مي كساب عن حبس زوجها «أوكا»: «ضحية تعليمه المتواضع»

خرجت الفنانة مي كساب عن صمتها بعد القبض على زوجها المطرب الشعبي "أوكا" أثناء سفره لإحياء إحدى الحفلات بصحبة المطرب الشعبي أورتيجا.
وعبرت مي عن استيائها الشديد لما يحدث لها منذ 4 أعوام منذ علمها بمرض والدتها بالسرطان والكثير من الأحداث المؤلمة التي لم تكن تتوقعها.
وكتبت مي عبر صفحتها الشخصية على موقع الصور الشهير "إنستجرام": «كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام».
وأضافت:«استحملت ظلم كتير واضطهاد ومحسوبيات وكنت طول الوقت بأصبر نفسي بكلام ابويا الجميل اللي رباني على القناعة كان دايما يقولي انتي عاملة زي عسكري في الجيش كل شوية بيترقى بجهده وتعبه ويتنقل من سلاح لسلاح أنا مريت بظروف صعبة كتير في حياتي بس للأسف بقالي 4 سنين مش باشوف يومين حلوين على بعض».
وتابعت مي: «أنا باعيش أقسي أيام حياتي من يوم 1 ديسمبر 2012 يوم ما اكتشفت أن أمي عندها السرطان وأنا مش مي أنا واحدة تايهة مش لاقية نفسها، موت أمي كسرني ومن بعدها أحداث كتير قوي وجعتني القريبين مني عارفين أنا استحملت حاجات صعبة كتير أد إيه السنين اللي فاتت بس الصراحة ده أصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كان روحي متاخدة من جسمي لا عشان متأكدة أنه مظلوم متأكدة أنه ضحية طيبته وسذاجته وللأسف ضحية تعليمه المتواضع الضحل ضحية ثقته الزيادة عن اللزوم في أي شخص يقرب منه ويضحك عليه ويقوله أنا هاعملك ويوعده وعود كدابة وفي الآخر يستغله ويورطه طبعا لما باتكلم عن محمد كأني باتكلم عن أحمد كمان».
واختتمت مي: «أوكا وأورتيجا روح واحدة في جسدين ثقتي في رب العالمين كبيرة جدا أنه هينصرهم ويفك كربهم ثقتي في عدالة القضاء العسكري كبيرة أنه مش هيظلمهم ثقتي في قلوبكم الرحيمة كبيرة إنكم هتقفوا جمبهم ادعولهم وادعموهم أقسم بالله العلي العظيم أوكا وأورتيجا مظلومين».