انت "ثورة مضادة" ولا "فلول" ؟! / سعد البحيري

انت "ثورة مضادة" ولا "فلول"؟


*سعد البحيري

بعد الثورة و زوال النظام السابق ظهرت عملية تصنيف واسعة لكافة فئات الشعب المصري وبدأ كل من يقف في خندق يري أن من ليس معه فهو ضده وبدأنا نسمع مسميات مثل فلول ، وثورة مضادة ، ومندس وأصحاب أجندات خاصة ونتايج وغيرها .

لكن هل فعلا كلنا مع الثورة ومع انها توصل لبر الامان ؟ خلينا نشوف بعض المواقف اللي بتوضح ازاي اتصرفنا بعد الثورة وكل واحد يصنف نفسه وبس

- لو انت بتركن صف تاني عشان عارف ان العسكري بتاع المرور مش واقف او حتي لو شافك ممكن تخوفه بكلمتين وتستغل ظروف انكساره .. تبقي من الثورة والا من الفلول؟

- لو انت ما دفعتش فاتورة الكهرباء من بعد الثورة لحد الان .. تبقي من الثورة والا من الفلول؟

- لو انت قلت معاية مستندات تثبت ان ثروة الرئيس السابق وعيالة وصلت عشرتاشر مليار دولار ولما استدعوك للتحقيق وسماع شهادتك قلت هو انتوا صدقتوا .. دا كلام جرايد .. تبقي من الثورة والا من الفلول؟

- لو انت بتركب عربية الستات في المترو لان مفيش عسكري في المحطة .. تبقي من الثورة والا من الفلول؟

- لو انت شايف ان عصام شرف رجل طيب وما ينفعش يتعامل مع الناس بهدوء وذوق وان الناس عايزة العين الحمرا .. تبقي من الثورة والا من الفلول؟

- لو انت شايف ان المجلس العسكري متواطئ او مماين ناحية بعض الرموز .. تبقي من الثورة والا من الفلول؟
- لو انت شايف ان الحل اننا نشكل مجلس رئاسي ونعمل دستور جديد رغم اننا احتكمنا لصندوق الانتخابات وخلصت القصة بنعم .. تبقي من الثورة والا من الفلول؟

- لو انك شايف ان مصر دولة اسلامية واللي مش عاجبه يسيب البلد ويهاجر .. تبقي من الثورة والا من الفلول؟

- لو انك شايف ان مصر دي بلد المسيحيين وان المسلمين عليها ضيوف .. تبقي من الثورة والا من الفلول؟

- لو انت صاحب تاكسي ابيض وبتقاول الزبون ع المشوار قبل ما تروحه رغم انك معاك عداد شغال عمال علي بطال .. تبقي من الثورة والا من الفلول؟

- لو انت بتنقل الاخبار من غير ما تتاكد من مصدرها وتشيرها علي صفحتك ع الفيس وتويتر وتهيج الدنيا .. تبقي من الثورة والا من الفلول؟

- لو انت صاحب عربية رحلات من اللي شغالة علي خط فيصل بولاق امبابة وزودت الاجرة علي الناس بعد الثورة وحتي قبل ازمة السولار.. تبقي من الثورة والا من الفلول؟

- لو انك صاحب بنزينة وبتقول ما فيش سولار رغم ان خزانات البنزينة مليانة .. تبقي من الثورة والا من الفلول؟
- لو انت بتبيع انبوبة الغاز بتلاتين اربعين جنيه رغم انك مظبط صاحب المستودع وواخدها باربعة جنيه الا ربع .. تبقي من الثورة والا من الفلول؟

- لو انت شايفة ان سوزان مبارك كانت بتغير منك وبتحسدك علي جمالك .. تبقي من الثورة والا من الفلول؟

- لو انت شايف ان شهداء ثورة يناير مش شهداء ودول ماتوا محدش عارف ليه .. تبقي من الثورة والا من الفلول؟

