عكاشة مخاطبا المجلس العسكري : "ميصحش متنزلوش اسمي في الأستفتاء .. وهعتبرها سهو"

عكاشة مخاطبا المجلس العسكري :
"ميصحش متنزلوش اسمي في الأستفتاء .. وهعتبرها سهو"

محيط - محمد يونس

كالعادة يفاجأنا رئيس قناة "الفراعين " الإعلامي "توفيق عكاشة" ملهم ثورة 25 يناير كما يقول ، وصاحب شرط تزغيط البط للترشح في انتخابات الرئاسة، وأيضا صاحب واقعتي التقبيل الشهيرة لأيدي صفوت الشريف ، حيث
خرج علينا عكاشة بتصريح خطير في اهم حلقات برنامجه، يلوم فيه المجلس العسكري لعدم إدراج أسمه في استفتاء مرشحي الرئاسة، رغم وجود اسمه وبجواره نسبة الصفر في المائة !!

واستنكر عكاشة الأمر وكأنه لم يرى اسمه في قائمة المرشحين للرئاسة، وعقب غاضبا: "ميصحش متنزلوش اسمي في الأستفتاء وهعتبرها سهو.. وأنا قولت أسباب ترشحي لرئاسة الجمهورية.. إنى ملقتش حد من سني يترشح .. مع إني كاره الموضوع بس هعمل ايه .. سأستكمل المسيرة".

وأستكمل عكاشة اخر تصريحاته الخطيرة قائلا: "ودكتور البرادعى معاه دكتوراه من أمريكا .. وأنا كمان .. بس هو راح أمريكا يتدرب ضد البلد .. وأنا أتدربت عشان البلد".

وعلى الفور توالت التعليقات الطريفة على صفحات "الفيس بوك" بعد نشر فيديو الحلقة خاصة في صفحات "كلنا خالد سعيد" و "كارهي توفيق عكاشة" و"نعم نحن نستطيع تزغيط البط" ، وكانت أبرز تلك التعليقات :

- ياعكاشة انت خارج المنافسة واكتساااااح .. معلش تعالى على نفسك وإترشح !!.

- يانهار اسود ومنيل بستين نيله هو دا عايز يبقى رئيس مصر؟؟ دا عايز جمعة غضب لوحده.

- الراجل ده خسارة ما يبقاش رئيس مصر .. هانلاقي واحد زيه فين .. دكتوراه في تظغيط البط والوز .. واستاذ في فرز البهايم والبقر .. يعني خبرة.

- أكيد ياعكاشة المجلس العسكري هيكتب اسمك بس لما يفتحوا باب الترشيح لرئيس المتخلفين عقليا.. هتكون على راس القائمة .. ثم دى غلطتك روح بوس ايد المشير زى ما بوست ايد الشريف.

- بيقول هعتبرها سهوا !! يعنى لو معتبرهاش سهوا كان هيعمل ايه ان شاء الله !! كائن غريب.

- بيفكرنى بعادل امام قالك اسمى مكتوب .. لا .. طيب .

- على فكرة الراجل دى مسلي جدا.. وعلى فكره بقى واضح جدا ان الراجل ده بيستهبل وعامل عبيط وبيقول الكلام ده عشان الناس تتفرج وتضحك عليه والقناه تجيب إعلانات وفي الاخر هو الكسبان واحنا اللي عبط.

- الراجل دا بيضرب صنف اجمد من بتاع القذافي.