش ماتغيروش
ف النوايا والوشوش
حب جارك زى أهلك
احفظه ولا تخونوش
وإنتو تيجو تخونوه
يختلف ف الرأى عنكو
تحلوا دمه وتقتلوه
وتقولوا ديننا قالنا
أى دين يا أدعيا
والا نبى م الأنبيا
يأمر بكافر تصلبوه
والا بوذى تبهدلوه
والا شيعى تكفروه
واللى بيفكر دا ضال
وتحرموا حتى الحلال
وتحللوا فكر الضلال
وتحكمونا يا أغبيا
إحنا شعب وإنتو شعب
إحنا شايفين الرسول
رحمة مهداة للبشر
سعى من أجل الوصول
للكمال المنتظر
إحنا شايفين إن ديننا
دعوة للنور والحضارة
وإنتوا حاصرينه ف حكاية
توب قصير أو ستارة
إحنا شايفين ابن سينا
وابن رشد والحسين
وإنتوا شايفين ابن لادن
والكهوف المظلمين
إحنا عشاق الإرادة
والحقيقة واليقين
وإنتو تجار المنابر
والبخور والمجذوبين
الخادعين للخاضعين
والآكلين الشاربين
النازلين الصاعدين
للمصالح والمناصب
وأما أمريكا بتأمر
تصرخوا بقولة آمين
إحنا شعب وإنتو شعب
إحنا مصرى بسيط وراضى
عسكرى جاى م النجوع
يسمع الراديو الصغير
الأدان يملاه خشوع
يدعى ف الليل للى خلقه
يحمى عيلته يزيد ف رزقه
ف الدعا تنزل دموع
عند رب العالمين
صادقة من غير فلسفة
لا صوت جهورى ف ميكروفون
يصرخ يهدد بالوعيد
وكأنه واخد م السما
توكيل يكفر بعضنا
يهدينا نرجع مسلمين
يا عم مااحنا مسلمين
ومؤمنين وموحدين
من قبل حتى ما تتولد
وإحنا اللى وحدنا الإله
قبل الديانة ما تتوجد
ولإن مصر المؤمنة
قبل التاريخ فى دمنا
عمرنا ما حنبقى زيك
ولا أنت حتكون زينا
لِمّ غنمك أو جمالك
أو مباخرك أو عيالك
والمشانق من حبالك
والعشيرة والخيام
خد زعيقك خد صريخك
خد فتاويك واللجام
خد حرام حرام حرام
حلال عليك يا مسيلمة
اللى سرقته مننا
وإبعد بعيد عن أرضنا
لأنكوا... ولإننا
إحنا شعب......وإنتو شعب