أنا مغرّب .. من روائع الشاعر الصعيدي عادل صابر

وطالع بكرة ع الحرجة
حااروح الزرع واتمردغ
على الدرابيس
واتغدّى بعيش قيضى
وجبن اخضر
وجِدْع سريس
وانسى هدة امبارح
واركب نخلنا الطارح
واجنى الطايبة والمقْرش
وارمى الصيِص
حااقوم من نومى فجّارى
واترك فرشتى ودارى
واهرب م البلد والناس
واهجر قلمى والكراس
وتعب اليوم
واقلع توبى ومداسى
واسند ع الخدِيم راسى
واروح فى النوم
والملم م البيوت عمرى
وأعزف ضحكتى ع الناى
والحّن غنوة القمرى
وادارى عن غنايا بكاى
وحين يعوى فى قلبى الخوف
اروح واقعد مع جهلان
ونتسلى بحكاوى زمان
وسيرة عمرنا اللى فات
واخد وش بالمحرات
واهِتْ على البقر يرمح
وانده ع الشجر يطرح
وأتصاحب على القردان
واقوم واقلع بسروالى
وأفرش ع العزِيق شالى
وساعة الدنيا ماتقيّل
ضِلال السنط يحلالى