يوميات ضابط شرطة.. العدد 202 و الحصيلة صفر

من فتره وانا بخاف اصحى الصبح الاقى زميلى استشهد
بقيت اسلم على زمايلى بعد الشغل وبنخاف نرجع نلاقى حد ناقص مننا ..كل ده وتلاقى المشاكل محوطة عليك من كل ناحية ولما صحيت لقيت الموبايل بيرن ولقيت الخبر بيقول ان العدد 202 فى شهداء الشرطة.
تم حجزه للشهيد محمد ابو شقره اللى استشهد فى سيناء او بمعنى اصح تم اغتياله من مجموعه من معدومى الدين والضمير والوطنيه واللى يحزنك اكتر ان ال200 شهيد اللى قبله محدش جاب حقهم ولا حد عمل حاجه يوقف بيها نزيف الدم من رجال الشرطة والكل قاعد بيتفرج من اول الوزير والقيادات لحد النظام الحاكم.
202 شهيد ولسه الامن مرجعش....معادله بايخه وسئيله بس للاسف صح ..الشهيد اللى قبل البطل ده كان استشهد من اسابيع واسمه النقيب البطل كريم وجيه سيف اللى والده يبقى الشهيد وجيه سيف كان ضابط شرطة بردو....حد يعرف احساس ام الشهيد كريم ايه وهى فقدت ابنها وزوجها بسبب الواجب؟؟؟؟ انا عارف انه عند ربنا وده قدر ودى اعلى درجات الشهاده بس يا جماعه الناس دى بتدفع التمن غالى اوى.
وكل واحد قاعد على كرسى حاسس ان المسئوليه كبيره جدا وبيقعد يقول مانتو لو كنتو مكانى مكنتوش عرفتو تعملوا حاجه....ودى بقت حجة الخيبان الامن مش هيرجع بشغل الطبطبه اللى شغال فى سيناء ده...ومش هيرجع فى ظل القانون الغائب الضعيف ومش هيرجع بايادى قيادات مرتعشه .
من يومين وانا واقف فى طابور البنزين لانى بقيت انزل بدرى ساعتين عشان ادخل بنزينه امون قعدت اتكلم مع الناس اللى واقفه جنب العربيه مستنيين دورهم زيي ولما عرفوا انى ضابط قعدوا يسالونى...احنا ليه مش حاسين بالامن بالرغم من ان شهداء الشرطة عددهم كبير؟؟؟؟؟ رد واحد تانى وقال "عشان هما بيتضحى بيهم" ورد التالت وقال "عشان هما بيهونوا على قياداتهم ووزارتهم " ورد الرابع وقال " عشان دول اللى بيدفعوا تمن اخطاء النظام ".......وبعدين بصولى وقلتلهم انتو جاوبتوا على السؤال من غير اى مجهود .
قبل ماكون ضابط انا مواطن الكهرباء بتقطع عليا وانا فى البيت...وبقف فى طابور البنزين مع الناس...والمياه بتقطع فى بيتنا بردو وبتوضى بالازازه كل مره بنزل اروح جنازة زميلى واسال ...الدور على مين فينا؟؟؟؟
الدور على اى طفل يتيتم؟؟؟؟ الدور على اى زوجه تترمل؟؟؟؟
الدور على اى ام تفقد نور عينيها؟؟؟؟
اصبحنا فى سراب بعيد....لم نعرف نهايته
انها العزله من مستقبل مفزع
العزله من دماء شهدائنا التى تذهب هباء
العزله من رؤية دمائنا تسيل بلا اى رادع
العدد 202 والحصيله صفر