شباب 2010 وحرب أكتوبر 73

شباب مصر 2010 ماذا يعرفون عن حرب أكتوبر وماذا تمثل لهم.. وهل هناك علاقة أساسا بينهم وبينها..؟!
فاقرءوا معنا إجابات هؤلاء الشباب .
حالة وانتهت..!!
هكذا بدأ «علي السيد» أولي نظم معلومات جامعة القاهرة
يعني إيه..؟!
بسخرية ظهرت علي ملامح وجهه قال.. إحنا كده يا مصريين أحسن حاجة بنعملها في حياتنا هي البكاء علي الأطلال.. وأسهل حاجة عندنا نقولها هي إحنا عملنا وسوينا الهوا يل.. حاجة تشبه كده الأهرامات وحضارة ال4000 سنة.. كل ما ننزنق نقول إحنا ولاد الفراعنة اللي عملوا وبنوا طيب إحنا بقي عملنا إيه هي دي فكرة حرب أكتوبر.. كل سنة في نفس التوقيت يقولوا انتصرنا وربينا الإسرائيليين ويذيعوا لنا في التليفزيون أفلاما وأغاني حفظناها.. طيب إحنا دلوقت فين وعملنا إيه ووصلنا لغاية فين مفيش.. كل حاجة واخدين فيها صفر بالضبط زاي صفر المونديال.. بطالة وفقر وإغتصاب وحوادث وبلاوي.. وأسعار مولعة نار وتعليم بايظ وعلاج فاشل كبروا دماغكم بقي وسيبوكم من الماضي وذكرياته.. وانسوا الأغنية اللي بتقول..
ما تقولش إيه إدتنا مصر.. قول هندي إيه لمصر..؟! خلاص ما عدش ينفع.. لأ من حقنا نقول إدتنا إيه مصر علشان نديها.. إحنا جيل مظلوم.. بقولك إيه كفاية كده علشان أنا مخنوق زهقان وطهقان.. وقريب أوي ههاجر من البلد دي..تركني «علي السيد» بعد أن أصابني بحالة من حالات الشجن والحزن وتركت لقدمي العنان في السير محدثة نفسي بأشياء كثيرة كانت نهايتها أنه لا تعليق..!!
نادية عبد الهادي 25 سنه تعمل بائعة فى محل ملابس.. سألنها نفس السؤال:
ماذا تعني لك حرب أكتوبر؟
قالت لي عندما أسمع كلمة أكتوبر أتذكر علي الفور كلمة «العك» في كتب التاريخ والتناقض الكثير بين كلام الناس المشاهير اللي شوية يقولوا إنها كانت حاجة كويسة والتانيين يقولوا تمثيلية وانتصار علي الورق بس.
قلت لها.. وانت بتميلي إلي أي رأي..؟!
بصراحة.. مش بفرح بالهيصة اللي بتتعمل كل سنة علي انتصاراتنا في أكتوبر ولما بشوف حال العرب وتحديدا الفلسطينيين واللي بيجري لهم بقول إن السادات فرط في حقنا وفي حق كل العرب.. والحقيقة أنا ماعنديش تفاصيل لأني في النهاية مش بفهم أوي في السياسة لكن أنا حاسة إن الرأي ده هو الأقرب لقلبي «بس»!!
محمد مرسى وأصحابه سألنهم فكانت إجاباتهم كالتالي دون حذف أو مبالغة.
أنتصرنا وخلاص.. وأهم حاجة إن مفيش حرب ولو تتكرر إحنا مش قدها ولا قد إسرائيل.. علشان كده أنا بحب السادات أوي هو السبب في السلام.
كل اللي أعرفه عن الحرب هو أغنية الله أكبر بسم الله بسم الله.. وحكاية الضربة الجوية الأولي وخلاص.
انت واجعة دماغك ودماغنا ليه.. ما الناس انتصرت وخلاص خلينا في حال البلد دلوقت.. أنا شايف إن اللي إحنا فيه دلوقت هو ألعن من هزيمة 1967.. إسرائيل وأمريكا بيعملوا فينا اللي هم عايزينه ونبي بلاش توجعي دماغنا أصلها متكلفة ومش ناقصة هَمْ كفاية اللي إحنا فيه.
البلد دي مش حنينه علينا.. زي القطة بالضبط اللي بتآكل ولادها وفاكرة إنها بتحميهم.. عارفة أغنية إيمان البحر اللي بتقول «يا بلدنا يا بلد هو من أمتي الولد بيخاف من أمه لما في الضلمة تضمه» صدقينا إحنا خايفين من مصر وتصدقي كمان إحنا كفرنا بكل حاجة.. حتى الإنتماء ماعدش عندنا.. ساعات أقعد مع نفسي وأقول الحل في الاحتلال.. يمكن يغيرنا أو ينقلنا يمكن أمريكا أو حتى إسرائيل لو أحتلونا حالنا يتغير.
ناريمان الحسيني أولى مودرن أكاديمي سألنها.. فأجابتني.. أنا ما حضرتش الحرب.. أنا سني صغيرة أوي لكن بابي دايما بيقول إنها كانت نقلة وانتصار كبير في حياة مصر ودايما بيدعي للسادات إن ربنا يرحمه لأن هو اللي عيشنا في رخاء وانفتاح وعمل سلام بينا وبين إسرائيل.
لا أعرف لماذا سألتها عن فكرة التطبيع بين مصر وإسرائيل؟
أجابتني.. أنها سمعت هذه الكلمة في فيلم السفارة في العمارة وتعاطفت أوي مع داليا البحيري وعادل إمام وإنها ساعات بتتفرج عن الطلبة زمايلها في الجامعة الأمريكية اللي بيكتبوا عن إسرائيل والعلاقات معاها.
بالون كبير منفوخ أصلا.. ولا يحتاج إلي المزيد من النفخ حتى لا ينفجر في وجه الجميع.
هكذا شبه ياسين محمد ياسين «23 عاما» حرب أكتوبر المجيدة ثم أكمل حديثه قائلا.. صحيح أن الحرب أعادت هيبة هذا الشعب أمام العالم بعد 1967.. لكن ما لحقناش نفرح.. كامب ديفيد اغتالت الفرحة.. أبويا الله يرحمه جت له ذبحة صدرية لما سمع بزيارة السادات للكنيست وقال آه.ه.ه..! فينك يا جمال..!!
قبل ما يموت من سنتين حكي لي القصة والحدوتة وفهمني يعني إيه سفارة إسرائيلية في مصر بتطل علي نيلنا العظيم!!
أنا لقيت اللي يفهمني وبحاول أفهم أصحابي لكن ماحدش في دماغه أساسا.. لقمة العيش والفقر حاصر الجميع فخلاهم دايرين زي التيران في ساقية!!
عمرو وليلى (مش سلمى ) مخطوبين سألناهم فأجابونا بضحك.. إحنا في إيه ولا في إيه.. أكتوبر إيه وبتاع.. إيه.. إحنا مشغولين أوي دلوقت بالشقة.. يا تري نتجوز في شقة إيجار جديد حتي ولو أودة وصالة ولا مش هنعملها خالص..!!