يا مصر ياللى.. حبك تملى.. زايد فى قلبى حبتين.. لمى الضفاير.. الشعر طاير.. دارى خدودك والعينين.. وأنا قلبى غاير من كل زاير.. وبحس شاعر يبكى شاعر.. وإنتى بتبكى دمعتين.. دمعة على ولادك اللى ماليين القهاوى.. ومش شاطرين غير ف الحكاوى.. والمغالبة فى عشرتين.. ودمعة على أموالك اللى بتتهرب على بره.. اللى عايمة واللى طايرة.. واللى ف آلوه ومكالمتين.. والأرض خليت م التقاوى.. من غلا المبيد والكيماوى.. وهجرة ولادها الفلاحين.. والنيل اللى من خيره عشنا.. ومنه قمحنا وعيشنا.. لو لوثناه اتلوثنا.. وإن ما جاش نعيش منين؟.. وإن قلت أكتر هزيد وكتر.. وإن زدت هضر وجايز أنضر.. ومش بعيد أصبح سجين.. اصبرى يا أم القنال يا أم الشهيد.. جايز تمنينا الآمال بيوم جديد.. وننسى كيل المكيالين.. اصبرى يمكن ولادك ينقبوا الجبال.. زى جدودك ما حفروا القنال.. بتوريتين ومقطفين!.. قوم يا مصرى.. قوم يا مصرى نفض تراب الكهف.. إصحا بقى ما كفاية لف.. شوف خير بلدنا بياخدوا مين؟.. يا مصرى يا مصرى أمك غضبانة منك.. شوف كام بلد سبقاك يا ولد.. وإحنا الحضارة من سنين.. قوم وشارك ربك يبارك.. والرب دايماً كبير ولا تتغرب.. دى مصر فيها خير كتير.. بس صحى النعسانين.. بس صحى النعسانين. عضو رابطة الزجالين وكتاب الأغانى
