بإذن الله هتاخدي عزاه

فرق كبير بين عيد والعيد
آخر عيد كان كله سعيد
في وسط الصفحة إنت منور
كله يبارك كله ينافق
عقبال مية وعمر مديد
رغم المية خلاص هتقرب
زي نوادي الكورة أكيد

المرة دي ما شفنا التورتة
ولا فيه زفة ولا هلافيت
ولا أقواس وعليها الصورة
ولا زمامير بتزمر تيت
ولا برتيتة مولعة غنوة
وجوة البيت سامعينه صويت
ولا تمورة واقف بيغني
ولا هلفوت نزله شريط
وجوة العنبر قايدين شمعة
و عز يطبل تراباتيت
فرق كبير بين قعدة وقعدة
قعدة سجن وقعدة بيت
وطفل صغير مش لاقي جدو
صوته العالي جدو انا جيت
جبت هدية عليك هنعيد
راجع إمتي حبيبي للبيت
تيته زعلانه وبابا مسافر
والأهرام ما كتب مانشيت
وفي التحرير هنشوفه متعلق
في وسط الهيصة والزغاريط
يا ام شهيد إبنك في الجنة
هتاخدي عزاه ونغني شريط