"مَوْلِد السيده مصر" جديد الشاعرة فاطمة المرسي

"مَوْلِد السيده مصر" قصيدة جديدة للشاعرة فاطمة المرسي خصت بها "محيط" من ديوانها الذي يصدر قريباً عن دار الطلائع، الشاعرة التي أطلق عليها "شاعرة الثورة" تعيش في أمريكا منذ 1979 وتتجنس بجنسيتها.

اصحىَ خلاص يا حج زين
رفعوا الآدان
وكفايه نايم من سنين
يعني انت جي من البلد علشان تنام ! ؟
معادتش تفرق مين مصلي ومين إمام
قوم صلي بينا ركعتين
وناخدها كعَّابي كده لحد الحسين
يادوب نصلي الظهر فى رحاب الحفيد
أصل الطريق ما بقاش بعيد
هنكمل المشوار ونمشي للميدان
ناخد مدد ونبص فى عيون الولاد
نشرب أمل
بينك وبين الحلم ييجي خطوتين
يا حج زين
طوف المكان سبعه ونادي قول مداااااد
يا ست مصر يا طيبه
علَّوا مقامك فى الميدان من غير ضريح
في موكبك صحيت جميع الأضرحه
والأجنحه
طايره سماكي من الفَرَح
داخله الجموع من كل باب
شدَّه الرحال
والكل واقف عَ العَتَب
نفسه يكون هو الذبيح ابن الذبيح
من غير قَدَح
مولد وأصحابه هِنا
ليلهم نهارهم سهرانين
واتوحدوا بنت وولد
كرامات كتير ما لهاش عدد
وصلت حدود المعجزات
النيل رجع للأهرامات
وياسين على اديكي اتولد
وقالوا أتباعك أحَدْ
طلقوا البخور
خايفين عليكي من الحسد
وانتي اللي ماسكه الصولجان
راكبه على كتاف الزمن
جايه براحتك م الأزل
رايحه على حدود الأبد
واقفه فى وش الريح وتد
واتلملمت كل السحب
نصبت خيام
فوق الحشود دي كلها متجمعه
وما فيش مكان حطة قدم
وما فيش عيال بتوه هنا
حضنك وطن
وملايكه حاملين الرايات
اسمك على جبينهم نطق
جيدك حرير والتاج ياقوت
واللي يحاول يخدشك
تحت السنابِك يتعدم
لازم يموت
يا حج زين إصحَى بقى وكفايه نوم
الست موكبها وصل
يلا بسرعه قول مداااااااااد
ياست مصر يا طيبه
انتي ومافيش بعدك مدد