- لو انت شايف ان المجلس العسكري لازم يفضل يحكم كمان سنة وما ينقلش السلطة للمدنيين .. تبقي من الثورة والا من الفلول؟

- لو انت شايف ان اقتصاد البلد لم يتاثر من الاعتصامات والانفلات الامني .. تبقي من الثورة والا من الفلول؟

- لو انت شايف ان السياحة دي حاجة مش مهمة وممكن نعوض اللي بيجي منها بطريقة تانية .. تبقي من الثورة والا من الفلول؟

- لو انت شايف ان زواج شباب الاخوان المسلمين من بنات خارج الجماعة سيعطل مسيرة النصر .. بقي من الثورة والا من الفلول؟

- لو انت شايف ان الدولة المدنية هي الحل وانك مستعد لحمل السلاح من أجل تحقيق ذلك .. تبقي من الثورة والا من الفلول؟

- لو انت شايف ان اعضاء الحزب الوطني ممكن يشاركوا في الحياة السياسية والحوار الوطني كمان .. تبقي من الثورة والا من الفلول؟

- لو انت شايف ان الرئيس السابق ما يستاهلش اللي حصل له وانه عيب نحاكمه .. تبقي من الثورة والا من الفلول؟

- لو انت شايف ان الجيش المصري لم يحمي منجزات الثورة ويحتضنها من اول لحظة .. تبقي من الثورة والا من الفلول؟

- لو انت صاحب عمل او رجل اعمال ومش بتدفع مرتبات الموظفين عشان عارف ان البلد حالها واقف ومحدش لاقي شغل .. تبقي من الثورة والا من الفلول؟

-لو انت وافقت ان سواق الميكروباص ياخد منك اجرة زيادة وقلت له هي عافية قالك اه عافيه ومع ذلك دفعت .. تبقي من الثورة والا من الفلول؟

- لو انت شايف ان الرئيس السابق وولاده ما يستحقوش محاكمة عادلة - رغم انهم حرمونا من العدل لسنين- .. تبقي من الثورة والا من الفلول؟

- لو انت شايف ان لك حق في البلد أكتر من اي حد غيرك الغلبان .. تبقي من الثورة والا من الفلول؟

- لو ظهرت عليك علامات البلطجة المبكرة وحاسس ان محدش له عندك حاجة.. تبقي من الثورة والا من الفلول؟

- لو شفت سواق الميكروباص والا التوك توك اللي انت راكبه بيدخن سيجارة حشيش أو بانجو وما خليتوش يطفيها.. تبقي من الثورة والا من الفلول؟

- لو انت ما تصورتش جنب دبابة لحد الان.. تبقي من الثورة والا من الفلول؟

- لو انت شايف اننا لما نرجع الفلوس المنهوبة من النظام السابق نوزعها علي الشعب الغلبان وكل واحد ياخد مبلغ يظبط بيه نفسه او حتي يتجوز علي ام العيال .. تبقي من الثورة والا من الفلول؟

- لو انت ركبت اتوبيس هيئة النقل العام وما دفعتش الأجرة وكمان قلت للكمسري هو اتوبيس أمك .. تبقي من الثورة والا من الفلول؟ ملحوظة - الاتوبيس فعلا هو ملك أم الكمسري لان الاتوبيس ملك لمصر ومصر هي أمي وأم عفاف راضي وأم الكمسري .. صح؟

- لو انت شايف ان المسلمين والاقباط مش ممكن يكونوا ايد واحدة – رغم ان ايد وحدها ما تصقفش - .. تبقي من الثورة والا من الفلول؟

- لو انت ظهرت علي شاشة التلفزيون ايام الثورة وقلت انا لا اعبر عن جموع الثوار وانا مش زعيم الثورة وبعد نجاحها بيوم قلت انا ممثل الثوار الوحيد وان فلان وترتان ل يمثلون الثورة .. تبقي من الثورة والا من الفلول؟

- لو انت شايف ان انا من الفلول يبقي انت اللي" فلول" وستين" فلول" !!!.

*كاتب وصحفي مصري