توفيق عكاشة ل«البرادعى»: «لو بتعرف تزغط البط والوز.. هننتخبك»

باعتباره فيديو ساخراً، تداول شباب المواقع الإلكترونية مقطعا من برنامج لتوفيق عكاشة، رئيس قناة الفراعين، يخاطب فيه الدكتور محمد البرادعى، المدير العالم السابق للوكالة الدولية للطاقة الذرية، باعتباره «مرشحاً محتملاً لرئاسة الجمهورية».. وقال عكاشة فى بداية حديثه: «البرادعى رجل محترم وممتاز وأنا بحبه.. بس أنا عايز أسأله سؤال.. هو يعرف الست فى الفلاحين بتزغط دكر البط والوز إزاى؟؟ هل يقدر يقوّلى الفرق بين تزغيط الفول أو الدرة.. وإذا عرف بتزغطه إزاى، هننتخبه رئيس للجمهورية.. ليه لأ ؟!!»
وأكمل عكاشة: «لو عرف سعر دكر الوز والبط فى سوق السبت أو التلاث أو الخميس.. مافيش مانع ننتخبه رئيس جمهورية.. ما هو راجل من الشعب»، مضيفاً «أصل الغالبية العظمى من الشعب موجودة فى ريف مصر والأقاليم مش فى القاهرة والإسكندرية بس».
واستمر عكاشة فى توجيه الأسئلة بسخرية شديدة: «يا ترى البرادعى يعرف سعر ركن البقرة فى السوق كام.. والله لو عرف السعر يبقى راجل مصرى أصيل.. باعتباره راجل عايز يحكم مصر؛ يبقى لازم يعرف كل حاجة فى مصر من أول البراغيت لغاية تمن المواشى فى السوق».
ثم أجاب توفيق بنفسه عن أسئلته الغريبة: وقال: «سوق التلات فى الزقازيق غير سوق المنصورة.. وسوق شبين غير سوق الجيزة.. وسوق المنيا غير سوق أسيوط.. وكل سوق له سعر، وقفة البقرة فى السوق أقلها 10 وأقصاها 20 جنيه..
فهل يا ترى عمنا البرادعى يعرف الكلام ده.. ولا مالوش غير فى النووى بس؟!!»