مرتضي وبدر للخلف در - عبد المنعم فوزي - الجمهوريه

"بدر لا يصلح وزيراً للتعليم بل مأموراً لقسم شرطة" كلمات للمستشار مرتي منصور المحامي بالنقض والممثل القانوني لاحد دور النشر في هجومه علي د. أحمد زكي بدر وزير التربية والتعليم مرتضي يتهم الوزير بالعكننه علي أولياء الأمور والطلاب. بفرضه حق انتفاع علي كل كتاب خارجي تتراوح قيمته من 300 إلي 800 ألف جنيه.
بصراحة بقي انا كنت مستجدع المستشار مرتضي واديته صوتي في انتخابات نادي الزمالك اللي كان محتاج ساعتها ايد قوية ترجع امجاد الماضي كمان لانه راجل دوغري وحقاني وبيدافع عن المظلوم وما بيخفش من حد بجد فيه ناس اصحاب جلود سميكة مينفعش معاها غير مرتضي المشكلة ان موقفه مع الدكتور بدر محير ويربك.. ليه بقي؟ انتو شايفين التعليم في مصر بايظ وخربان ازاي وانا مبسوط جدا من الدكتور بدر بيحاول يضبط التعليم والمدرسين وكنا محتاجين واحد زيه السبب ان الدروس الخصوصية التي تنخر المنظومة التربوية حولت التعليم من المدارس إلي المنازل والجراجات والمولات وأماكن النظامية يا عم مرتضي سيب الراجل يشتغل جد شوية ويرجع المال السايب طب هو كل ما يجييوا حد ينضف وزارة نحاربه الحكاية مش ناقصة مزايدة بعد ان تحول التلميذ إلي جهاز استقبال وتخزين بس يحفظ خلالها الدروس ولا يطبق وينساها بعد الامتحان بصراحة بقي فيها ايه لما الوزارة تأخذ حقها من الملايين اللي بيكسبوها بتوع الكتب الخارجية هو انت فاكر ان الناشرين هاتدفع من جيبهم أو من ارباحهم حاجة في الاخر هاتيجي علي المواطن الغلبان بذمتك فيه دولة محترمة في العالم فيها حاجة اسمها كتب خارجية بجد انا مش فاهم جماهيرية وكنت متصور انك تأخذ الجانب الصح لأن الناس مش عارفة تعمل أيه وكل همها ان ولادها تنجح بأي طريقة بالدروس الخصوصية بالكتاب الخارجي أو حتي بالغش صحيح انا مش مع موقف مرتضي بس برضو مش مع الوزير ليه بقي؟ لأن الكثير من الخبراء والمدرسين والطلاب بيقولوا ان الكتاب المدرسي لا يصلح كمرجع للمذاكرة وسيئ جدا وما فيش حد بيستخدمه كمان الهيئة القومية لضمان جودة التعليم والاعتماد وصفت الكتاب المدرسي بالركاكة. وضعف المحتوي. وتنافر الألوان. ورادءة الطباعة والتجليد ومش بس الكتاب المدرسي اللي حاله يغم لكن حال التعليم بصفة عامة المدارس زبالة وفيه عجز في المدرسين ومش فاهم حضرته بيفكر ازاي؟ ياريت علي الأقل يحاول الا يتسرع في اتخاذ قراراته ويعمل بنية اساسية للتعليم ويضع خطة عاجلة واخري أجلة يعني استراتيجية ثابتة لتطوير التعليم مش يعمل كل حاجة بالعافية يعني هو كده ولو مش عاجبكم اخبطوا دماغكو في الحيط احنا مش عايزين قرارات فجائية والاصلاح مش حيتم في يوم وليلة شوف يا صاحبي لما اقولك الدول اللي بتحترم نفسها وعايزة تتقدم بترسم خطة ثابتة وتطبقها كدة نمشي صح والوزير اللي ييجي بعديه يكمل مشواره في اليابان انشأوا مدارس ترفيهية مبنية علي فكرة جعل الأطفال يحددوا الوظيفة اللي يحبوا ويختاروا يتشغلوها حسب امكانيتهم وميولهم ازاي بقي؟ حصص الدراسة متنوعة فيها درس في مكاتب الطيران يتم التدريب علي مهنة الإنقاذ السريع وبأقل خسائر بشرية ممكنة وحصة أخري للتدريب واجراء عمليات جراحية كمان التدريب علي تقديم نشرة أخبار علي الهواء مباشرة ووظيفة محقق صحفي ويسير الأولاد في الشوارع ويقومون بعمل لقاءات مع الناس اسلوب تربية جميل يعلم الأطفال بالطرق العملية وليس فقط بالكلام هما عايزين ايه؟ فعلا التقدم الحضاري له ناس فيجربون 80 وظيفة مختلفة بشكل عملي وقريب جدا إلي الواقع كل ما تتخيل من أعمال يجعلهم يستشعرون الوظائف المختلفة منذ سن مبكرة حتي يحدد الطفل المهنة التي يهواها في المستقبل طب عارفين المدرس الياباني بيقبض مرتب يعادل مرتب رئيس الوزراء. وتقارب مرتبات المعلمين في ألمانيا الحد الأقصي لمرتبات موظفي الدولة. بالإضافة إلي تمتعهم بمزايا أخري مثل شرائهم المنازل بأسعار أقل عن بقية المواطنين وفي كينيا يقف ممثل المعلمين مع رئيس الجمهورية وكباررجال الدولة في استقبال رؤساء الدول الأخري في المطار عندنا صورة المدرس في الحضيض وفاكرين رواية "السكرية" لنجيب محفوظ. يصرخ أحمد عبد الجواد وهو ينهر ابنه كمال الذي يود الالتحاق بمدرسة المعلمين العليا بدلاً من مدرسة الحقوق قائلاً: الناس عندنا لا تقيم التماثيل لمعلم. وريني تمثال اقيم في بلادنا لمعلم فيرد الولد بانه في بلاد العالم المتقدم يقيمون مثل تلك التماثيل يا صاحبي المعلم هو سر تقدم اليابان لانهم يعطونه راتب الوزير ومسئولية القاضي وسلطة الضابط.